ನಾರ್ವೆ: ಬೇಹುಗಾರಿಕೆ ಉದ್ದೇಶಗಳಿಗಾಗಿ ರಷ್ಯಾದಿಂದ ತರಬೇತಿ ಪಡೆದಿದ್ದ ತಿಮಿಂಗಿಲ ಇದೀಗ ನಾರ್ವೆ ಕರಾವಳಿಯಲ್ಲಿ ನಿಗೂಢವಾಗಿ ಮೃತಪಟ್ಟಿದೆ. ಇಡೀ ಜಗತ್ತಿನ ಗಮನ ಸೆಳೆದಿದ್ದ ರಷ್ಯನ್ ಸ್ಪೈ ತಿಮಿಂಗಿಲ ಎಂದೆ ಫೇಮಸ್ ಆಗಿದ್ದ ಹ್ವಾಲ್ಡಿಮಿರ್ (Hvaldimir) ತಿಮಿಂಗಿಲದ ಮೃತದೇಹವು ದಕ್ಷಿಣ ನಾರ್ವೆಯ ರಿಜವಿಕಾ ಕೊಲ್ಲಿಯಲ್ಲಿ ನೀರಿನ ಮೇಲೆ ಪತ್ತೆಯಾಗಿದೆ. ಕ್ರೇನ್ ಸಹಾಯದಿಂದ ತಿಮಿಂಗಿಲ ದೇಹವನ್ನು ಹೊರಕ್ಕೆ ತೆಗೆಯಲಾಗಿದೆ ಅಂತ ಸ್ಥಳೀಯ ಮಾಧ್ಯಮಗಳು ವರದಿ ಮಾಡಿವೆ.
ಇದನ್ನು ಓದಿ: ಅತ್ಯಾಚಾರದಂತಹ ಸೂಕ್ಷ್ಮ ವಿಚಾರವನ್ನು ರಾಜಕೀಯಗೊಳಿಸಲಾಗುತ್ತಿದೆ; ಸಚಿವ ಕಿರಣ್ ರಿಜಿಜು
ವರದಿಗಳ ಪ್ರಕಾರ ರಷ್ಯಾದ ಈ ಗೂಢಚಾರಿ ತಿಮಿಂಗಿಲದ ದೇಹದಲ್ಲಿ ಕ್ಯಾಮೆರಾಗಳು ಮತ್ತು ಇನ್ನಿತರ ಉಪಕರಣಗಳನ್ನು ಅಳವಡಿಸಲಾಗಿದೆ. ಆ ಮೂಲಕ ಯಾವುದೇ ಪ್ರದೇಶದ ಫೋಟೋಗಳು ಮತ್ತು ವಿಡಿಯೋಗಳನ್ನು ತೆಗೆಯಬಹುದು. ಅಲ್ಲದೆ ಈ ತಿಮಿಂಗಿಲದಿಂದ ಸಮುದ್ರದ ಆಳದಲ್ಲಿ ನಡೆಯುವ ಘಟನೆಗಳ ಚಲನವಲನವನ್ನು ಸಹ ಸೆರೆ ಹಿಡಿಯಲಾಗುತ್ತಿದೆ ಎಂಬ ಆರೋಪಗಳಿವೆ.
ಈ ತಿಮಿಂಗಿಲ 14 ಅಡಿ ಉದ್ದ ಹಾಗೂ 2 ಸಾವಿರದ 700 ಪೌಂಡ್ ತೂಕವಿದೆ ಎಂದು ಹೇಳಲಾಗುತ್ತಿದೆ. ಇದು ರಷ್ಯನ್ ಸ್ಪೈ ತಿಮಿಂಗಲ ಅಂತಾನೇ ನಂಬಿದ್ದ ಹಲವು ರಾಷ್ಟ್ರಗಳು ಇದಕ್ಕೆ ರಷ್ಯಾ ಅಧ್ಯಕ್ಷ ವ್ಲಾಡಿಮಿರ್ ಪುಟಿನ್ ಹೆಸರು ಸೇರಿಸಿ ಹ್ವಾಲ್ಡಿಮಿರ್ (Hvaldimir) ಅಂತ ಹೆಸರಿಟ್ಟಿದ್ದಾರೆ. ಈ ಹಿಂದೆ ಓಸ್ಲೋ ಕರಾವಳಿಯ ಕೆಲ ಫೋಟೋಗಳು ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗಿದ್ದವು. ಅದೇ ಸಮಯದಲ್ಲಿ ಕೊನೆಯ ಬಾರಿಗೆ ಹ್ವಾಲ್ಡಿಮಿರ್ ತಿಮಿಂಗಿಲ ಓಸ್ಲೋ ಫ್ಜೋರ್ಡ್ನ ಜನನಿಬಿಡ ಪ್ರದೇಶದಲ್ಲಿ ಕಾಣಿಸಿಕೊಂಡಿತ್ತು ಎನ್ನಲಾಗಿದೆ.
ರಷ್ಯಾ ಅಧ್ಯಕ್ಷ ವ್ಲಾಡಿಮಿರ್ ಪುಟಿನ್ ಅವ್ರಿಗೆ ತುಂಬಾನೇ ಪ್ರೀತಿಪಾತ್ರವಾಗಿದ್ದ ಹ್ವಾಲ್ಡಿಮಿರ್ ಹೆಸರಿನ ಈ ತಿಮಿಂಗಿಲ ಸಾಧಾರಣ ಜಲಚರವಲ್ಲ. ಅನುಮಾನಾಸ್ಪದವಾಗಿ ಮೃತಪಟ್ಟಿರುವ ಹ್ವಾಲ್ಡಿಮಿರ್ ತಿಮಿಂಗಿಲ ಮನುಷ್ಯರ ಜತೆ ತುಂಬಾ ಆತ್ಮೀಯವಾಗಿ ವರ್ತಿಸುತ್ತಿತ್ತು. 2019ರಲ್ಲಿ ಸೆಂಟ್ ಪೀಟರ್ಸ್ಬರ್ಗ್ ಸಲಕರಣೆ ಎಂಬ ಲೆಬಲ್ನೊಂದಿಗೆ ಹ್ವಾಲ್ಡಿಮಿರ್ ಹೆಸರಿನ ತಿಮಿಂಗಿಲ ಮೊದಲ ಬಾರಿ ನಾರ್ವೆಯಲ್ಲಿ ಪತ್ತೆಯಾಗಿತ್ತು.
ಪ್ರಾಣಿಗಳನ್ನು ಗೂಢಚಾರರನ್ನಾಗಿ ಮಾಡುವ ರಷ್ಯಾದ ಯೋಜನೆಯ ಭಾಗವಾಗಿ ಹ್ವಾಲ್ಡಿಮಿರ್ ತಿಮಿಂಗಿಲ ರಷ್ಯಾದ ಸ್ಪೈ ಆಗಿ ಕಾರ್ಯ ನಿರ್ವಹಿಸುತ್ತಿತ್ತು ಎಂದು ಹೇಳಲಾಗುತ್ತಿದೆ. ಆದರೆ ರಷ್ಯಾ ಮಾತ್ರ ಇಂದಿಗೂ ಆ ಸತ್ಯವನ್ನು ಬಹಿರಂಗವಾಗಿ ಒಪ್ಪಿಕೊಂಡಿಲ್ಲ. ಹ್ವಾಲ್ಡಿಮಿರ್ ತಿಮಿಂಗಿಲದ ಸಾವು ಸಹಜನಾ..? ಇಲ್ಲ ಕೊಲೆನಾ..? ಎಂಬ ವಿಷಯ ಸದ್ಯ ಎಲ್ಲೆಡೆ ಚರ್ಚೆಗೆ ಗ್ರಾಸವಾಗಿದೆ. (ಏಜೆನ್ಸೀಸ್)
ಗಾಯಕಿ ಸುಚಿತ್ರಾ ವಿರುದ್ಧ ಮಾನನಷ್ಟ ಮೊಕದ್ದಮೆ ಹೂಡಲು ಇದೇ ಕಾರಣ; ನಟಿ ರೀಮಾ ಕಲ್ಲಿಂಗಲ್ ಹೇಳಿದಿಷ್ಟು
