ಮೆಲ್ಬೋರ್ನ್: ಬಾಕ್ಸಿಂಗ್ ಡೇ ಟೆಸ್ಟ್ನಲ್ಲಿ ಕೊನೇ ದಿನ ಗೆಲುವಿಗೆ 340 ರನ್ ಸವಾಲು ಪಡೆದ ಭಾರತ ತಂಡ, ಅಗ್ರ 3 ವಿಕೆಟ್ಗಳನ್ನು 33 ರನ್ಗಳಿಗೆ ಕಳೆದುಕೊಂಡು ಸೋಳಿನ ಸುಳಿಗೆ ಸಿಲುಕಿತು. ಆಗ ಯಶಸ್ವಿ ಜೈಸ್ವಾಲ್ (84 ರನ್, 208 ಎಸೆತ, 8 ಬೌಂಡರಿ) ಮತ್ತು ರಿಷಭ್ ಪಂತ್ (30 ರನ್, 104 ಎಸೆತ, 2 ಬೌಂಡರಿ) ಜೋಡಿ 32 ಓವರ್ಗಳ ಕಾಲ ಆಸೀಸ್ ಬೌಲರ್ಗಳನ್ನು ಸತಾಯಿಸಿ ಭಾರತಕ್ಕೆ ಡ್ರಾ ಸಾಧಿಸುವ ಆಸೆ ಮೂಡಿಸಿತು. ಆದರೆ ಚಹಾ ವಿರಾಮದ ಬಳಿಕ ದಿಢೀರ್ ಕುಸಿತ ಕಂಡ ಭಾರತ 79.1 ಓವರ್ಗಳಲ್ಲಿ 155 ರನ್ಗಳಿಗೆ ಆಲೌಟ್ ಆಗಿ ಶರಣಾಯಿತು. ಭೋಜನ ವಿರಾಮದಿಂದ ಚಹಾ ವಿರಾಮದವರೆಗೆ ಒಂದೂ ವಿಕೆಟ್ ಬೀಳದಂತೆ ಎಚ್ಚರಿಕೆ ವಹಿಸಿ ಕ್ರೀಸ್ನಲ್ಲಿ ನಿಂತ ಜೈಸ್ವಾಲ್-ರಿಷಭ್ ಪಂತ್ ಜೋಡಿ ತಾಳ್ಮೆಯ ಬ್ಯಾಟಿಂಗ್ ಆಸೀಸ್ ಬೌಲರ್ಗಳಿಗೆ ಸವಾಲಾಗಿ ಭಾರತಕ್ಕೆ ಡ್ರಾ ಸಾಧಿಸುವ ಅವಕಾಶ ಸೃಷ್ಟಿಸಿತು. ಜೈಸ್ವಾಲ್ ಕೆಲ ಜೀವದಾನಗಳ ಲಾಭದಿಂದ 200ಕ್ಕೂ ಅಧಿಕ ಎಸೆತ ಎದುರಿಸಿ ನಿಂತರೆ, ಪಂತ್ ಎಂದಿನ ಆಕ್ರಮಣಕಾರಿ ಆಟವನ್ನು ಮರೆತು ತಾಳ್ಮೆಯೊಂದಿಗೆ 100ಕ್ಕೂ ಅಧಿಕ ಎಸೆತ ಎದುರಿಸಿದರು. 4ನೇ ವಿಕೆಟ್ಗೆ ಇವರಿಬ್ಬರು 197 ಎಸೆತಗಳಲ್ಲಿ 88 ರನ್ ಸೇರಿಸಿದರು. ಆದರೆ ಚಹಾ ವಿರಾಮದ ಬಳಿಕ ಅರೆಕಾಲಿಕ ಸ್ಪಿನ್ನರ್ ಟ್ರಾವಿಸ್ ಹೆಡ್ ದಾಳಿಗೆ ಇಳಿದಾಗ ತಾಳ್ಮೆ ಕಳೆದುಕೊಂಡ ಪಂತ್, ದೊಡ್ಡ ಹೊಡೆತಕ್ಕೆ ಕೈಹಾಕಿ ಲಾಂಗ್ಆನ್ನಲ್ಲಿ ಮಿಚೆಲ್ ಮಾರ್ಷ್ಗೆ ಕ್ಯಾಚ್ ನೀಡಿದರು. ಇದರೊಂದಿಗೆ ಭಾರತದ ಕುಸಿತವೂ ಆರಂಭಗೊಂಡಿತು.
