ಸಾಮಾಜಿಕ ಜಾಲತಾಣದಿಂದ ದೂರವಿರುವುದೇ ಯಶಸ್ಸಿಗೆ ಕಾರಣವೆಂದ ಕನ್ನಡಿಗ ಕೆಎಲ್​ ರಾಹುಲ್​!

ಸೆಂಚುರಿಯನ್​: ಗಾಯದ ಸಮಸ್ಯೆಯಿಂದ ಸಂಪೂರ್ಣವಾಗಿ ಚೇತರಿಸಿಕೊಂಡು ಏಕದಿನ ಕ್ರಿಕೆಟ್​ನಲ್ಲಿ ಯಶಸ್ವಿಯಾಗಿ ಕಂಬ್ಯಾಕ್​ ಮಾಡಿದ ಕನ್ನಡಿಗ ಕೆಎಲ್​ ರಾಹುಲ್​ ಟೆಸ್ಟ್​ ಕ್ರಿಕೆಟ್​ನಲ್ಲಿಯೂ ಭರ್ಜರಿ ಫಾರ್ಮ್​ ಮುಂದುವರಿಸಿದ್ದಾರೆ. ವಿಕೆಟ್​ ಕೀಪಿಂಗ್​ ಜವಾಬ್ದಾರಿಯೊಂದಿಗೆ ಕಣಕ್ಕಿಳಿದ ದ. ಆಫ್ರಿಕಾ ವಿರುದ್ಧದ ಮೊದಲ ಟೆಸ್ಟ್​ನಲ್ಲೂ ಕೆಎಲ್​ ರಾಹುಲ್​ (101 ರನ್​, 137 ಎಸೆತ, 14 ಬೌಂಡರಿ, 4 ಸಿಕ್ಸರ್​) ಏಕಾಂಗಿ ಹೋರಾಟದ ಮೂಲಕ ಶತಕ ಸಿಡಿಸಿ ಮಿಂಚಿದ್ದಾರೆ. 2ನೇ ದಿನದಾಟದ ಬೆನ್ನಲ್ಲೇ ಅವರು ತನ್ನ ಯಶಸ್ಸಿನ ಗುಟ್ಟನ್ನೂ ಬಿಚ್ಚಿಟ್ಟಿದ್ದಾರೆ.

ಕೆಎಲ್​ ರಾಹುಲ್​ ಇತ್ತೀಚೆಗಿನ ವರ್ಷಗಳಲ್ಲಿ ಅತಿಹೆಚ್ಚು ಟ್ರೋಲ್​ಗಳಿಗೆ ಒಳಗಾಗಿರುವ ಕ್ರಿಕೆಟಿಗರಾಗಿದ್ದಾರೆ. ಆದರೆ ಈ ಬಗ್ಗೆ ತಲೆಕೆಡಿಸಿಕೊಳ್ಳದ ರಾಹುಲ್​, ಸಾಮಾಜಿಕ ಜಾಲತಾಣಗಳಿಂದ ದೂರ ಉಳಿಯುವ ಮೂಲಕ ನಾನು ಖುಷಿಯಾಗಿದ್ದೇನೆ ಎಂದಿದ್ದಾರೆ.

"ಜನರು ತಮಗೆ ತೋಚಿದ್ದನ್ನು ಹೇಳುತ್ತಿರುತ್ತಾರೆ. ನಾವು ಸಾರ್ವಜನಿಕ ಜೀವನದಲ್ಲಿ ಇರುವಾಗ, ನಮ್ಮ ನಿರ್ವಹಣೆ ಒಂದೇ ನಾವು ಟೀಕೆಗಳಿಂದ ಪಾರಾಗಲು ಇರುವ ಮಾರ್ಗವಾಗಿದೆ' ಎಂದು ರಾಹುಲ್​ ಹೇಳಿದ್ದಾರೆ. ರಾಹುಲ್​ ಇನಿಂಗ್ಸ್​ ಭಾರತೀಯ ಟೆಸ್ಟ್​ ಕ್ರಿಕೆಟ್​ ಇತಿಹಾಸದ ಅಗ್ರ 10 ಶತಕಗಳಲ್ಲಿ ಒಂದು ಎಂಬ ದಿಗ್ಗಜ ಸುನೀಲ್​ ಗಾವಸ್ಕರ್​ ಪ್ರಶಂಸೆಗೆ ಪ್ರತಿಕ್ರಿಯಿಸಿರುವ 31 ವರ್ಷದ ರಾಹುಲ್​, ಅವರು ಹಾಗೆ ಹೇಳಿದ್ದರೆ ಅದು ನಿಜಕ್ಕೂ ಅತಿದೊಡ್ಡ ಮೆಚ್ಚುಗೆಯಾಗಿದೆ ಎಂದಿದ್ದಾರೆ.

https://www.vijayavani.net/rcb-fanboy-in-centurion-virat-kohli-gifts-signed-rcb-jersey