ನವದೆಹಲಿ: ಐಪಿಎಲ್ ಫ್ರಾಂಚೈಸಿ ಪಂಜಾಬ್ ಕಿಂಗ್ಸ್ನ ಮಾಲೀಕರ ನಡುವೆ ಜಗಳ ನಡೆದಿದೆ. ತಂಡದ ನಾಲ್ವರು ಸಹ-ಮಾಲೀಕರಲ್ಲಿ ಒಬ್ಬರಾಗಿರುವ ಮೋಹಿತ್ ಬರ್ಮನ್ ತನ್ನ ಷೇರುಗಳನ್ನು ಹೆಸರು ಬಹಿರಂಗಪಡಿಸದ 3ನೇ ವ್ಯಕ್ತಿಗೆ ಮಾರಾಟ ಮಾಡುವುದನ್ನು ವಿರೋಧಿಸಿ ಮತ್ತೋರ್ವ ಸಹ&ಮಾಲಕಿ ಹಾಗೂ ಬಾಲಿವುಡ್ ನಟಿ ಪ್ರೀತಿ ಝಿಂಟಾ, ಪಂಜಾಬ್-ಹರಿಯಾಣ ಹೈಕೋರ್ಟ್ ಮೆಟ್ಟಿಲೇರಿದ್ದಾರೆ. ಆಗಸ್ಟ್ 20ರಂದು ನ್ಯಾಯಾಲಯ ಪ್ರಕರಣದ ವಿಚಾರಣೆ ಕೈಗೆತ್ತಿಕೊಳ್ಳಲಿದೆ.
ಮಧ್ಯಸ್ಥಿಕೆ ಮತ್ತು ರಾಜಿ ಕಾಯ್ದೆ&1996ರ ಸೆಕ್ಷನ್-9ರ ಅಡಿಯಲ್ಲಿ ಪ್ರೀತಿ ಝಿಂಟಾ, ನ್ಯಾಯಾಲಯಕ್ಕೆ ದೂರು ಸಲ್ಲಿಸಿದ್ದು, ತನ್ನ ಮತ್ತು ಬರ್ಮನ್ ನಡುವಿನ ಭಿನ್ನಾಭಿಪ್ರಾಯಗಳ ಹಿನ್ನೆಲೆಯಲ್ಲಿ ಷೇರುಗಳ ಮಾರಾಟ ರ್ನಿಬಂಧಿಸಿ ಮಧ್ಯಂತರ ಆದೇಶ ನೀಡುವಂತೆ ಕೇಳಿಕೊಂಡಿದ್ದಾರೆ.
ಪಂಜಾಬ್ ಕಿಂಗ್ಸ್ ಫ್ರಾಂಚೈಸಿಯ ಒಡೆತನ ಹೊಂದಿರುವ ಕೆಪಿಎಚ್ ಡ್ರೀಮ್ ಕ್ರಿಕೆಟ್ ಪೆವೇಟ್ ಲಿಮಿಟೆಡ್ ಕಂಪನಿಯಲ್ಲಿ ಬರ್ಮನ್ ಗರಿಷ್ಠ ಅಂದರೆ ಶೇ.48ರಷ್ಟು ಷೇರುಗಳನ್ನು ಹೊಂದಿದ್ದಾರೆ. ಪ್ರೀತಿ ಝಿಂಟಾ ಮತ್ತು ಉದ್ಯಮಿ ನೆಸ್ ವಾಡಿಯಾ ತಲಾ ಶೇ. 23 ಷೇರು ಹೊಂದಿದ್ದಾರೆ. ಉಳಿದ ಷೇರುಗಳು 4ನೇ ಸಹ&ಮಾಲೀಕ ಕರಣ್ ಪೌಲ್ ಬಳಿ ಇದೆ.
ಡಾಬರ್ ಆಯುರ್ವೇದಿಕ್ ಮತ್ತು ಎಫ್ಎಂಸಿಜಿ ಕಂಪನಿಯ ಚೇರ್ಮನ್ ಕೂಡ ಆಗಿರುವ ಮೋಹಿತ್ ಬರ್ಮನ್, ಪಂಜಾಬ್ ಕಿಂಗ್ಸ್ ಫ್ರಾಂಚೈಸಿಯ ಶೇ.11.5 ಷೇರುಗಳನ್ನು ವ್ಯಕ್ತಿಯೊಬ್ಬರಿಗೆ ಮಾರಲು ಬಯಸಿದ್ದು, ಪ್ರೀತಿ ಝಿಂಟಾ ಇದನ್ನು ವಿರೋಧಿಸುತ್ತಿದ್ದಾರೆ. ಈ ನಡುವೆ ಬರ್ಮನ್, ತನಗೆ ಷೇರು ಮಾರಾಟ ಮಾಡುವ ಯಾವ ಯೋಜನೆಯೂ ಇಲ್ಲ ಎಂದು ಹೇಳಿಕೊಂಡಿದ್ದಾರೆ. ಬರ್ಮನ್ ಕೆರಿಬಿಯನ್ ಪ್ರೀಮಿಯರ್ ಲೀಗ್ನಲ್ಲಿ ಸೇಂಟ್ ಲೂಸಿಯಾ ಕಿಂಗ್ಸ್ ತಂಡದ ಸಹ-ಮಾಲೀಕರೂ ಆಗಿದ್ದಾರೆ.
ಹೊರಗಿನವರಿಗೆ ಮಾರಾಟಕ್ಕೆ ವಿರೋಧ?
ಬರ್ಮನ್ ಷೇರುಗಳ ಮಾರಾಟ ಮಾಡುವುದಕ್ಕೆ ಪ್ರೀತಿ ಝಿಂಟಾ ಯಾಕೆ ಆಕ್ಷೇಪ ಎತ್ತುತ್ತಿದ್ದಾರೆ ಎಂಬುದಕ್ಕೆ ಕಾರಣ ಅಸ್ಪಷ್ಟವಾಗಿದೆ. ಆದರೆ ಫ್ರಾಂಚೈಸಿ ಮಾಲೀಕರು ತಾವೇ ಈ ಮುನ್ನ ಮಾಡಿಕೊಂಡಿರುವ ಒಪ್ಪಂದದ ಅನ್ವಯ, ತಂಡದಲ್ಲಿ ಹೂಡಿಕೆ ಮಾಡಿರುವ ಷೇರುಗಳನ್ನು ಹಾಲಿ ಇರುವ ಸಹ-ಮಾಲೀಕರಿಗೆ ಮಾತ್ರ ಮಾರಾಟ ಮಾಡಲು ಅವಕಾಶವಿದೆ. ಅಲ್ಲದೆ, ಹಾಲಿ ಸಹ&ಮಾಲೀಕರು ಆ ಷೇರುಗಳನ್ನು ಖರೀದಿಸಲು ನಿರಾಕರಿಸಿದರೆ ಮಾತ್ರ ಬೇರೆಯವರಿಗೆ ಮಾರಾಟ ಮಾಡಲು ಅವಕಾಶವಿದೆ ಎನ್ನಲಾಗಿದೆ.
