ಎಂದೂ ಬೌಲ್​ ಮಾಡದ ರಿಂಕುಗೆ 19ನೇ ಓವರ್​ ಕೊಟ್ಟಿದ್ಯಾಕೆ? ಪ್ಲಾನ್ ಬಹಿರಂಗಪಡಿಸಿದ ಕ್ಯಾಪ್ಟನ್ ಸೂರ್ಯ

ಶ್ರೀಲಂಕಾ ವಿರುದ್ಧದ ಮೂರು ಪಂದ್ಯಗಳ ಟಿ20 ಸರಣಿ ಕೈಗೊಂಡಿದ್ದ ಟೀಮ್ ಇಂಡಿಯಾ, ನಿನ್ನೆ (ಜು.30) ನಡೆದ ಮೂರನೇ ಪಂದ್ಯದಲ್ಲಿ ಸೂಪರ್​ ಓವರ್​ನಲ್ಲಿ ರೋಚಕ ಜಯ ಸಾಧಿಸಿತು. ಲಂಕಾ ಪಡೆಯನ್ನು 3-0 ಅಂತರದಿಂದ ಕ್ಲೀನ್​ ಸ್ವೀಪ್ ಮಾಡಿದ ಭಾರತ, ಇದೀಗ ಟಿ20 ಸರಣಿ ವಶಪಡಿಸಿಕೊಂಡಿದೆ. ಮಿಸ್ಟರ್ 360 ಸೂರ್ಯಕುಮಾರ್ ಯಾದವ್ ನಾಯಕತ್ವದಲ್ಲಿ ಸರಣಿ ಗೆದ್ದಿರುವ ಟೀಮ್ ಇಂಡಿಯಾ ಮುಂಬರುವ ಶ್ರೀಲಂಕಾ ವಿರುದ್ಧದ ಏಕದಿನ ಸಿರೀಸ್​ ಗೆಲ್ಲಲು ಎದುರುನೋಡುತ್ತಿದೆ. ಈ ಮಧ್ಯೆ ಕ್ರಿಕೆಟ್ ಪ್ರಿಯರನ್ನು ಅಕ್ಷರಶಃ ಬೆರಗಾಗಿಸಿದ್ದು ರಿಂಕು ಸಿಂಗ್ ಬೌಲಿಂಗ್ ದಾಳಿ! ಶ್ರೀಲಂಕಾ ವಿರುದ್ಧದ ಪಂದ್ಯದಲ್ಲಿ 19ನೇ ಓವರ್​ ಬೌಲ್ ಮಾಡಿದ ರಿಂಕು, ತಂಡದ ಗೆಲುವಿನಲ್ಲಿ ಪ್ರಮುಖ ಪಾತ್ರವಹಿಸಿದರು.

ಇದನ್ನೂ ಓದಿ: 250 ಕಿ.ಮೀ ಪ್ರಯಾಣಿಸಿ ಮಾಲೀಕನನ್ನು ಹುಡುಕಿದ ಸಾಕುನಾಯಿ! ಹೂವಿನ ಹಾರ, ಸಿಹಿ ಹಂಚಿ ಗ್ರಾಮಸ್ಥರು ಸಂಭ್ರಮ

ಟಾಸ್​ ಗೆದ್ದು ಮೊದಲು ಬೌಲಿಂಗ್ ಆಯ್ದುಕೊಂಡಿದ್ದ ಶ್ರೀಲಂಕಾ, ಭಾರತಕ್ಕೆ ಬ್ಯಾಟ್ ಮಾಡುವಂತೆ ತಿಳಿಸಿತು. 20 ಓವರ್​ಗಳಲ್ಲಿ ಟೀಮ್ ಇಂಡಿಯಾ 9 ವಿಕೆಟ್ ನಷ್ಟಕ್ಕೆ 137 ರನ್ ಕಲೆಹಾಕಿತು. ಈ ಗುರಿಯನ್ನು ಬೆನ್ನಟ್ಟಿದ ಲಂಕಾ ಪಡೆ 8 ವಿಕೆಟ್ ನಷ್ಟಕ್ಕೆ 137 ರನ್ ಗಳಿಸುವ ಮುಖೇನ ಪಂದ್ಯ ಟೈ ಮಾಡಿತು. ಇದರ ಬೆನ್ನಲ್ಲೇ ನಡೆದ ಸೂಪರ್​ಓವರ್​ನಲ್ಲಿ ಭಾರತ ರೋಚಕ ಗೆಲುವು ದಾಖಲಿಸಿತು. ಮೂರು ಮ್ಯಾಚ್​ಗಳಲ್ಲಿ ಜಯ ಸಾಧಿಸಿದ ಟೀಮ್ ಇಂಡಿಯಾ ಟಿ20 ಸರಣಿ ವಶಪಡಿಸಿಕೊಂಡಿತು. ಗೆಲುವಿನ ಬಗ್ಗೆ ಮುಕ್ತವಾಗಿ ಮಾತನಾಡಿದ ಕ್ಯಾಪ್ಟನ್ ಸೂರ್ಯಕುಮಾರ್​ ಯಾದವ್​, ತಾನು ಯಾವ ಕಾರಣಕ್ಕೆ 19ನೇ ಓವರ್​ನ ರಿಂಕುಗೆ ಹಸ್ತಾಂತರಿಸಿದೆ ಎಂಬುದರ ಹಿಂದಿದ್ದ ಕಾರಣವನ್ನು ಬಿಚ್ಚಿಟ್ಟಿದ್ದಾರೆ.

ಇನ್ನು ಒಂದು ಓವರ್ ಬಾಕಿ ಉಳಿಸಿಕೊಂಡಿದ್ದ ವೇಗಿ ಮೊಹಮ್ಮದ್​ ಸಿರಾಜ್​ನ ಕೈಬಿಟ್ಟು ಎಂದೂ ಬೌಲ್ ಮಾಡದ ರಿಂಕು ಸಿಂಗ್​ಗೆ ಬಾಲ್ ಕೊಟ್ಟ ಸೂರ್ಯಕುಮಾರ್ ಯಾದವ್​, "ಈ ಪಿಚ್​ ಕಂಡೀಷನ್​ಗೆ ಬಲಗೈ ಸ್ಪಿನ್​ ಬಹಳ ಅಗತ್ಯವಿತ್ತು. 20ನೇ ಓವರ್​ ಯಾರು ಮಾಡಬೇಕೆಂಬುದು ನೇರವಾಗಿತ್ತು. ಆದ್ರೆ, 19ನೇ ಓವರ್ ಮಾತ್ರ ಸಿಕ್ಕಾಪಟ್ಟೆ ಚಾಲೆಂಜಿಂಗ್ ಆಗಿತ್ತು" ಎಂದರು.

ಇದನ್ನೂ ಓದಿ: ಮೊರಾರ್ಜಿ ನಗರ ರಸ್ತೆ ಅಭಿವೃದ್ಧಿಪಡಿಸಿ, ಶಾಸಕ ಬೆಲ್ಲದಗೆ ಕ್ಷೇಮಾಭಿವೃದ್ಧಿ ಸಂಘದ ಮನವಿ

"ಆಗ ನನಗನಿಸಿದ್ದು ಇದಕ್ಕೆ ರಿಂಕುನೇ ಸೂಕ್ತ ಎಂದು. ಅಭ್ಯಾಸದ ಪಂದ್ಯಗಳಲ್ಲಿ ಅವರ ಬೌಲಿಂಗ್ ನೋಡಿದ್ದೆ. ಹೀಗಾಗಿ ನನ್ನ ನಿರ್ಧಾರದ ಮೇಲೆ ನನಗೆ ಬಲವಾದ ನಂಬಿಕೆ ಇತ್ತು. ಅದೇ ಧೈರ್ಯದಿಂದ​ ಅವರಿಗೆ ಬಾಲ್ ಕೊಟ್ಟಿದ್ದು, ಮುಂದೆ ಏನಾಯ್ತು ಎಂಬುದು ನಿಮಗೆ ತಿಳಿದಿದೆ. ನನ್ನ ಕೆಲಸವನ್ನು ರಿಂಕು ತುಂಬ ಸುಲಭ ಮಾಡಿಬಿಟ್ಟರು" ಎಂದು ರಿಂಕು ಸಂತಸ ವ್ಯಕ್ತಪಡಿಸಿದರು,(ಏಜೆನ್ಸೀಸ್).

https://www.vijayavani.net/dog-travels-250-km-to-meet-his-owner