ಸಿಎಂ ಕೆಸಿಆರ್​ ಹುಟ್ಟುಹಬ್ಬ: ಯಲ್ಲಮ್ಮ ದೇವಿಗೆ 2.5 ಕೆಜಿ ಚಿನ್ನದ ಸೀರೆ ಕಾಣಿಕೆ ನೀಡಿದ ಸಚಿವ!

ಹೈದರಾಬಾದ್​: ಮುಖ್ಯಮಂತ್ರಿ ಕೆ. ಚಂದ್ರಶೇಖರ್​ ರಾವ್​ ಅವರು ತೆಲಂಗಾಣದಲ್ಲಿ ದೇವಮಾನವ ಸ್ಥಾನವನ್ನು ಹೊಂದಿದ್ದಾರೆ. ತೆಲಂಗಾಣ ರಾಷ್ಟ್ರ ಸಮಿತಿ ಪಕ್ಷವು ಅವರ ಆದೇಶವನ್ನು ಚಾಚೂ ತಪ್ಪದೇ ಪಾಲಿಸುತ್ತಾರೆ. ಸಿಎಂ ಆದಾಗಿನಿಂದ ಅವರ ಕಾರ್ಯಗಳನ್ನು ಜನರು ಸಹ ಮೆಚ್ಚಿಕೊಂಡಿದ್ದು, 2014ರಿಂದಲೂ ಕೆಸಿಆರ್​ ತೆಲಂಗಾಣದ ರಾಜನಾಗೆಯೇ ಉಳಿದಿದ್ದಾರೆ.

ಇನ್ನು ಕೆಸಿಆರ್​ ಹುಟ್ಟುಹಬ್ಬವೆಂದರೆ ಅವರ ಪಕ್ಷದ ಕಾರ್ಯಕರ್ತರಿಗೆ ಮತ್ತು ಸಚಿವರಿಗೆ ಹಬ್ಬವೋ ಹಬ್ಬ. ಅದೇ ರೀತಿ ಕೆಸಿಆರ್​ ಸಹ ಎಲ್ಲರನ್ನು ಪ್ರೀತಿಯಿಂದಲೇ ಕಾಣುತ್ತಾರೆ. ಇಂದು ಅವರ ಹುಟ್ಟುಹಬ್ಬ ಹಿನ್ನೆಲೆಯಲ್ಲಿ ಸಚಿವ ತಲಸನಿ ಶ್ರೀನಿವಾಸ್​ ಯಾದವ್, ಎರಡೂವರೆ ಕೆ.ಜಿ. ಚಿನ್ನದ ಸೀರೆ ಮಾಡಿಸಿ ಯಲ್ಲಮ್ಮ ದೇವತೆಗೆ ಕಾಣಿಕೆಯಾಗಿ ನೀಡುವ ಮೂಲಕ ಅಭಿಮಾನ ಮೆರೆದಿದ್ದಾರೆ. ​

ಇನ್ನು ಕೆಸಿಆರ್​ ಹುಟ್ಟುಹಬ್ಬದಂದು ತೆಲಂಗಾಣದಾದ್ಯಂತ ಇಡೀ ದಿನ ಅನೇಕ ಕಾರ್ಯಕ್ರಮಗಳು ಸಹ ನಡೆದಿವೆ. ಟಿಆರ್​ಎಸ್​ ನಾಯಕರು ರಾಜ್ಯಾದ್ಯಂತ ಕೋಟ್ಯಂತರ ಸಸಿಗಳನ್ನು ನೆಟ್ಟಿದ್ದಾರೆ.

ಇನ್ನು ಯಾದವ್​ ಚಿನ್ನದ ಸೀರೆ ಮಾತ್ರವಲ್ಲದೆ, ಅಮೀರ್​ಪೇಟೆಯಲ್ಲಿರುವ ಗುರುದ್ವಾರ ಸಾಹೇಬ್​ ಮತ್ತು ಸಿಖಂದರಬಾದ್​ನಲ್ಲಿರುವ ಉಜ್ಜೈನಿ ಮಹಾಕಾಳಿ ದೇವಸ್ಥಾನ, ಗಣೇಶ್​ ದೇವಸ್ಥಾನ ಮತ್ತು ವೆಸ್ಲಿ ಚರ್ಚ್​ಗೆ ತೆರಳಿ ಪ್ರಾರ್ಥನೆ ಸಲ್ಲಿಸಿದ್ದಾರೆ. (ಏಜೆನ್ಸೀಸ್​)