IPL 2024: ರಾಜಸ್ಥಾನ ರಾಯಲ್ಸ್ ಗೆಲುವಿನ ಓಟಕ್ಕೆ ಸನ್​ರೈಸರ್ಸ್​ ಕಡಿವಾಣ

ಹೈದರಾಬಾದ್​: ಯುವ ಆಲ್ರೌಂಡರ್​ ನಿತೀಶ್​ ಕುಮಾರ್​ ರೆಡ್ಡಿ (76* ರನ್​, 42 ಎಸೆತ, 3 ಬೌಂಡರಿ, 8 ಸಿಕ್ಸರ್​) ಅಮೋ ಬ್ಯಾಟಿಂಗ್​ ಮತ್ತು ಅನುಭವಿ ವೇಗಿ ಭುವನೇಶ್ವರ್​ ಕುಮಾರ್​ (41ಕ್ಕೆ 3) ಬಿಗಿ ಬೌಲಿಂಗ್​ ದಾಳಿಯ ಬಲದಿಂದ ಸನ್​ರೈಸರ್ಸ್​ ಹೈದರಾಬಾದ್​ ತಂಡ ಐಪಿಎಲ್​&17ರಲ್ಲಿ ಟೇಬಲ್​ ಟಾಪರ್​ ರಾಜಸ್ಥಾನ ರಾಯಲ್ಸ್​ ತಂಡದ ಗೆಲುವಿನ ಓಟಕ್ಕೆ ಕಡಿವಾಣ ಹಾಕಿದೆ. ಸತತ 4 ಜಯದೊಂದಿಗೆ ಬೀಗುತ್ತಿದ್ದ ರಾಜಸ್ಥಾನ ಗುರುವಾರ ನಡೆದ ಟೂರ್ನಿಯ 50ನೇ ಪಂದ್ಯದಲ್ಲಿ ಸನ್​ರೈಸರ್ಸ್​ ಎದುರು ಕೇವಲ 1 ರನ್​ನಿಂದ ಶರಣಾಯಿತು. ಇದರೊಂದಿಗೆ ಪ್ಯಾಟ್​ ಕಮ್ಮಿನ್ಸ್​ ಪಡೆ ಸತತ 2 ಸೋಲಿನ ಬಳಿಕ ಜಯದ ಹಾದಿಗೆ ಮರಳಿತು.

ಆರ್​ಜಿಐ ಸ್ಟೇಡಿಯಂನಲ್ಲಿ ಕಾದಾಟದಲ್ಲಿ ಟಾಸ್​ ಗೆದ್ದು ಬ್ಯಾಟಿಂಗ್​ ಆಯ್ದ ಸನ್​ರೈಸರ್ಸ್​, 3 ವಿಕೆಟ್​ಗೆ 201 ರನ್​ ಕಲೆಹಾಕಿತು. ಪ್ರತಿಯಾಗಿ ರಾಯಲ್ಸ್​ ಆರಂಭಿಕ ಆಘಾತದ ನಡುವೆ ಯಶಸ್ವಿ ಜೈಸ್ವಾಲ್​ (67 ರನ್​, 40 ಎಸೆತ, 7 ಬೌಂಡರಿ, 2 ಸಿಕ್ಸರ್​) ಮತ್ತು ರಿಯಾನ್​ ಪರಾಗ್​ (77 ರನ್​, 49 ಎಸೆತ, 8 ಬೌಂಡರಿ, 4 ಸಿಕ್ಸರ್​) ಹೋರಾಟದಿಂದ ಜಯದತ್ತ ಸಾಗಿತು. ಆದರೆ ಕೊನೇ 5 ಓವರ್​ಗಳಲ್ಲಿ ಲಯ ತಪ್ಪಿದ ರಾಯಲ್ಸ್​ 7 ವಿಕೆಟ್​ಗೆ 200 ರನ್​ ಗಳಿಸಲಷ್ಟೇ ಶಕ್ತವಾಯಿತು.

ಕೊನೇ ಎಸೆತದಲ್ಲಿ ಭುವಿ ಮ್ಯಾಜಿಕ್​

ಭುವನೇಶ್ವರ್​ ರಾಯಲ್ಸ್​ ಇನಿಂಗ್ಸ್​ನ ಮೊದಲ ಮತ್ತು ಕೊನೇ ಓವರ್​ನಲ್ಲಿ ಬಿಗಿ ದಾಳಿ ನಡೆಸಿ ಸನ್​ಗೆ ಜಯ ತಂದರು. ಕೊನೇ ಓವರ್​ನಲ್ಲಿ 13 ರನ್​ ಬೇಕಿದ್ದಾಗ ಅಶ್ವಿನ್​ ಮೊದಲ ಎಸೆತದಲ್ಲಿ ಸಿಂಗಲ್ಸ್​ ಕಸಿದರೆ, ನಂತರದ 4 ಎಸೆತಗಳಲ್ಲಿ ರೊವ್ಮನ್​ ಪೊವೆಲ್​ (27) 10 ರನ್​ ಕಸಿದರು. ಆದರೆ ಕೊನೇ ಎಸೆತದಲ್ಲಿ 2 ರನ್​ ಬೇಕಿದ್ದಾಗ ಪೊವೆಲ್​ರನ್ನು ಎಲ್​ಬಿ ಬಲೆಗೆ ಬೀಳಿಸಿದ ಭುವನೇಶ್ವರ್​ ಗೆಲುವಿನ ರೂವಾರಿಯಾದರು.

https://www.vijayavani.net/felt-so-much-but-stayed-so-silent-sania-mirza-post-divorce