ಭಾರತ ಟೆಸ್ಟ್​ ತಂಡದ ಭವಿಷ್ಯದ ನಾಯಕ ಯಾರು? ಬಾಂಗ್ಲಾ ಸರಣಿಗೆ ಉಪನಾಯಕನನ್ನು ನೇಮಿಸದ ಕಾರಣ ಹೆಚ್ಚಿದೆ ಗೊಂದಲ!

ನವದೆಹಲಿ: ಪ್ರವಾಸಿ ಬಾಂಗ್ಲಾದೇಶ ವಿರುದ್ಧದ ಟೆಸ್ಟ್​ ಸರಣಿಗೆ ಈಗಾಗಲೆ ರೋಹಿತ್​ ಶರ್ಮ ಸಾರಥ್ಯದ ಭಾರತ ತಂಡವನ್ನು ಪ್ರಕಟಿಸಲಾಗಿದೆ. ಆದರೆ 16 ಆಟಗಾರರ ತಂಡವನ್ನು ಭಾನುವಾರ ರಾತ್ರಿ ಹೆಸರಿಸಿದ ಸಂದರ್ಭದಲ್ಲಿ ಬಿಸಿಸಿಐ, ಉಪನಾಯಕ ಯಾರು ಎಂಬುದನ್ನು ಸ್ಪಷ್ಟಪಡಿಸಿಲ್ಲ. ಇದು ಭಾರತ ಟೆಸ್ಟ್​ ತಂಡದ ಭವಿಷ್ಯದ ನಾಯಕ ಯಾರು ಎಂಬ ಗೊಂದಲವನ್ನೂ ಹೆಚ್ಚಿಸಿದೆ.

ಟಿ20 ವಿಶ್ವಕಪ್​ ಗೆಲುವಿನ ಬೆನ್ನಲ್ಲೇ ಸೂರ್ಯಕುಮಾರ್​ ಯಾದವ್​, ಹಾರ್ದಿಕ್​ ಪಾಂಡ್ಯರನ್ನು ಹಿಂದಿಕ್ಕಿ ಚುಟುಕು ಕ್ರಿಕೆಟ್​ ತಂಡದ ಹೊಸ ನಾಯಕರಾಗಿ ನೇಮಕಗೊಂಡಿದ್ದಾರೆ. ಏಕದಿನ ತಂಡಕ್ಕೆ ರೋಹಿತ್​ ಶರ್ಮ ನಾಯಕರಾಗಿ ಮುಂದುವರಿದಿದ್ದರೂ, ಶುಭಮಾನ್​ ಗಿಲ್​ ಹೊಸ ಉಪನಾಯಕರಾಗಿ ನೇಮಕಗೊಂಡಿರುವುದರಿಂದ ಭವಿಷ್ಯದ ನಾಯಕರಾಗಿಯೂ ಗುರುತಿಸಲ್ಪಟ್ಟಿದ್ದಾರೆ. ಇದೇ ವೇಳೆ ರೋಹಿತ್​ ಶರ್ಮ ಕನಿಷ್ಠ 2025ರ ಐಸಿಸಿ ವಿಶ್ವ ಟೆಸ್ಟ್​ ಚಾಂಪಿಯನ್​ಷಿಪ್​ ೈನಲ್​ ತನಕ ಟೆಸ್ಟ್​ ತಂಡದ ನಾಯಕರಾಗಿಯೂ ಮುಂದುವರಿಸುವುದು ಸ್ಪಷ್ಟವಾಗಿದೆ. ಆದರೆ ಟೆಸ್ಟ್​ ತಂಡಕ್ಕೆ ಉಪನಾಯಕನನ್ನು ನೇಮಿಸದಿರುವುದರಿಂದ ಭವಿಷ್ಯದಲ್ಲಿ ಸಾರಥ್ಯ ವಹಿಸಿಕೊಳ್ಳುವವರು ಯಾರು ಎಂಬ ಗೊಂದಲ ಮುಂದುವರಿದಿದೆ.

ಕಳೆದ ಇಂಗ್ಲೆಂಡ್​ ವಿರುದ್ಧದ ಟೆಸ್ಟ್​ ಸರಣಿಯ ವೇಳೆ ವೇಗಿ ಜಸ್​ಪ್ರೀತ್​ ಬುಮ್ರಾ ತಂಡದ ಉಪನಾಯಕರಾಗಿದ್ದರು. ಇದೀಗ ಬಾಂಗ್ಲಾ ಸರಣಿಗೆ ಬುಮ್ರಾ ಮರಳಿದ್ದರೂ, ಅವರನ್ನು ಉಪನಾಯಕರನ್ನಾಗಿ ಹೆಸರಿಸಲಾಗಿಲ್ಲ.

ಕನ್ನಡಿಗ ಕೆಎಲ್​ ರಾಹುಲ್​ ಈ ಹಿಂದೆ ಟೆಸ್ಟ್​ ಕ್ರಿಕೆಟ್​ನಲ್ಲೂ ಹಂಗಾಮಿ ನಾಯಕತ್ವ ವಹಿಸಿದ್ದರು. ರಿಷಭ್​ ಪಂತ್​ ಕೂಡ 2022ರಲ್ಲಿ ಅಪಘಾತದಲ್ಲಿ ಗಾಯಕ್ಕೊಳ್ಳುವುದಕ್ಕೆ ಮುನ್ನ ಟೆಸ್ಟ್​ ತಂಡದ ಭವಿಷ್ಯದ ನಾಯಕರಾಗಿ ಗುರುತಿಸಲ್ಪಟ್ಟಿದ್ದರು. ಇವರಿಬ್ಬರೂ ಕೂಡ ಬಾಂಗ್ಲಾ ಸರಣಿಗೆ ತಂಡದಲ್ಲಿ ಸ್ಥಾನ ಪಡೆದಿದ್ದರೂ, ಉಪನಾಯಕನ ಜವಾಬ್ದಾರಿಯನ್ನು ನೀಡಲಾಗಿಲ್ಲ.

ಬುಮ್ರಾರನ್ನು ಉಪನಾಯಕನ ಸ್ಥಾನದಲ್ಲಿ ಮುಂದುವರಿಸದಿರುವುದು ಅವರನ್ನು ಭವಿಷ್ಯದ ನಾಯಕನಾಗಿ ಪರಿಗಣಿಸದಿರುವ ಸೂಚನೆ ಎನ್ನಲಾಗುತ್ತಿದೆ. ಕಾರ್ಯದೊತ್ತಡದ ಕಾರಣ ನೀಡಿ ಹಾರ್ದಿಕ್​ ಪಾಂಡ್ಯಕ್ಕೆ ಟಿ20 ತಂಡದ ಪೂರ್ಣಪ್ರಮಾಣದ ನಾಯಕತ್ವ ನೀಡದಿರುವಂತೆಯೇ, ಬುಮ್ರಾಗೂ ಕಾರ್ಯದೊತ್ತಡ ತಗ್ಗಿಸಲು ಟೆಸ್ಟ್​ ನಾಯಕತ್ವ ನೀಡಲಾಗುತ್ತಿಲ್ಲ ಎನ್ನಲಾಗಿದೆ.

2022ರಲ್ಲಿ ಇಂಗ್ಲೆಂಡ್​ ವಿರುದ್ಧದ ಏಕೈಕ ಟೆಸ್ಟ್​ ಮತ್ತು 2023ರಲ್ಲಿ ಐರ್ಲೆಂಡ್​ ವಿರುದ್ಧದ ಟಿ20 ಸರಣಿಯಲ್ಲಿ ಬುಮ್ರಾ ಭಾರತ ತಂಡದ ನಾಯಕರಾಗಿದ್ದರು. ಆದರೆ ಫಿಟ್ನೆಸ್​ ಮತ್ತು ವಿಶ್ರಾಂತಿಯ ಕಾರಣದಿಂದಾಗಿ ಬುಮ್ರಾ ಆಗಾಗ ಕೆಲ ಪಂದ್ಯಗಳನ್ನು ತಪ್ಪಿಸಿಕೊಳ್ಳುವುದರಿಂದ, ಹೊಸ ಕೋಚ್​ ಗೌತಮ್​ ಗಂಭೀರ್​ ಅಧಿಕಾರಾವಧಿಯಲ್ಲಿ ಅವರನ್ನು ನಾಯಕತ್ವಕ್ಕೆ ಪರಿಗಣಿಸಲಾಗುವುದಿಲ್ಲ ಎನ್ನಲಾಗಿದೆ.

ಗಂಭೀರ್​ ಕೋಚ್​ ಆಗಿ ಅಧಿಕಾರ ಸ್ವೀಕರಿಸಿದ ಬೆನ್ನಲ್ಲೇ ಯುವ ಆರಂಭಿಕ ಶುಭಮಾನ್​ ಗಿಲ್​ ಟಿ20&ಏಕದಿನ ತಂಡದ ಉಪನಾಯಕರಾಗಿ ಅಧಿಕೃತವಾಗಿ ನೇಮಕಗೊಂಡಿದ್ದರು. ಟೆಸ್ಟ್​ ಸರಣಿಗೂ ಅವರನ್ನೇ ಉಪನಾಯಕರನ್ನಾಗಿ ನೇಮಿಸಿದ್ದರೆ ಮೂರೂ ಪ್ರಕಾರದ ತಂಡಕ್ಕೆ ಒಬ್ಬರೇ ಉಪನಾಯಕ ಮತ್ತು ಭವಿಷ್ಯದ ನಾಯಕ ಆದಂತಾಗುತಿತ್ತು. ಆದರೆ ಟೆಸ್ಟ್​ ತಂಡದ ಆಡುವ 11ರ ಬಳಗದಲ್ಲಿ ಗಿಲ್​ ಸ್ಥಾನ ಇನ್ನೂ ಭದ್ರವಾಗಿಲ್ಲ. ಯುವ ಎಡಗೈ ಬ್ಯಾಟರ್​ ಯಶಸ್ವಿ ಜೈಸ್ವಾಲ್​, ನಾಯಕ ರೋಹಿತ್​ ಶರ್ಮ ಜತೆಗೆ ಮೊದಲ ಆಯ್ಕೆಯ ಆರಂಭಿಕರಾಗಿರುತ್ತಾರೆ. ಕಳೆದ ಇಂಗ್ಲೆಂಡ್​ ವಿರುದ್ಧದ ಸರಣಿಯಂತೆ ಗಿಲ್​ ಈ ಬಾರಿ ಮತ್ತೆ 3ನೇ ಕ್ರಮಾಂಕದಲ್ಲಿ ಆಡಬಹುದು. ಹೀಗಾಗಿ ಗಿಲ್​ರನ್ನು ಟೆಸ್ಟ್​ ತಂಡಕ್ಕೂ ಉಪನಾಯಕರನ್ನಾಗಿ ನೇಮಿಸುವ ಮುನ್ನ ಗಂಭೀರ್​ ಮತ್ತು ಆಯ್ಕೆ ಸಮಿತಿ ಅಧ್ಯಕ್ಷ ಅಜಿತ್​ ಅಗರ್ಕರ್​ ಸ್ವಲ್ಪ ಸಮಯ ತೆಗೆದುಕೊಳ್ಳಲಿದ್ದಾರೆ ಎನ್ನಲಾಗಿದೆ.

https://www.vijayavani.net/pro-kabaddi-league-11th-edition-schedule-announced-the-fight-of-the-stars-in-the-first-match