VIDEO| ಮುಂದಿನ ಒಂದು ವರ್ಷ ವಿಶ್ವವೇ ಆರಂಭವಾಗದು, ಇನ್ನು ಕ್ರಿಕೆಟ್​ ಹೇಗೆ ಶುರುವಾಗಲಿದೆ?: ಶೋಯೆಬ್​ ಅಖ್ತರ್​

ಇಸ್ಲಮಾಬಾದ್​: ಮುಂದಿನ ಒಂದು ವರ್ಷಗಳ ಕಾಲ ವಿಶ್ವವೇ ಆರಂಭವಾಗುವುದಿಲ್ಲ. ಇನ್ನು ಕ್ರಿಕೆಟ್​ ಶುರುವಾಗುವುದಾದರೂ ಹೇಗೆ ಎಂದು ಪಾಕಿಸ್ತಾನದ ಮಾಜಿ ಕ್ರಿಕೆಟಿಗ ಶೋಯೆಬ್​ ಅಖ್ತರ್​ ಹೇಳಿದ್ದಾರೆ.

ಅನೇಕ ದೇಶಗಳಲ್ಲಿ ಇನ್ನು ಕರೊನಾ ಬಾಧಿಸುತ್ತಲೇ ಇದೆ. ಸಮಪರ್ಕವಾದ ಪರೀಕ್ಷಾ ಕಿಟ್​ಗಳು ಸಹ ಹಲವು ದೇಶಗಳಲ್ಲಿ ಇಲ್ಲ. ಹೀಗಾಗಿ ಕರೊನಾದಿಂದ ವಿಶ್ವವೇ ಮುಕ್ತವಾಗಲು ಒಂದು ವರ್ಷ ತೆಗೆದುಕೊಳ್ಳಬಹುದು. ಅಲ್ಲಿಯವರೆಗೆ ಯಾವುದೇ ಕ್ರಿಕೆಟ್​ ಯೋಜನೆಯಾಗಲಿ ಅಥವಾ ಸರಣಿಯಾಗಲಿ ಆಯೋಜಿಸಲು ಸಾಧ್ಯವಾಗುವುದಿಲ್ಲ ಎಂದು ತಮ್ಮ ಯೂಟ್ಯೂಬ್​ ಚಾನಲ್ ಮೂಲಕ ತಿಳಿಸಿದ್ದಾರೆ.

ಕರೊನಾ ಎಂದಿಗೆ ಕೊನೆಯಾಗಲಿದೆ ಎಂಬುದು ನನಗೆ ಗೊತ್ತಿಲ್ಲ. ಅಲ್ಲಿಯವರೆಗೆ ಎಷ್ಟು ಮಂದಿ ಸೋಂಕಿತರಾಗುತ್ತಾರೆಂಬುದು ಸಹ ತಿಳಿದಿಲ್ಲ. ಅಲ್ಲಿಯವರೆಗೆ ಎಲ್ಲಿಯೂ ಯಾವುದೇ ರೀತಿಯ ಕ್ರಿಕೆಟ್​ ಚಟುವಟಿಕೆ ನಡೆಯದು. ಕರೊನಾ ವೈರಸ್​ನಿಂದಾಗಿ ಒಂದು ವರ್ಷಗಳ ಕಾಲ ಕ್ರಿಕೆಟ್​ ನಡೆಯದು ಎಂದು ನನಗನಿಸುತ್ತದೆ. ಇದು ಒಂದು ವರ್ಷಗಳ ಕಾಲ ನಮ್ಮನ್ನು ಕಾಡಲಿದೆ. ನಾವು ಬಲವಾಗಿಯೇ ಇದರಿಂದ ಹೊರಬರುತ್ತೇವೆ ಎಂಬ ನಂಬಿಕೆಯೂ ಇದೆ ಎಂದಿದ್ದಾರೆ.

ಸದ್ಯದ ಪರಿಸ್ಥಿತಿ ತುಂಬಾ ಕೆಟ್ಟದಾಗಿದೆ. ಒಂದು ವರ್ಷಗಳ ವೈರಸ್​ ಜೀವಂತವಾಗಿರುವುದನ್ನು ನೋಡಲು ನಾನು ಇಚ್ಛಿಸುವುದಿಲ್ಲ. ವಿವಿಧ ಸಮುದಾಯಗಳ ಗುಂಪಾಗಿರುವ ನಾವು ಅದರಿಂದ ನಾವು ಹೊರಬರಬೇಕಾಗಿದೆ ಎಂದರು.(ಏಜೆನ್ಸೀಸ್​)