ದೀರ್ಘಕಾಲೀನ ಸಮಸ್ಯೆ ನಿವಾರಣೆಗೆ ಪ್ರಥಮ ಆದ್ಯತೆ...

ಉಡುಪಿ ಜಿಲ್ಲಾ ನೂತನ ಡಿಸಿ ಸ್ವರೂಪಾ ಭರವಸೆ

ಕಾನೂನು ಚೌಕಟ್ಟಿನಲ್ಲಿ ಅಭಿವೃದ್ಧಿಗೆ ಪ್ರಯತ್ನ

ವಿಜಯವಾಣಿ ಸುದ್ದಿಜಾಲ ಉಡುಪಿ

ಆಡಳಿತಾತ್ಮಕ ಕೆಲಸ ಎಲ್ಲ ಇಲಾಖೆಯಲ್ಲೂ ಇರುತ್ತದೆ. ಆದರೆ, ಜಿಲ್ಲಾಧಿಕಾರಿ ಹುದ್ದೆ ಸವಾಲಿನಿಂದ ಕೂಡಿರುತ್ತದೆ. ಡಿಸಿಯ ಕರ್ತವ್ಯದಲ್ಲಿ ಹಲವಾರು ದೃಷ್ಟಿಕೋನ ಸೇರಿಕೊಂಡಿರುತ್ತದೆ. 'ಬುದ್ಧಿವಂತರ ಜಿಲ್ಲೆ' ಎಂಬ ಖ್ಯಾತಿ ಹೊಂದಿರುವ ಉಡುಪಿ ಜಿಲ್ಲೆಯಲ್ಲಿರುವ ದೀರ್ಘಕಾಲೀನ ಸಮಸ್ಯೆಗಳ ನಿವಾರಣೆಗೆ ಪ್ರಥಮ ಆದ್ಯತೆ ನೀಡುವುದಾಗಿ ನೂತನ ಜಿಲ್ಲಾಧಿಕಾರಿ ಸ್ವರೂಪಾ ಟಿ.ಕೆ. ಭರವಸೆ ನೀಡಿದರು.

ಉಡುಪಿಯ ಜಿಲ್ಲಾಧಿಕಾರಿ ಕಚೇರಿಯಲ್ಲಿ ಜೂನ್ 19ರಂದು ಸುದ್ದಿಗೋಷ್ಠಿಯಲ್ಲಿ ಮಾತನಾಡಿ, ಜಿಲ್ಲೆಯ ಸರ್ವತೋಮುಖ ಅಭಿವೃದ್ಧಿಗೆ ಎಲ್ಲ ಇಲಾಖಾ ಅಧಿಕಾರಿಗಳು, ಸಾರ್ವಜನಿಕರು ಹಾಗೂ ಮಾಧ್ಯಮದವರ ಸಹಕಾರ ಅಗತ್ಯ ಎಂದರು.

ಅಭಿವೃದ್ಧಿಗೆ ಪ್ರಯತ್ನ

ಈಗಷ್ಟೇ ಆಡಳಿತ ಆರಂಭಿಸಿದ್ದರಿಂದ ಜಿಲ್ಲೆಯ ಸಮಸ್ತ ಚಿತ್ರಣ ತಿಳಿದುಕೊಳ್ಳಬೇಕಿದೆ. ಮರಳು ಮಾಫಿಯಾ ಸೇರಿದಂತೆ ಎಲ್ಲ ಪ್ರಕಾರದ ಅಕ್ರಮ ಚಟುವಟಿಕೆಗಳ ಮಾಹಿತಿ ಸಂಗ್ರಹಿಸಿ ಕಾನೂನು ಚೌಕಟ್ಟಿನಲ್ಲಿ ಎಲ್ಲವನ್ನೂ ನಿಭಾಯಿಸಲಾಗುವುದು. ಬುಡಕಟ್ಟು ಜನರ ಸಮಸ್ಯೆ, ಕಡಲ್ಕೊರೆತಕ್ಕೆ ಶಾಶ್ವತ ಪರಿಹಾರ, ಮನೆ ನಿರ್ಮಾಣದ 9/11 ಫಾರ್ಮ್ ಸಮಸ್ಯೆ, ಜಿಲ್ಲಾ ಆಸ್ಪತ್ರೆ ಸೇರಿದಂತೆ ಜಿಲ್ಲೆಯ ಎಲ್ಲ ಆಸ್ಪತ್ರೆಗಳಲ್ಲಿನ ಸಮಸ್ಯೆ ನಿವಾರಿಸಿ ಜನಸಾಮಾನ್ಯರಿಗೆ ಅನುಕೂಲ ಆಗುವಂತಹ ಎಲ್ಲ ಅಭಿವೃದ್ಧಿ ಮಾಡಲು ಪ್ರಯತ್ನಿಸುತ್ತೇನೆ ಎಂದರು.

ಟೆಕ್ಸ್​ಟೈಲ್​ ಇಂಜಿನಿಯರಿಂಗ್​ ವಿದ್ಯಾಭ್ಯಾಸ

ಹೊಸ ಡಿಸಿಗೂ ರಜೆಯ ಬೇಡಿಕೆ!

ಮಳೆಗಾಲದಲ್ಲಿ ಪ್ರಕೃತಿ ವಿಕೋಪದಿಂದಾಗಿ ಶಾಲಾ ಮಕ್ಕಳಿಗೆ ಜೀವಾಪಾಯ ಆಗಬಾರದೆಂದು ಹಿಂದಿನ ಜಿಲ್ಲಾಧಿಕಾರಿ ಡಾ. ಕೆ.ವಿದ್ಯಾಕುಮಾರಿ ಅವರು ಶಾಲೆಗೆ ರಜಾ ನೀಡುವ ಮೂಲಕ ಪಾಲಕರು ಹಾಗೂ ಮಕ್ಕಳಿಗೆ ನೆಚ್ಚಿನ ಅಧಿಕಾರಿಯಾಗಿದ್ದರು. ಇದೀಗ ಜೂ.17ರಂದು ರಾತ್ರಿ ಉಡುಪಿ ಜಿಲ್ಲಾಧಿಕಾರಿಯಾಗಿ ಪದೋನ್ನತಿ ಹೊಂದುತ್ತಿದ್ದಂತೆಯೇ ಸ್ವರೂಪಾ ಅವರ ಇನ್​ಸ್ಟಾಗ್ರಾಂಗೆ, 'ಮೇಡಂ, ಉಡುಪಿ ಜಿಲೆಯಲ್ಲಿ ಭಾರಿ ಬಿರುಗಾಳಿ ಸಹಿತ ಮಳೆಯಾಗುತ್ತಿದೆ. ಮನೆಯಿಂದ ಹೊರ ಬರಲೂ ಆಗುತ್ತಿಲ್ಲ. ಶಾಲೆಗಳಿಗೆ ರಜೆ ನೀಡಿ' ಎಂದು ಸಂದೇಶ ಬಂದಿದ್ದಾಗಿ ನೂತನ ಡಿಸಿ ತಿಳಿಸಿದರು.