ಪದವೀಧರ ಹಾಗೂ 8 ವರ್ಷಗಳ ಕರ್ತವ್ಯಾನುಭವ ಉಳ್ಳವರು ಹುದ್ದೆಗೆ ಅರ್ಹರಾಗಿದ್ದಾರೆ. ಇತ್ತೀಚಿನ ವರ್ಷಗಳಲ್ಲಿ ಪೊಲೀಸ್ ಪೇದೆಗಳಾಗಿ ನೇಮಕಗೊಂಡವರಲ್ಲಿ ಪದವಿ, ಸ್ನಾತಕೋತ್ತರ, ಇಂಜಿನಿಯರಿಂಗ್ ಸೇರಿ ಉನ್ನತ ವ್ಯಾಸಂಗ ಪೂರೈಸಿದವರು ಹೆಚ್ಚಿನ ಸಂಖ್ಯೆಯಲ್ಲಿದ್ದಾರೆ. ಕರೊನಾ ಪಿಡುಗು, ಲಾಕ್ಡೌನ್ ಇಲ್ಲದಿದ್ದರೆ ಸಕಾಲಕ್ಕೆ ಈ ಪ್ರಕ್ರಿಯೆ ಚಾಲನೆ ಪಡೆದು ಅರ್ಜಿ ಹಾಕಲು ಅವಕಾಶವಿರುತ್ತಿತ್ತು. ಕಳೆದ 1 ದಶಕದಿಂದ ಒಂದಲ್ಲ ಒಂದು ಕಾರಣಗಳಿಗಾಗಿ ಕೈಬಿಟ್ಟು ಹೋಗಿದೆ. ಇದೀಗ ವಯೋಮಿತಿ ಅಡ್ಡಗಾಲು ಹಾಕಿದ್ದು, ಗರಿಷ್ಠ ವಯೋಮಿತಿ 42ಕ್ಕೆ ಏರಿಸಬೇಕೆಂದು ಮುಖ್ಯಮಂತ್ರಿ, ಗೃಹ ಸಚಿವ ಹಾಗೂ ಡಿಜಿ-ಐಜಿಪಿಗೆ ಅನಾಮಧೇಯ ಲಿಖಿತ ಮನವಿ ಸಲ್ಲಿಕೆಯಾಗಿದೆ. ಜೂ.30ಕ್ಕೆ ಅರ್ಜಿ ಹಾಕಲು ಕೊನೇ ದಿನವಾಗಿದೆ. ಅದಕ್ಕೂ ಮುನ್ನವೇ ನಿರ್ಧಾರ ಕೈಗೊಳ್ಳಬೇಕೆಂದೂ ಹುದ್ದೆ ಆಕಾಂಕ್ಷಿಗಳು ಮೊರೆಯಿಟ್ಟಿದ್ದು, ಪೊಲೀಸ್ ಇಲಾಖೆಗೆ ಬೇಕಾದ ಪ್ರತಿಭೆ, ಕುಶಲಮತಿ ಮತ್ತು ಅನುಭವಕ್ಕೆ ಸೂಕ್ತ ಆದ್ಯತೆ ದೊರೆಯಲಿದೆ ಎಂದು ಕೋರಿಕೆಯನ್ನು ಪತ್ರದಲ್ಲಿ ಸಮರ್ಥಿಸಿಕೊಂಡಿದ್ದಾರೆ.
