ಬೆಂಗಳೂರು: ಸೆಪ್ಟೆಂಬರ್ 27ರ ಭಾನುವಾರ ನಡೆಯಲಿರುವ 13ನೇ ಆವೃತ್ತಿಯ ವೀಪ್ರೋ ಬೆಂಗಳೂರು ಮ್ಯಾರಥಾನ್ಗೆ ಬೆಂಗಳೂರು ನಗರ ಸಜ್ಜಾಗಿದೆ. ಬ್ರ್ಯಾಂಡ್ ಫೈನಾನ್ಸ್ನಿಂದ ವಿಶ್ವದ 50 ಪ್ರಮುಖ ಮ್ಯಾರಥಾನ್ಗಳಲ್ಲೊಂದಾಗಿ ಗುರುತಿಸಲ್ಪಟ್ಟಿರುವ ಈ ಓಟ, ಭಾರತದಲ್ಲಿ ಎರಡನೇ ಸ್ಥಾನದಲ್ಲಿದೆ. ಈ ಬಾರಿ ಫುಲ್ ಮ್ಯಾರಥಾನ್, ಹಾಫ್ ಮ್ಯಾರಥಾನ್, 10ಕೆ ಮತ್ತು 5ಕೆ ವಿಭಾಗಗಳಲ್ಲಿ 45,000ಕ್ಕೂ ಹೆಚ್ಚು ಮಂದಿ ಭಾಗವಹಿಸುವ ನಿರೀಕ್ಷೆಯಿದೆ. ಸ್ಪಿರಿಟ್ ಆಫ್ ವೀಪ್ರೋ ರನ್ನ ಓಟಗಾರರೂ ಇದರಲ್ಲಿ ಪಾಲ್ಗೊಳ್ಳಲಿದ್ದಾರೆ.
ದೇಶದ ವಿವಿಧ ಭಾಗಗಳಿಂದ 25ಕ್ಕೂ ಹೆಚ್ಚು ಗಣ್ಯ ಓಟಗಾರರು ಈ ಬಾರಿ ಸ್ಪರ್ಧಾತ್ಮಕ ವಿಭಾಗದಲ್ಲಿ ಭಾಗವಹಿಸಲಿದ್ದು, ಮ್ಯಾರಥಾನ್ನ ಕ್ರೀಡಾತ್ಮಕ ಮಟ್ಟ ಮತ್ತಷ್ಟು ಹೆಚ್ಚಲಿದೆ.
ನೆಬ್ ಸ್ಪೋರ್ಟ್ಸ್, ಕರ್ನಾಟಕ ಅಥ್ಲೆಟಿಕ್ಸ್ ಅಸೋಸಿಯೇಷನ್, ವೀಪ್ರೋ ಲಿಮಿಟೆಡ್ ಮತ್ತು ಶ್ರೀರಾಮ್ ಪ್ರಾಪರ್ಟೀಸ್ ಸಹಯೋಗದಲ್ಲಿ ಆಯೋಜಿಸಲಾಗಿರುವ ಮ್ಯಾರಥಾನ್ ಕಂಠೀರವ ಕ್ರೀಡಾಂಗಣದಿಂದ ಆರಂಭವಾಗಲಿದೆ.
ಓಟಗಾರರು ವಿಧಾನಸೌಧ, ಕಬ್ಬನ್ ಪಾರ್ಕ್ ಸೇರಿದಂತೆ ಬೆಂಗಳೂರಿನ ಪ್ರಮುಖ ಸ್ಥಳಗಳ ಮೂಲಕ ಸಾಗಲಿದ್ದಾರೆ. ಈ ಆವೃತ್ತಿಯಲ್ಲಿ ಫುಲ್ ಮ್ಯಾರಥಾನ್ ಮತ್ತು ಹಾಫ್ ಮ್ಯಾರಥಾನ್ ಮಾರ್ಗಗಳಲ್ಲಿ ಸುಂದರವಾದ ಹಲಸೂರು ಕೆರೆಯನ್ನೂ ಸೇರಿಸಲಾಗಿದೆ.
ಭಾಗವಹಿಸುವವರು ತಮ್ಮ ಓಟದ ಬಿಬ್ಗಳು ಮತ್ತು ಟಿ-ಶರ್ಟ್ಗಳನ್ನು ಪಡೆಯಲು ಎಕ್ಸ್ಪೋ ಸೆಪ್ಟೆಂಬರ್ 25 ಮತ್ತು 26ರಂದು ಬೆಳಗ್ಗೆ 11ರಿಂದ ಸಂಜೆ 5ರವರೆಗೆ ಜಯಮಹಲ್ ಪ್ಯಾಲೇಸ್ನಲ್ಲಿ ನಡೆಯಲಿದೆ.
ಮ್ಯಾರಥಾನ್ ವರ್ಷದಿಂದ ವರ್ಷಕ್ಕೆ ದೊಡ್ಡದಾಗುತ್ತಿದ್ದರೂ ಈ ಬಾರಿ ಸಾಧನೆಯ ಮತ್ತೊಂದು ಆಯಾಮಕ್ಕೆ ವಿಶೇಷ ಒತ್ತು ನೀಡಲಾಗಿದೆ. ಜೀವನದಲ್ಲಿ ಎದುರಾದ ಕಠಿಣ ಸವಾಲುಗಳ ನಡುವೆಯೂ ಓಟದ ಮೂಲಕ ಮುನ್ನಡೆದ 9 ಮಂದಿ ಓಟಗಾರರನ್ನು ವೀಪ್ರೋ ಬೆಂಗಳೂರು ಮ್ಯಾರಥಾನ್ 2026ರ ಬ್ರ್ಯಾಂಡ್ ಅಂಬಾಸಿಡರ್ಗಳಾಗಿ ಆಯ್ಕೆ ಮಾಡಲಾಗಿದೆ.
ದೈಹಿಕ ಅಸಮರ್ಥತೆ ಸೇರಿದಂತೆ ಹಲವು ವೈಯಕ್ತಿಕ ಸವಾಲುಗಳನ್ನು ಎದುರಿಸಿದರೂ ಓಟವನ್ನು ನಿಲ್ಲಿಸದೆ ಮುನ್ನಡೆದಿರುವುದು ಈ ರಾಯಭಾರಿಗಳ ವಿಶೇಷತೆ. ಜೀವನದ ಅಡೆತಡೆಗಳೇ ಅವರಿಗೆ ಮುಂದೆ ಸಾಗಲು ಪ್ರೇರಣೆಯಾಗಿವೆ.
ಚಾರಿಟಿ 10ಕೆ ಓಟದ ಮೂಲಕ ಭಾಗವಹಿಸುವವರಿಗೆ ಸಾಮಾಜಿಕ ಕಾರಣಕ್ಕಾಗಿ ಓಡುವ ಅವಕಾಶವೂ ದೊರೆಯಲಿದೆ. ಕಳೆದ ಕೆಲವು ವರ್ಷಗಳಲ್ಲಿ ಈ ಉಪಕ್ರಮದ ಮೂಲಕ 45 ಲಕ್ಷ ರೂ.ಗೂ ಹೆಚ್ಚು ಹಣ ಸಂಗ್ರಹಿಸಲಾಗಿದ್ದು, ಹಿಂದುಳಿದ ಸಮುದಾಯಗಳೊಂದಿಗೆ ಕಾರ್ಯನಿರ್ವಹಿಸುವ ಆಯ್ದ ಸ್ವಯಂಸೇವಾ ಸಂಸ್ಥೆಗಳು ಹಾಗೂ ಕ್ರೀಡಾ ಅಭಿವೃದ್ಧಿಯಲ್ಲಿ ತೊಡಗಿರುವ ಸಂಘಟನೆಗಳಿಗೆ ಈ ಹಣವನ್ನು ನೆರವಿನ ರೂಪದಲ್ಲಿ ನೀಡಲಾಗಿದೆ.
21ನೇ ಆವೃತ್ತಿಗೆ ತಲುಪಿರುವ ಸ್ಪಿರಿಟ್ ಆಫ್ ವೀಪ್ರೋ ರನ್ ಕೂಡ ಸೆಪ್ಟೆಂಬರ್ 27ರಂದು ನಡೆಯುವ ಕಾರ್ಯಕ್ರಮದ ಪ್ರಮುಖ ಅಂಗವಾಗಿರಲಿದೆ. ವಿಶ್ವದ 70ಕ್ಕೂ ಹೆಚ್ಚು ನಗರಗಳಲ್ಲಿ ನಡೆಯುವ ಈ ಉದ್ಯೋಗಿ-ನಾಯಕತ್ವದ ಚಾರಿಟಿ ಓಟದಲ್ಲಿ 72,000ಕ್ಕೂ ಹೆಚ್ಚು ಮಂದಿ ಭಾಗವಹಿಸಲಿದ್ದಾರೆ. ವೀಪ್ರೋ ಉದ್ಯೋಗಿಗಳು ಮತ್ತು ಅವರ ಕುಟುಂಬಸ್ಥರು, ಗ್ರಾಹಕರು ಹಾಗೂ ಪಾಲುದಾರರು ಸಾಮಾಜಿಕ ಬದಲಾವಣೆಯ ಸಾಮಾನ್ಯ ಉದ್ದೇಶದೊಂದಿಗೆ ಈ ಓಟದಲ್ಲಿ ಒಂದಾಗಲಿದ್ದಾರೆ.
ಕಾರ್ಯಕ್ರಮದ ವೇಳಾಪಟ್ಟಿ
ದಿನಾಂಕ: ಸೆಪ್ಟೆಂಬರ್ 27, 2026, ಭಾನುವಾರ
ಸ್ಥಳ: ಸ್ರೀ ಕಂಠೀರವ ಕ್ರೀಡಾಂಗಣ
ಫುಲ್ ಮ್ಯಾರಥಾನ್: ಬೆಳಗ್ಗೆ 3.50
ಹಾಫ್ ಮ್ಯಾರಥಾನ್: ಬೆಳಗ್ಗೆ 6
10ಕೆ ಓಟ: ಬೆಳಗ್ಗೆ 7.30
5ಕೆ ಓಟ: ಬೆಳಗ್ಗೆ 8.15
ವಿಶೇಷ ಚಾಲನೆ — ದಿವ್ಯಾಂಗರು ಮತ್ತು ದೃಷ್ಟಿಹೀನರಿಗಾಗಿ: ಬೆಳಗ್ಗೆ 8.20
