ಟಿ-ರೆಕ್ಸ್ ಕಾಲದಲ್ಲೇ ಹಣ್ಣು ತಿಂದು ಬದಕುತ್ತಿದ್ದ ಡೈನೋಸಾರ್​ಗಳು: ವಿಜ್ಞಾನಿಗಳನ್ನೇ ಅಚ್ಚರಿಗೊಳಿಸಿದ ಹೊಸ ಪತ್ತೆ! Dinosaur

Dinosaur : ಡೈನೋಸಾರ್ ಎಂದ ತಕ್ಷಣ ನಮ್ಮ ಕಣ್ಣ ಮುಂದೆ ಬರುವುದು ಬೃಹತ್ ದೇಹ, ಹರಿತವಾದ ಹಲ್ಲುಗಳು, ಬೇಟೆಯಾಡುವ ಭಯಾನಕ ಜೀವಿಗಳು. ಅದರಲ್ಲೂ ಟಿ-ರೆಕ್ಸ್‌ನಂತಹ ಡೈನೋಸಾರ್‌ಗಳು ಮಾಂಸಕ್ಕಾಗಿ ಇತರ ಜೀವಿಗಳನ್ನು ಬೇಟೆಯಾಡುತ್ತಿದ್ದ ದೃಶ್ಯ ನೆನಪಾಗುತ್ತದೆ. ಆದರೆ 6.6 ಕೋಟಿ ವರ್ಷಗಳ ಹಿಂದೆ ಇದೇ ಡೈನೋಸಾರ್‌ಗಳ ಜಗತ್ತಿನಲ್ಲಿ ಹಣ್ಣುಗಳನ್ನು ತಿಂದು ಬದುಕುತ್ತಿದ್ದ ಜೀವಿಯೂ ಇತ್ತು ಎಂದರೆ ನಂಬುತ್ತೀರಾ? ವಿಜ್ಞಾನಿಗಳು ಇಂತಹದ್ದೊಂದು ಅಪರೂಪದ ಡೈನೋಸಾರ್ ಪ್ರಭೇದವನ್ನು ಗುರುತಿಸಿದ್ದು, ಅದಕ್ಕೆ 'ಹೆಲ್ ಚಿಕನ್' ಎಂಬ ವಿಚಿತ್ರ ಹೆಸರನ್ನೂ ಇಟ್ಟಿದ್ದಾರೆ.

ಏನಿದು ಹೆಲ್ ಚಿಕನ್ ಡೈನೋಸಾರ್?

ವಿಜ್ಞಾನಿಗಳು ಈ ಹೊಸ ಪ್ರಭೇದಕ್ಕೆ ಇನ್‌ಫರ್ನೊಗ್ಯಾಲಸ್ ಜೇಮ್ಸಿ ಎಂದು ಹೆಸರಿಟ್ಟಿದ್ದಾರೆ. ಇದರ ಜಾತಿಯ ಹೆಸರಿನ ಅರ್ಥ 'ಹೆಲ್ ಚಿಕನ್' ಅಂದರೆ ನರಕದ ಕೋಳಿ ಎಂದಾಗಿದೆ. ಅಮೆರಿಕದ ಹೆಲ್ ಕ್ರೀಕ್ ರಚನೆ ಎಂಬ ಪ್ರದೇಶದಲ್ಲಿ ಇದರ ಪಳೆಯುಳಿಕೆ ಪತ್ತೆಯಾದ ಹಿನ್ನೆಲೆಯಲ್ಲಿ ಈ ಹೆಸರು ಬಂದಿದೆ. ಈ ಪ್ರದೇಶವು ಇಂದಿನ ಮೊಂಟಾನಾ, ನಾರ್ತ್ ಡಕೋಟಾ, ಸೌತ್ ಡಕೋಟಾ ಮತ್ತು ವ್ಯೋಮಿಂಗ್ ರಾಜ್ಯಗಳ ವ್ಯಾಪ್ತಿಯಲ್ಲಿ ಹರಡಿಕೊಂಡಿದೆ. ಸುಮಾರು 6.6 ಕೋಟಿ ವರ್ಷಗಳ ಹಿಂದೆ ಈ ಭಾಗವು ಉಪೋಷ್ಣವಲಯದ ಕರಾವಳಿ ಪ್ರದೇಶವಾಗಿತ್ತು. ಅಂದು ಈ ಜೀವಿ ಟ್ರೈಸೆರಾಟಾಪ್ಸ್, ಆಂಕೈಲೋಸಾರಸ್ ಮತ್ತು ಟೈರನೋಸಾರಸ್ ರೆಕ್ಸ್‌ನಂತಹ ಡೈನೋಸಾರ್‌ಗಳೊಂದಿಗೆ ವಾಸಿಸುತ್ತಿತ್ತು.

ಮಾಂಸಾಹಾರಿ ಗುಂಪಿನಲ್ಲಿದ್ದರೂ ಹಣ್ಣುಗಳೇ ಆಹಾರ

ಈ ಡೈನೋಸಾರ್ ಸುಮಾರು ಐದು ಅಡಿ ಉದ್ದವಿದ್ದು, ಅಂದಾಜು 25 ಪೌಂಡ್ ತೂಕ ಹೊಂದಿತ್ತು. ಅಂದರೆ ಸುಮಾರು 11 ಕೆ.ಜಿ. ತೂಕವಿತ್ತು. ಇದು ಥೆರೋಪಾಡ್ ಎಂಬ ಡೈನೋಸಾರ್ ಗುಂಪಿಗೆ ಸೇರಿತ್ತು. ಈ ಗುಂಪಿನಲ್ಲಿ ಸಾಮಾನ್ಯವಾಗಿ ಮಾಂಸಾಹಾರಿ ಡೈನೋಸಾರ್‌ಗಳೇ ಹೆಚ್ಚಾಗಿದ್ದವು. ಆದರೆ ಇನ್‌ಫರ್ನೊಗ್ಯಾಲಸ್ ಮಾತ್ರ ಮುಖ್ಯವಾಗಿ ಹಣ್ಣುಗಳನ್ನು ತಿಂದು ಬದುಕುತ್ತಿತ್ತು ಎಂಬುದು ಸಂಶೋಧಕರಿಗೆ ಅಚ್ಚರಿ ಮೂಡಿಸಿದೆ.

ಇದನ್ನೂ ಓದಿ: ಡೈನೋಸಾರ್‌ಗಳ ದೇಹದ ಉಷ್ಣತೆ ಮನುಷ್ಯರಷ್ಟೇ ಇತ್ತೇ? ವಿಜ್ಞಾನಿಗಳ ಸಂಶೋಧನೆಯಲ್ಲಿ ರೋಚಕ ಸಂಗತಿ ಬಯಲು! Tyrannosaurus

ಇದರ ಬಾಯಿಯ ರಚನೆಯನ್ನು ಅಧ್ಯಯನ ಮಾಡಿದ ವಿಜ್ಞಾನಿಗಳು ಹಣ್ಣುಗಳನ್ನು ತಿನ್ನಲು ಅನುಕೂಲವಾಗುವಂತಹ ವಿಶೇಷ ಲಕ್ಷಣಗಳನ್ನು ಗುರುತಿಸಿದ್ದಾರೆ. ಇದರ ದವಡೆಯ ಸ್ನಾಯುಗಳು ಅಗಿಯುವಾಗ ದವಡೆಯನ್ನು ಹಿಂದಕ್ಕೆ ಮತ್ತು ಮುಂದಕ್ಕೆ ಚಲಿಸಲು ನೆರವಾಗುತ್ತಿದ್ದವು. ಕೊಕ್ಕಿನಂತಹ ಬಾಯಿಯ ಭಾಗದಲ್ಲಿದ್ದ ಏರಿಳಿತಗಳು ಮತ್ತು ತೋಡುಗಳು ಹಣ್ಣುಗಳನ್ನು ಕತ್ತರಿಸಲು ಹಾಗೂ ಪುಡಿಮಾಡಲು ಸಹಾಯ ಮಾಡುತ್ತಿದ್ದವು. ಇದರ ಮೂಲಕ ಹಣ್ಣಿನ ಮೃದು ಭಾಗವನ್ನು ಬೀಜಗಳಿಂದ ಬೇರ್ಪಡಿಸಿ ತಿನ್ನಲು ಸಾಧ್ಯವಾಗುತ್ತಿತ್ತು ಎಂದು ಸಂಶೋಧಕರು ಅಭಿಪ್ರಾಯಪಟ್ಟಿದ್ದಾರೆ. ಆಮೆಗಳು ಮತ್ತು ಗಿಳಿಗಳಲ್ಲಿ ಪ್ರತ್ಯೇಕವಾಗಿ ಕಂಡುಬರುವ ಕೆಲವು ಲಕ್ಷಣಗಳು ಈ ಡೈನೋಸಾರ್‌ನಲ್ಲಿ ಒಟ್ಟಿಗೆ ಕಂಡುಬಂದಿರುವುದು ಮತ್ತೊಂದು ವಿಶೇಷ.

ಹಣ್ಣುಗಳ ಬೆಳವಣಿಗೆಗೂ ಡೈನೋಸಾರಗಳೇ ಕಾರಣ ?

ಈ ಸಂಶೋಧನೆಯ ಮತ್ತೊಂದು ಪ್ರಮುಖ ಅಂಶವೆಂದರೆ ಹೂಬಿಡುವ ಸಸ್ಯಗಳ ವಿಕಾಸಕ್ಕೂ ಡೈನೋಸಾರ್‌ಗಳಿಗೂ ಇದ್ದ ಸಂಬಂಧ. ಸುಮಾರು 13 ರಿಂದ 14 ಕೋಟಿ ವರ್ಷಗಳ ಹಿಂದೆ ಕ್ರಿಟೇಷಿಯಸ್ ಯುಗದಲ್ಲಿ ಹೂಬಿಡುವ ಸಸ್ಯಗಳು ಕಾಣಿಸಿಕೊಳ್ಳಲು ಆರಂಭಿಸಿದ್ದವು. ಕಾಲಕ್ರಮೇಣ ಅವುಗಳ ವೈವಿಧ್ಯ ಮತ್ತು ಹರಡುವಿಕೆ ಹೆಚ್ಚಾಯಿತು. ಹಣ್ಣುಗಳು ಹೆಚ್ಚು ಸಾಮಾನ್ಯವಾಗುತ್ತಿದ್ದಂತೆ ಅವುಗಳನ್ನು ತಿನ್ನಲು ಅನುಕೂಲವಾಗುವಂತಹ ವಿಶೇಷ ಬಾಯಿಯ ರಚನೆಯನ್ನು ಇನ್‌ಫರ್ನೊಗ್ಯಾಲಸ್ ಬೆಳೆಸಿಕೊಂಡಿರಬಹುದು ಎಂದು ವಿಜ್ಞಾನಿಗಳು ಅಂದಾಜಿಸಿದ್ದಾರೆ.

ಈ ಡೈನೋಸಾರ್ ಯಾವ ನಿರ್ದಿಷ್ಟ ಹಣ್ಣುಗಳನ್ನು ತಿನ್ನುತ್ತಿತ್ತು ಎಂಬುದು ಇನ್ನೂ ಸ್ಪಷ್ಟವಾಗಿಲ್ಲ. ಆದರೆ ವಿವಿಧ ಬಗೆಯ ಸಣ್ಣ ಹಣ್ಣುಗಳು ಹಾಗೂ ಪೀಚ್ ಮತ್ತು ಆಲಿವ್‌ನಂತಹ ಬೀಜದ ಒಳಭಾಗ ಗಟ್ಟಿಯಾಗಿರುವ ಹಣ್ಣುಗಳನ್ನು ಹೋಲುವ ಹಣ್ಣುಗಳು ಇದರ ಆಹಾರವಾಗಿದ್ದಿರಬಹುದು ಎಂದು ಸಂಶೋಧಕರು ಊಹಿಸಿದ್ದಾರೆ.

ಸಸ್ಯಗಳ ಬೀಜ ಹರಡುವುದಕ್ಕೂ ನೆರವಾಗಿತ್ತೇ?

ಹಣ್ಣುಗಳನ್ನು ತಿನ್ನುವ ಪ್ರಾಣಿಗಳು ಬೀಜಗಳನ್ನು ಬೇರೆ ಪ್ರದೇಶಗಳಿಗೆ ಹರಡುವಲ್ಲಿ ಪ್ರಮುಖ ಪಾತ್ರ ವಹಿಸುತ್ತವೆ. ಇದೇ ರೀತಿಯಲ್ಲಿ ಇನ್‌ಫರ್ನೊಗ್ಯಾಲಸ್ ಕೂಡ ಹಣ್ಣುಗಳನ್ನು ತಿಂದು ಅವುಗಳ ಬೀಜಗಳನ್ನು ಬೇರೆಡೆಗೆ ಹರಡಲು ನೆರವಾಗಿರಬಹುದು ಎಂದು ವಿಜ್ಞಾನಿಗಳು ಅಭಿಪ್ರಾಯಪಟ್ಟಿದ್ದಾರೆ. ಹೀಗಾಗಿ ಡೈನೋಸಾರ್‌ಗಳು ಕೇವಲ ಬೇಟೆಯಾಡುವ ಜೀವಿಗಳಾಗಿರದೆ, ಸಸ್ಯಗಳ ಬೆಳವಣಿಗೆ ಮತ್ತು ಪರಿಸರ ವ್ಯವಸ್ಥೆಯಲ್ಲಿಯೂ ಪಾತ್ರ ವಹಿಸಿದ್ದಿರಬಹುದು ಎಂಬ ಹೊಸ ದೃಷ್ಟಿಕೋನ ಈ ಸಂಶೋಧನೆಯಿಂದ ದೊರೆತಿದೆ.

ಇದರ ದೇಹದ ಮೇಲೆ ಇಂದಿನ ಪಕ್ಷಿಗಳಂತೆ ಗರಿಗಳೂ ಇದ್ದಿರಬಹುದು ಎಂದು ಸಂಶೋಧಕರು ಅಂದಾಜಿಸಿದ್ದಾರೆ. ಈ ಕುರಿತ ಹೆಚ್ಚಿನ ವಿವರಗಳು ಇನ್ನೂ ಅಧ್ಯಯನದ ಹಂತದಲ್ಲಿವೆ.ಡೈನೋಸಾರ್‌ಗಳ ಜಗತ್ತಿನಲ್ಲಿ ಎಲ್ಲ ಜೀವಿಗಳೂ ಮಾಂಸಾಹಾರಿಗಳಾಗಿರಲಿಲ್ಲ ಎಂಬುದಕ್ಕೆ ಹೆಲ್ ಚಿಕನ್ ಹೊಸ ಸಾಕ್ಷಿಯಾಗಿದೆ. ಭಯಾನಕ ಡೈನೋಸಾರ್‌ಗಳ ನಡುವೆ ಹಣ್ಣುಗಳನ್ನು ತಿಂದು ಬದುಕಿದ್ದ ಈ ಪುಟ್ಟ ಜೀವಿ, ಕೋಟ್ಯಂತರ ವರ್ಷಗಳ ಹಿಂದಿನ ಭೂಮಿಯ ಪರಿಸರ ವ್ಯವಸ್ಥೆಯ ಬಗ್ಗೆ ವಿಜ್ಞಾನಿಗಳಿಗೆ ಹೊಸ ಪ್ರಶ್ನೆಗಳನ್ನು ಹುಟ್ಟಿಸಿದೆ, (ಏಜೆನ್ಸೀಸ್​).