ಯುವ ಭಾರತ, ಹೊಸ ಭರವಸೆ... ಸುರಕ್ಷಿತ ಕೈಗಳಲ್ಲಿ ಟೆಸ್ಟ್​ ಟೀಮ್​ ಭವಿಷ್ಯ!

ಲಂಡನ್​: ಸಚಿನ್​ ತೆಂಡುಲ್ಕರ್​, ರಾಹುಲ್​ ದ್ರಾವಿಡ್​, ಸೌರವ್​ ಗಂಗೂಲಿ ನಂತರ ಭಾರತೀಯ ಕ್ರಿಕೆಟ್​ಗೆ ಯಾರು ದಿಕ್ಕು ಎಂಬ ಪ್ರಶ್ನೆ ಎದ್ದಾಗಲೇ ಆಸರೆಯಾದವರು ವಿರಾಟ್​ ಕೊಹ್ಲಿ, ರೋಹಿತ್​ ಶರ್ಮ. ಇದೀಗ ಇವರಿಬ್ಬರು ಟೆಸ್ಟ್​ ಮಾದರಿಗೆ ನಿವೃತ್ತಿ ಹೇಳಿ ಹೊರನಡೆದಿರುವ ಸಮಯದಲ್ಲಿ ಭಾರತೀಯ ಬ್ಯಾಟಿಂಗ್​ ವಿಭಾಗಕ್ಕೆ ಶುಭಮಾನ್​ ಗಿಲ್​, ಯಶಸ್ವಿ ಜೈಸ್ವಾಲ್​ ಮತ್ತು ರಿಷಭ್​ ಪಂತ್​ ಆಧಾರವಾಗಿದ್ದು, ಭವಿಷ್ಯದ ಬಗ್ಗೆ ಭರವಸೆ ಮೂಡಿಸಿದ್ದಾರೆ. ಎಜ್​ಬಾಸ್ಟನ್​ ಟೆಸ್ಟ್​ನಲ್ಲಿ ಆತಿಥೇಯ ಇಂಗ್ಲೆಂಡ್​ ಎದುರು ಸಾವಿರಕ್ಕೂ ಅಧಿಕ ರನ್​ ಸಿಡಿಸಿದ ಭಾರತ ತಂಡ ಇದೀಗ ಸುರತ ಕೈಗಳಲ್ಲಿರುವುದು ಖಾತ್ರಿಗೊಂಡಿದೆ.

ಕೊಹ್ಲಿ, ರೋಹಿತ್​, ಅಶ್ವಿನ್​ ನಿವೃತ್ತಿಯ ನಂತರ ಭಾರತ ಟೆಸ್ಟ್​ ತಂಡದಲ್ಲಿ ಸ್ಥಿತ್ಯಂತರ ಶುರುವಾಗಿತ್ತು. ಹೀಗಾಗಿ ಭಾರತ ಯುವ ತಂಡದೊಂದಿಗೆ ಇಂಗ್ಲೆಂಡ್​ ನೆಲಕ್ಕೆ ಕಾಲಿಟ್ಟಾಗ ಮತ್ತು ನಾಯಕತ್ವದಲ್ಲಿ ಅತ್ಯಂತ ಅನನುಭವಿಯಾಗಿದ್ದ ಶುಭಮಾನ್​ ಗಿಲ್​ಗೆ ಜವಾಬ್ದಾರಿ ಹೆಗಲೇರಿದಾಗ ಅಭಿಮಾನಿಗಳಲ್ಲಿ ಮತ್ತು ಕ್ರಿಕೆಟ್​ ಪಂಡಿತರಲ್ಲಿ ಅಲ್ಪ ಅಳುಕು ಹುಟ್ಟಿತ್ತು. ಆದರೆ ಇದೀಗ ಆಂಗ್ಲರ ನೆಲದಲ್ಲಿ ಆಡಿದ ಮೊದಲ 2 ಟೆಸ್ಟ್​ಗಳಲ್ಲೇ ಎಲ್ಲದಕ್ಕೂ ಉತ್ತರ ಲಭಿಸಿದೆ. ಲೀಡ್ಸ್​ನಲ್ಲಿ ಭಾರತ ಮೊದಲ 4 ದಿನ ಪ್ರಾಬಲ್ಯ ಸಾಧಿಸಿದರೂ ಕೊನೇ ದಿನ ಸೋಲು ಕಂಡಿತ್ತು. ಅಲ್ಲಿ ಮಾಡಿದ್ದ ಕೆಲ ತಪು$್ಪಗಳನ್ನು ಎಜ್​ಬಾಸ್ಟನ್​ನಲ್ಲಿ ತಿದ್ದಿಕೊಂಡ ಭಾರತ, ಪಂದ್ಯದ ಐದೂ ದಿನ ಪ್ರಾಬಲ್ಯ ಸಾಧಿಸಿ ಆಂಗ್ಲರನ್ನು ಸದೆಬಡಿದಿದೆ. ಜತೆಗೆ ಆಕ್ರಮಣಕಾರಿ ಬಾಜ್​ಬಾಲ್​ ಕಾರ್ಯತಂತ್ರದ ಬಗ್ಗೆಯೇ ಬೆನ್​ ಸ್ಟೋಕ್ಸ್​ ಪಡೆ ಮರುಚಿಂತನೆ ನಡೆಸುವಂತೆ ಮಾಡಿದೆ.

ಇನ್ನು ಸರಣಿಯ ಆರಂಭದಲ್ಲಿ ಭಾರತೀಯ ಬೌಲಿಂಗ್​ ವಿಭಾಗ, ಜಸ್​ಪ್ರೀತ್​ ಬುಮ್ರಾ ಅವರನ್ನು ಅತಿಯಾಗಿ ಅವಲಂಭಿಸಿದೆ ಎಂದು ದೂರಲಾಗಿತ್ತು. ಅಲ್ಲದೆ ಎಜ್​ಬಾಸ್ಟನ್​ ಟೆಸ್ಟ್​ನಿಂದ ಬುಮ್ರಾಗೆ ವಿಶ್ರಾಂತಿ ನೀಡಿದಾಗ ಟೀಕೆಗಳೂ ಬಂದಿದ್ದವು. ಆದರೆ ಇದೀಗ ಬುಮ್ರಾ ಗೈರಿನಲ್ಲೂ ಆಂಗ್ಲರ ಎಲ್ಲ 20 ವಿಕೆಟ್​ಗಳನ್ನು ಕಬಳಿಸುವ ಮೂಲಕ ಭಾರತೀಯ ಬೌಲರ್​ಗಳು ದಿಟ್ಟ ಉತ್ತರ ನೀಡಿದ್ದಾರೆ. ಆಕಾಶ್​ದೀಪ್​-ಸಿರಾಜ್​ ಜೋಡಿಯನ್ನು ಲಾರ್ಡ್ಸ್​ನಲ್ಲಿ ಬುಮ್ರಾ ಕೂಡಿಕೊಂಡಾಗ ಆಂಗ್ಲರಿಗೆ ಇನ್ನಷ್ಟು ಕಠಿಣ ಸವಾಲು ಎದುರಾಗುವುದು ಖಂಡಿತ.