ಪ್ರಸ್ತುತ ಸಂದರ್ಭದಲ್ಲಿ ವಾರ್ಷಿಕ 20 ಲಕ್ಷ ರೂ.ಗಿಂತ ಹೆಚ್ಚಿನ ವಹಿವಾಟು ಮಾಡುವ ಉದ್ಯಮಗಳಿಗೆ ಲಾಭ ಕಡಿಮೆಯಿದೆ. ಅದರ ಜತೆಗೆ ಜಿಎಸ್ಟಿ ಮತ್ತಿತರ ತೆರಿಗೆ ಪಾವತಿ ಮಾಡಬೇಕಿದೆ. ಸದ್ಯದ ಪರಿಸ್ಥಿತಿಗೆ ಅನುಗುಣವಾಗಿ ನಿರುದ್ಯೋಗಿಗಳು ಅಥವಾ ಹೊಸದಾಗಿ ಉದ್ಯಮ ಆರಂಭಿಸುವವರು ಹೆಚ್ಚು ಬಂಡವಾಳ ಹೂಡಿ ಉದ್ಯಮ ಆರಂಭಿಸುವುದಕ್ಕೆ ಮುಂದಾಗದಿರುವುದು ಒಳಿತು. ಅದರ ಬದಲು ಕಡಿಮೆ ಉದ್ಯೋಗಿಗಳಿರುವ, ಕಡಿಮೆ ಬಂಡವಾಳದ ಉದ್ಯಮಗಳನ್ನು ಆಯ್ಕೆ ಮಾಡಿಕೊಳ್ಳಬೇಕು. ವಾರ್ಷಿಕ 10 ಲಕ್ಷದೊಳಗೆ ವಹಿವಾಟು ನಡೆಸುವಂತಹ ಉದ್ಯಮಗಳು ವೃತ್ತಿ ತೆರಿಗೆ, ಆದಾಯ ತೆರಿಗೆ, ಜಿಎಸ್ಟಿ ಪಾವತಿಸುವ ಅವಶ್ಯಕತೆಯಿಲ್ಲ. ಕೃಷಿ ಉತ್ಪನ್ನಗಳ ಸಂಸ್ಕರಣೆ, ಮಾರಾಟದಂತಹ ಸ್ವಉದ್ಯೋಗ ಸದ್ಯಕ್ಕೆ ಒಳ್ಳೆಯದು. ಬೇರೆ ಉದ್ಯಮ ಆರಂಭಿಸಿದರೆ ಅದಕ್ಕೆ ಅಗತ್ಯವಿರುವ ಉದ್ಯೋಗಿಗಳ ಸಂಖ್ಯೆ, ಖರ್ಚು ಕಡಿಮೆ ಮಾಡಲು ಸದ್ಯ ಸ್ಥಗಿತಗೊಂಡಿರುವ ಕೈಗಾರಿಕೆಗಳಲ್ಲಿನ ಯಂತ್ರಗಳನ್ನು ಬಾಡಿಗೆ ಆಧಾರದಲ್ಲಿ ಪಡೆಯುವುದು ಒಳ್ಳೆಯದು.
