ಇನ್ನಿಂಗ್ಸ್ ಪೂರ ನನ್ನ ಹೃದಯ ಬಡಿತ ಹೆಚ್ಚಿತ್ತು! ಅದೇ ನನ್ನ ಮೊದಲ ಭಾರತ-ಪಾಕ್ ಪಂದ್ಯ: Virat Kohli

Virat Kohli: ಐಪಿಎಲ್​ ಪ್ಲೇಆಫ್ ಪಂದ್ಯಗಳಿಗೆ ಇನ್ನೇನು ಕೆಲವೇ ದಿನಗಳು ಮಾತ್ರ ಬಾಕಿ ಉಳಿದಿದೆ. ಹೀಗಿರುವಾಗಲೇ ಫ್ರಾಂಚೈಸಿ ನಡೆಸಿದ ಪಾಡ್​ಕಾಸ್ಟ್​ನಲ್ಲಿ ಭಾಗಿಯಾಗಿ ಹಲವು ರೋಚಕ ಸಂಗತಿಗಳನ್ನು ಹಂಚಿಕೊಂಡಿರುವ ಆರ್​ಸಿಬಿ ಮಾಜಿ ಕ್ಯಾಪ್ಟನ್ ವಿರಾಟ್ ಕೊಹ್ಲಿ, ಅಂತಾರಾಷ್ಟ್ರೀಯ ಕ್ರಿಕೆಟ್​ ಕರಿಯರ್​ನಲ್ಲಿ ತಾವು ಎದುರಿಸಿದ ಮೊದಲ ಪಾಕಿಸ್ತಾನ ಪಂದ್ಯ ಮತ್ತು ಆಗಿನ ಪರಿಸ್ಥಿತಿ ಕುರಿತು ತಮ್ಮ ಮನದಾಳದ ಮಾತನ್ನು ಮುಕ್ತವಾಗಿ ಹಂಚಿಕೊಂಡಿದ್ದಾರೆ.

ಇದನ್ನೂ ಓದಿ: ಈಗಲೂ ರಾಜೀನಾಮೆ ನೀಡಲು ಸಿದ್ಧ ! ಯತ್ನಾಳ ಸವಾಲಿಗೆ ಸಚಿವ ಶಿವಾನಂದ ಪಾಟೀಲ ಪ್ರತಿಸವಾಲು

ಅದು 2009ರ ಚಾಂಪಿಯನ್ಸ್ ಟ್ರೋಫಿ ಟೂರ್ನಿ. ಅಂದು ಪಾಕಿಸ್ತಾನ ಮತ್ತು ಭಾರತ ಪಂದ್ಯವಿತ್ತು. ಈ ಪಂದ್ಯದಲ್ಲಿ ಆಡಬೇಕಿದ್ದ ಯುವಿ (ಯುವರಾಜ್ ಸಿಂಗ್​) ತಮ್ಮ ಕೈಗೆ ಪೆಟ್ಟು ಮಾಡಿಕೊಂಡಿದ್ದರು. ಹೀಗಾಗಿ ಅವರ ಜಾಗಕ್ಕೆ ಮ್ಯಾನೇಜ್​ಮೆಂಟ್​ ನನ್ನನ್ನು ಆಡಿಸಲು ಇಚ್ಛಿಸಿತು. ಇದಕ್ಕೂ ಮೊದಲೇ ನೀವು ನಿಮ್ಮ ಸೂಟ್​ಕೇಸ್​ ಮತ್ತು ಪಾಸ್​ಪೋರ್ಟ್​ನ ನಿಮ್ಮಲ್ಲೇ ಇಟ್ಟುಕೊಂಡಿರಿ. ಯಾವಾಗ ಅಗತ್ಯವಿದೆಯೋ ಹೇಳ್ತೀವಿ, ಹೊರಟು ಬನ್ನಿ ಎಂದಿದ್ದರು.

ಮ್ಯಾನೇಜ್​ಮೆಂಟ್​ ಹೇಳಿದಂತೆ ನಾನು ರೆಡಿಯಿದ್ದೆ. ಅವರು ಕರೆ ಮಾಡಿದಾಗ ನಾನು ಬೆಂಗಳೂರಿನಲ್ಲಿದ್ದೆ. ತಕ್ಷಣವೇ ಹೊರಟು ಬನ್ನಿ ಎಂದಾಗ ಹೆಚ್ಚು ಸಮಯ ವ್ಯರ್ಥ ಮಾಡದೆ ತೆರಳಿದೆ. ಅಲ್ಲಿಗೆ ಹೋದ ಬಳಿಕ ನಾನು ಆಡಿದ ಮೊದಲ ಪಂದ್ಯವೇ ಪಾಕಿಸ್ತಾನ ಎದುರು. ಆ ಪಂದ್ಯವೇ ನನ್ನ ಮೊದಲ ಪಾಕಿಸ್ತಾನ-ಭಾರತ ಮ್ಯಾಚ್​. ನನಗೆ ನೆನಪಿರುವ ಪ್ರಕಾರ, ಬಹುಶಃ 16 ರನ್ ಗಳಿಸಿ ಔಟ್ ಆದೆ. ಆ ಪಂದ್ಯದಲ್ಲಿ 16 ರನ್​ ಗಳಿಸಿದ್ದ ನಾನು, ಶಾಹಿದ್ ಅಫ್ರಿದಿ ಅವರ ಬೌಲಿಂಗ್​ನಲ್ಲಿ ಸಿಕ್ಸ್​ ಹೊಡೆಯಲು ಹೋಗಿ ಬೌಂಡರಿ ಲೈನ್ ಕ್ಯಾಚ್ ನೀಡಿದೆ. ಅಂತಿಮವಾಗಿ ನಾವು ಆ ಪಂದ್ಯ ಸೋತೆವು ಎಂದರು.

ಇದನ್ನೂ ಓದಿ: ಜೂನ್ 20 ರೊಳಗಾಗಿ ಡಿಬಿಓಟಿ ನೀರು ಪೂರೈಕೆ  ಕುರಿತು ಥರ್ಡ್ ಪಾರ್ಟಿಯಿಂದ ಸಮೀಕ್ಷೆ ಕೈಗೊಂಡು ವರದಿ ಸಲ್ಲಿಸಲು ಸೂಚನೆ

ಆ ಪಂದ್ಯದ ಕ್ಷಣಗಳು ನನಗೆ ಬಹಳ ಮುಖ್ಯವಾಗಿತ್ತು. ಪಂದ್ಯದ ಪೂರ ನನ್ನ ಹೃದಯ ಬಡಿತ ಜೋರಾಗಿಯೇ ಇತ್ತು. ಪಾಕಿಸ್ತಾನ ಎದುರು ಸೋತ ಬಳಿಕ ಭಾರೀ ಬೇಸರವಾಯ್ತು. ಆ ದಿನ ಬೆಳಗ್ಗಿನ ಜಾವ 5 ಗಂಟೆವರೆಗೂ ನಾನು ನಿದ್ರಿಸದೆ ಗೋಡೆಯ ಸೀಲಿಂಗ್​ನ ನೋಡುತ್ತಲೇ ಕುಳಿತಿದ್ದೆ ಎಂದು ವಿರಾಟ್ ಹೇಳಿದ್ದಾರೆ,(ಏಜೆನ್ಸೀಸ್).

https://www.vijayavani.net/virat-opens-about-leaving-india-rcb-captaincy