ಇಸ್ರೇಲ್-ಹಮಾಸ್ ಯುದ್ಧ: ಈ ಕಾರಣದಿಂದಾಗಿ ಇಸ್ರೇಲಿ ಪೊಲೀಸರಿಗೆ ಸಮವಸ್ತ್ರ ಪೂರೈಕೆ ನಿಲ್ಲಿಸಿದ ಕೇರಳ ಕಂಪನಿ

ತಿರುವನಂತಪುರಂ: ಇಸ್ರೇಲ್​ ಪೊಲೀಸ್ ಸಮವಸ್ತ್ರವನ್ನು ತಯಾರಿಸುವ ಕೇರಳ ಮೂಲದ ಉಡುಪು ಕಂಪನಿ ಮರಿಯನ್ ಅಪರಲ್ಸ್, ಗಾಜಾ ಪಟ್ಟಿಯಲ್ಲಿ ಶಾಂತಿ ಮರುಸ್ಥಾಪಿಸುವವರೆಗೆ ಇಸ್ರೇಲ್‌ನಿಂದ ಆದೇಶಗಳನ್ನು ಸ್ವೀಕರಿಸದಿರಲು ನಿರ್ಧರಿಸಿದೆ. ಸದ್ಯಕ್ಕೆ ಇಸ್ರೇಲ್‌ನಿಂದ ಯಾವುದೇ ಹೊಸ ಆರ್ಡರ್‌ಗಳನ್ನು ತೆಗೆದುಕೊಳ್ಳದಿರುವುದಾಗಿ ಕಂಪನಿ ಹೇಳಿದೆ. ಕಂಪನಿಯು ಇಸ್ರೇಲ್ ಪೋಲೀಸ್ ಫೋರ್ಸ್‌ನ ಸೊಗಸಾದ ತಿಳಿ ನೀಲಿ, ಉದ್ದನೆಯ ತೋಳಿನ ಸಮವಸ್ತ್ರದ ಶರ್ಟ್‌ಗಳನ್ನು ತಯಾರಿಸುತ್ತದೆ.

"ನಾವು 2015 ರಿಂದ ಇಸ್ರೇಲ್ ಪೊಲೀಸರಿಗೆ ಸಮವಸ್ತ್ರವನ್ನು ತಯಾರಿಸುತ್ತಿದ್ದೇವೆ. ಹಮಾಸ್ ದಾಳಿ, ನಾಗರಿಕರ ಹತ್ಯೆಯನ್ನು ಒಪ್ಪಿಕೊಳ್ಳಲು ಸಾಧ್ಯವಿಲ್ಲ. ಅದೇ ರೀತಿ ಇಸ್ರೇಲ್ ಸೇಡು ತೀರಿಸಿಕೊಳ್ಳುವತ್ತಿರುವುದು ಸಲ್ಲ. 25 ಲಕ್ಷಕ್ಕೂ ಹೆಚ್ಚು ಜನರಿಗೆ ಆಹಾರ ಮತ್ತು ನೀರು ನಿರಾಕರಿಸುವುದು, ಆಸ್ಪತ್ರೆಗಳ ಮೇಲೆ ಬಾಂಬ್ ದಾಳಿ, ಅಮಾಯಕ ಮಹಿಳೆಯರ, ಮಕ್ಕಳ ಹತ್ಯೆ ಹೀಗೆ ಎಲ್ಲವನ್ನೂ ಒಪ್ಪಿಕೊಳ್ಳಲು ಸಾಧ್ಯವಿಲ್ಲ. ಯುದ್ಧವು ಕೊನೆಗೊಳ್ಳಲು ಮತ್ತು ಶಾಂತಿ ಮೇಲುಗೈ ಸಾಧಿಸಲು ನಾವು ಬಯಸುತ್ತೇವೆ" ಎಂದು ಒಲಿಕಲ್ ವಿಡಿಯೋ ಸಂದೇಶದಲ್ಲಿ ತಿಳಿಸಿದ್ದಾರೆ.

ಅಂತಾರಾಷ್ಟ್ರೀಯ ಒಪ್ಪಂದದ ಪ್ರಕಾರ ತಮ್ಮ ಸಂಸ್ಥೆಯು ಅಸ್ತಿತ್ವದಲ್ಲಿರುವ ಒಪ್ಪಂದಗಳನ್ನು ಗೌರವಿಸುತ್ತದೆ. ಆದರೆ ಯುದ್ಧವು ಕೊನೆಗೊಳ್ಳುವವರೆಗೆ ಯಾವುದೇ ಹೊಸ ಆದೇಶಗಳನ್ನು ಸ್ವೀಕರಿಸದಿರಲು ನಿರ್ಧರಿಸಿದೆ ಎಂದು ಮರಿಯನ್ ಅಪರಲ್ಸ್ ನಡೆಸುತ್ತಿರುವ ಥಾಮಸ್ ಒಲಿಕಲ್ ಹೇಳಿದ್ದಾರೆ.

ಕಂಪನಿಯ ವಾರ್ಷಿಕ ವಹಿವಾಟು 50-70 ಕೋಟಿ
ಕಂಪನಿಯ ವಾರ್ಷಿಕ ವಹಿವಾಟು 50-70 ಕೋಟಿಯಿದೆ. ಮರಿಯನ್, ಶಾಲಾ ಸಮವಸ್ತ್ರಗಳು, ಆಸ್ಪತ್ರೆಯ ಉಡುಪುಗಳು, ಅಗ್ನಿಶಾಮಕ ಮತ್ತು ರಕ್ಷಣಾ ಉಡುಪುಗಳು ಮತ್ತು ಕೋಟ್‌ಗಳನ್ನು ಮಧ್ಯ ಏಷ್ಯಾದ ದೇಶಗಳಿಗೆ ರಫ್ತು ಮಾಡುತ್ತದೆ. ಮಲಯಾಳಿ ಥಾಮಸ್ ಒಲಿಕಲ್ ನೇತೃತ್ವದ ಕಂಪನಿಯು 2008 ರಿಂದ ಕಣ್ಣೂರು ಕೂತುಪರಂಬದಲ್ಲಿ ಕಾರ್ಯನಿರ್ವಹಿಸುತ್ತಿರುವ ಉತ್ಪಾದನಾ ಘಟಕದಲ್ಲಿ ಎಲ್ಲಾ ಸಮವಸ್ತ್ರಗಳನ್ನು ತಯಾರಿಸುತ್ತಿದೆ ಮತ್ತು ಪ್ಯಾಕಿಂಗ್ ಮಾಡುತ್ತಿದೆ.

ಕೇರಳದ ಕೈಗಾರಿಕಾ ಸಚಿವ ಪಿ.ರಾಜೀವ್ ಅವರು ತಮ್ಮ ಫೇಸ್ ಬುಕ್ ಪೋಸ್ಟ್ ನಲ್ಲಿ ವಿಶ್ವಮಟ್ಟದಲ್ಲಿ ಗುರುತಿಸಿಕೊಂಡಿರುವ ಕಂಪನಿಯೊಂದು ಕೇರಳದಲ್ಲಿದೆ ಎಂದು ಹೇಳಿದ್ದು ಇದೀಗ ಚರ್ಚೆಗೆ ಗ್ರಾಸವಾಗಿದೆ.

https://www.vijayavani.net/biden-says-hamas-attack-aimed-at-disrupting-thaw