ಇತ್ತೀಚೆಗೆ ನಡೆದ ತ್ರಿಕೋನ ಟಿ20 ಸರಣಿಯಲ್ಲಿ ಇಂಗ್ಲೆಂಡ್ ಹಾಗೂ ಆಸ್ಟ್ರೇಲಿಯಾ ಎದುರು ಸೋಲು, ಗೆಲುವು ಕಂಡಿರುವ ಭಾರತ ತಂಡ ಟೂರ್ನಿಗೆ ಅಗತ್ಯ ಸಿದ್ಧತೆ ಮಾಡಿಕೊಂಡಂತಿದೆ. ಮಧ್ಯಮ ಹಾಗೂ ಕೆಳ ಕ್ರಮಾಂಕದಲ್ಲಿ ದಿಢೀರ್ ಕುಸಿತ ಅನುಭವಿಸುತ್ತಿರುವ ಭಾರತ ತಂಡಕ್ಕೆ ಸಂಘಟಿತ ಹೋರಾಟ ಅಗತ್ಯವಿದೆ. ಕನ್ನಡತಿ ವೇದಾ ಕೃಷ್ಣಮೂರ್ತಿ ಹಲವು ಅವಕಾಶಗಳು ಲಭಿಸುತ್ತಿದ್ದರೂ ಸೂಕ್ತವಾಗಿ ಬಳಸಿಕೊಳ್ಳಲು ವಿಫಲರಾಗುತ್ತಿದ್ದಾರೆ. ಇಂಥ ಟೂರ್ನಿಗಳಲ್ಲಿ ಒತ್ತಡ ರಹಿತವಾಗಿ ಆಟಗಾರ್ತಿಯರು ಹೋರಾಡಬೇಕಿದೆ. 16 ವರ್ಷದ ಶಫಾಲಿ ವರ್ಮ, ಸ್ಮೃತಿ ಮಂದನಾ ಆರಂಭಿಕ ಜೋಡಿ ತಂಡಕ್ಕೆ ಭದ್ರ ಬುನಾದಿ ಹಾಕಿಕೊಡಬೇಕಿದೆ. ಬೌಲಿಂಗ್ ವಿಭಾಗದ ಮಟ್ಟಿಗೆ ಹೇಳುವುದಾದರೆ, ವೇಗಿ ಶಿಖಾ ಪಾಂಡೆ, ಪೂನಂ ಯಾದವ್, ಕನ್ನಡತಿ ರಾಜೇಶ್ವರಿ ಗಾಯಕ್ವಾಡ್, ದೀಪ್ತಿ ಶರ್ಮ ಒಳಗೊಂಡ ಬೌಲಿಂಗ್ ಪಡೆ ಎದುರಾಳಿಗೆ ಸವಾಲಾಗಬಲ್ಲದು.
