ಅತಿಹೆಚ್ಚು ಆನೆಗಳನ್ನು ಬಳಸುವ ಕೇರಳ, ರಾಜಸ್ಥಾನ ಹಾಗೂ ಕರ್ನಾಟಕ ಒಳಗೊಂಡು ದೇಶದಲ್ಲಿ 6 ರೋಬಾಟಿಕ್ ಆನೆಗಳನ್ನು ದೇಣಿಗೆ ರೂಪದಲ್ಲಿ ನೀಡಿರುವ ಪೇಟಾ ಸಂಸ್ಥೆಗೆ ಬಾಲಿವುಡ್ ನಟ-ನಟಿಯರು, ವಿವಿಧ ಕ್ಷೇತ್ರದ ಖ್ಯಾತನಾಮರು ಬೆಂಬಲವಾಗಿ ನಿಂತಿದ್ದಾರೆ. ಕರ್ನಾಟಕದ ಪ್ರಸಿದ್ಧ ಧಾರ್ಮಿಕ ಕ್ಷೇತ್ರ ಎಡೆಯೂರು ಶ್ರೀ ಸಿದ್ಧಲಿಂಗೇಶ್ವರ ದೇವಸ್ಥಾನ ಹಾಗೂ ಬಾಳೆಹೊನ್ನುರು ಶ್ರೀರಂಭಾಪುರಿ ವೀರಸಿಂಹಾಸನ ಮಹಾಪೀಠಕ್ಕೆ ಮ್ಯಾಕ್ಯಾನಿಕಲ್ ಆನೆಯನ್ನು ನೀಡಲಾಗಿದೆ. ಕರ್ನಾಟಕ ಮೂಲದ ಬಾಲಿವುಡ್ ನಟಿ ಶಿಲ್ಪಾ ಶೆಟ್ಟಿ ಈ ಆನೆಯ ಪ್ರಾಯೋಜಕರಾಗಿದ್ದು, ಈ ಆನೆಯು ಕಣ್ಣು ಮಿಟುಕಿಸುವುದು, ಬಾಲ ಮತ್ತು ಕಿವಿಯನ್ನು ಅಲ್ಲಾಡಿಸುವುದು, ಸೊಂಡಿಲು ಎತ್ತುವುದು ಹಾಗೂ ಬ್ಯಾಟರಿ ಚಾಲಿತ ಟ್ರಾಲಿ ಮೂಲಕ ಮುಂದೆ ಸಂಚರಿಸುತ್ತದೆ. ಸಿಲಿಕಾನ್ ಫೈಬರ್ ಮೆಟೀರಿಯಲ್ನಿಂದ ತಯಾರಿಸಲ್ಪಟ್ಟ ಈ ಆನೆ ಸುಮಾರು 800 ಕೆ.ಜಿ. ತೂಕವಿದ್ದು, ಸರಿಯಾದ ನಿರ್ವಹಣೆಯಿಂದ ಬಹುವರ್ಷ ಬಾಳಿಕೆ ಬರಲಿದೆ ಎಂದು ಆನೆಯನ್ನು ನಿರ್ಮಿಸಿರುವ ಮುಂಬೈ ಮೂಲದ ಆಫೀಶ್ ಸಂಸ್ಥೆ ಹೇಳಿಕೊಂಡಿದೆ.
