ಇನ್ಮುಂದೆ ಇನ್​ಸ್ಟಾಗ್ರಾಂನಲ್ಲಿ ಕೇವಲ 5 ಹ್ಯಾಷ್​ಟ್ಯಾಗ್​ಗಳಿಗೆ ಮಾತ್ರ ಅವಕಾಶ! ಅಚ್ಚರಿಯ ಕಾರಣ ಹೀಗಿದೆ...Instagram

Instagram : ಶುಕ್ರವಾರ (ಡಿ.19) ಮೆಟಾ ಮಾಲೀಕತ್ವದ ಸಾಮಾಜಿಕ ಮಾಧ್ಯಮ ಕಂಪನಿ ಇನ್‌ಸ್ಟಾಗ್ರಾಮ್ ಈದೀಗ ಒಂದು ದೊಡ್ಡ ಬದಲಾವಣೆಯನ್ನು ಘೋಷಿಸಿದ್ದು, ಇನ್ನು ಮುಂದೆ ಇನ್ಟಾಗ್ರಾಮ್​ನಲ್ಲಿ ಕೇವಲ 5 ಹ್ಯಾಷ್​ಟ್ಯಾಗ್​ಗಳನ್ನು ಮಾತ್ರ ಬಳಸಲು ಅವಕಾಶವನ್ನು ನೀಡಲಿದೆ ಎಂದು ತಿಳಿಸಿದೆ. ಇದು ಕಂಟೆಂಟ್​ ಕ್ರಿಯೇಟರ್ಸಗಳ ಮೇಲೆ ನೇರ ಪರಿಣಾಮ ಬೀರಲಿದೆ ಎಂದು ಹೇಳಲಾಗುತ್ತಿದೆ. 30 ಹ್ಯಾಶ್‌ಟ್ಯಾಗ್‌ಗಳ ಬಳಕೆಗಿದ್ದ ಅನುಮತಿ ಈಗ 5 ಕ್ಕೆ ಇಳಿದಿದ್ದು, ಕಡಿಮೆ ಮತ್ತು ಹೆಚ್ಚು ಸಂಮಂಜಸ ಹ್ಯಾಶ್‌ಟ್ಯಾಗ್‌ಗಳು ಬಳಕೆದಾರರ ಅನುಭವವನ್ನು ಸುಧಾರಿಸಲು ಸಹಾಯ ಮಾಡುತ್ತದೆ ಎಂದು ಕಂಪನಿ ಹೇಳಿದೆ. ಈ ನವೀಕರಣವು ಮುಖ್ಯವಾಗಿ ಹ್ಯಾಶ್‌ಟ್ಯಾಗ್ ದುರುಪಯೋಗ ಮತ್ತು ಸ್ಪ್ಯಾಮ್​ನ್ನು ನಿಲ್ಲಿಸುವ ಗುರಿಯನ್ನು ಹೊಂದಿದೆ ಮತ್ತು ಕಂಟೆಂಟ್​ ಕ್ರಿಯೇಟರ್ಸಗಳ ಗುಣಮಟ್ಟ ಮತ್ತು ಪ್ರಸ್ತುತತೆಯ ಮೇಲೆ ತಮ್ಮ ಗಮನವನ್ನು ಕೇಂದ್ರೀಕರಿಸಲು ಸಹಾಯ ಮಾಡುತ್ತದೆ ಎಂದು ಸ್ಪಷ್ಟಣೆ ನೀಡಿದೆ.

ಇನ್‌ಸ್ಟಾಗ್ರಾಮ್ ಹ್ಯಾಶ್‌ಟ್ಯಾಗ್ ಮಿತಿಯನ್ನು ಅಧಿಕೃತವಾಗಿ ಕಡಿಮೆ ಮಾಡಲಾಗಿದೆ. ಈ ಹಿಂದೆ, ಬಳಕೆದಾರರು ಒಂದೇ ಪೋಸ್ಟ್ ಅಥವಾ ರೀಲ್‌ಗಳಲ್ಲಿ 30 ಹ್ಯಾಶ್‌ಟ್ಯಾಗ್‌ಗಳನ್ನು ಬಳಸಬಹುದಿತ್ತು. ಈಗ, ಇನ್‌ಸ್ಟಾಗ್ರಾಮ್ ಪ್ರತಿ ಪೋಸ್ಟ್‌ಗೆ ಐದು ಹ್ಯಾಶ್‌ಟ್ಯಾಗ್‌ಗಳನ್ನು ಮಾತ್ರ ಅನುಮತಿಸುತ್ತದೆ. ಅನೇಕ ಸಾಮಾನ್ಯ ಹ್ಯಾಶ್‌ಟ್ಯಾಗ್​ಗಳನ್ನು ಬಳುಸುವ ಬದಲು ಕಡಿಮೆ ಆದರೆ ಉದ್ದೇಶಿತ ಹ್ಯಾಶ್‌ಟ್ಯಾಗ್​ಗಳನ್ನು ಬಳಸುವುದರಿಂದ ವಿಷಯದ ಕಾರ್ಯಕ್ಷಮತೆಯ ಸುಧಾರಣೆಗೆ ಸಹಾಯ ಮಾಡುತ್ತದೆ ಎಂದು ಇನ್‌ಸ್ಟಾಗ್ರಾಮ್ ಹೇಳುತ್ತದೆ. ಹ್ಯಾಶ್‌ಟ್ಯಾಗ್‌ಗಳನ್ನು 2011 ರಲ್ಲಿ ಇನ್‌ಸ್ಟಾಗ್ರಾಮ್​ನಲ್ಲಿ ಪರಿಚಯಿಸಲಾಯಿತು ಮತ್ತು ಅಂದಿನಿಂದ ವಿಷಯಗಳನ್ನು  ಅನ್ವೇಷಿಸಲು ಇದನ್ನು ಬಳಸಲಾಗುತ್ತಿದೆ.ವಿಷಯ ಆಧಾರಿತ ಹುಡುಕಾಟಗಳು, ಟ್ರೆಂಡಿಂಗ್ ವಿಭಾಗಗಳು ಮತ್ತು ಅಲ್ಗಾರಿದಮ್ ಆಧಾರಿತ ಶಿಫಾರಸುಗಳಲ್ಲಿ ಪೋಸ್ಟ್‌ಗಳು ಕಾಣಿಸಿಕೊಳ್ಳಲು ಹ್ಯಾಶ್‌ಟ್ಯಾಗ್​ಗಳು ಸಹಾಯ ಮಾಡುತ್ತವೆ. 

#reels ಅಥವಾ #explore ನಂತಹ ಜೆನೆರಿಕ್ ಹ್ಯಾಶ್‌ಟ್ಯಾಗ್‌ಗಳು ವಿಷಯವನ್ನು ಅನ್ವೇಷಿಸಲು ಸಹಾಯ ಮಾಡುವುದಿಲ್ಲ ಎಂದು ಇನ್‌ಸ್ಟಾಗ್ರಾಮ್ ಸ್ಪಷ್ಟಪಡಿಸಿದೆ. ವಾಸ್ತವವಾಗಿ, ಈ ಹ್ಯಾಶ್‌ಟ್ಯಾಗ್‌ಗಳು ಎಕ್ಸ್‌ಪ್ಲೋರ್ ಪುಟ ಅಥವಾ ಇತರ ಅನ್ವೇಷಣೆ ವಿಭಾಗಗಳಲ್ಲಿ ಪೋಸ್ಟ್‌ಗಳು ಕಾಣಿಸಿಕೊಳ್ಳಲು ಸಹಾಯ ಮಾಡುವುದಿಲ್ಲ ಎಂದು ವೇದಿಕೆ ಹೇಳಿದೆ. ಇನ್‌ಸ್ಟಾಗ್ರಾಮ್  ಪ್ರಕಾರ, ಅಂತಹ  ಸಾಮಾನ್ಯವಾಗಿ ಬಳಸುವ ಹ್ಯಾಶ್‌ಟ್ಯಾಗ್‌ಗಳನ್ನು ಬಳಸುವುದರಿಂದ ಪೋಸ್ಟ್‌ನ ಕಾರ್ಯಕ್ಷಮತೆಗೆ ಹಾನಿಯಾಗಬಹುದು. ಅದಕ್ಕಾಗಿಯೇ ಈಗ ಪ್ರಮಾಣಕ್ಕಿಂತ ಪ್ರಸ್ತುತತೆಯ ಮೇಲೆ ಗಮನವನ್ನು ಕೇಂದ್ರೀಕರಿಸಿ ಎಂದಿದೆ.(ಏಜನ್ಸೀಸ್).