ಬಸ್ ಹತ್ತುತ್ತಿದ್ದ ಒಂಟಿ ಮಹಿಳೆಯರನ್ನೇ ಟಾರ್ಗೆಟ್ ಮಾಡುತ್ತಿದ್ದ ಆದಿಲ್ ಪಾಷ, ಈ ಕೃತ್ಯಕ್ಕೆ ಇಬ್ಬರು ಮಹಿಳೆಯರನ್ನು ಬಳಸಿಕೊಂಡಿದ್ದ. ಈ ಮಹಿಳೆಯರು ಕಂಕುಳಲ್ಲಿ ಮಕ್ಕಳನ್ನು ಕೂರಿಸಿಕೊಂಡು ಪಕ್ಕಾ ಗೃಹಿಣಿಯರಂತೆ ಬಸ್ ಹತ್ತುತ್ತಿದ್ದರು. ಇವರನ್ನು ಒಂಟಿ ಮಹಿಳೆ ಕುಳಿತ್ತಿದ್ದ ಪಕ್ಕದ ಸೀಟಿನಲ್ಲೇ ಆದಿಲ್ ಪಾಷ ಕೂರಿಸುತ್ತಿದ್ದ. ಪ್ರಯಾಣಿಸುವ ಮಹಿಳೆಯ ಬ್ಯಾಗ್ ಮೇಲೆ ಬೇಕಂತಲೇ ಚಿಲ್ಲರೆ ಕಾಸನ್ನು ಬೀಳಿಸುತ್ತಿದ್ದ ಕಳ್ಳಿಯರು ಅದನ್ನು ತೆಗೆದುಕೊಳ್ಳುವ ನೆಪದಲ್ಲಿ ಪ್ರಯಾಣಿಕಳ ಬ್ಯಾಗಿನಲ್ಲಿದ್ದ ನಗದು ಹಾಗೂ ಚಿನ್ನಾಭರಣ ದೋಚುತ್ತಿದ್ದರು. ಕಳ್ಳಿಯರ ಕೈಯಲ್ಲಿ ಮಗು ಇರುತ್ತಿದ್ದರಿಂದ ಪ್ರಯಾಣಿಸುವವರಿಗೂ ಅನುಮಾನ ಬರುತ್ತಿರಲಿಲ್ಲ. ತಾವು ಅಂದುಕೊಂಡದ್ದನ್ನು ಸಾಧಿಸಿದ ಕೂಡಲೇ ಮುಂದಿನ ನಿಲ್ದಾಣದಲ್ಲೇ ಬಸ್ನಿಂದ ಇಳಿದುಕೊಂಡು ಬಿಡುತ್ತಿದ್ದರು. ಕದ್ದ ಮಾಲನ್ನು ಆದಿಲ್ ಪಾಷಗೆ ಆ ಕಳ್ಳಿಯರು ಕೊಡುತ್ತಿದ್ದರು.
