ವಿಶ್ವಕಪ್​ ಆರಂಭಕ್ಕೂ ಮುನ್ನವೇ ರಾಜೀವ್​ ಗಾಂಧಿ ಸ್ಟೇಡಿಯಂನಲ್ಲಿ ಕೊಳಕು ಸೀಟುಗಳ ದರ್ಶನ: ವಿಡಿಯೋ ವೈರಲ್​

ಹೈದರಾಬಾದ್​: ಇಂದಿನಿಂದ ಭಾರತದಲ್ಲಿ ವಿಶ್ವಕಪ್​ ಮಹಾಹಬ್ಬ ಶುರುವಾಗಲಿದೆ. ಆದರೆ, ಅದಕ್ಕೂ ಮುನ್ನವೇ ಹೈದರಾಬಾದ್​ನ ರಾಜೀವ್​ ಗಾಂಧಿ ಅಂತಾರಾಷ್ಟ್ರೀಯ ಕ್ರೀಡಾಂಗಣದಲ್ಲಿರುವ ಕೊಳಕು ಸೀಟುಗಳ ಫೋಟೋ ಮತ್ತು ವಿಡಿಯೋಗಳು ಸಾಮಾಜಿಕ ಜಾಲತಾಣದಲ್ಲಿ ವೈರಲ್​ ಆಗಿದ್ದು, ಅಲ್ಲಿನ ಆಡಳಿತ ಮಂಡಳಿ ವಿರುದ್ಧ ನೆಟ್ಟಿಗರು ಆಕ್ರೋಶ ಹೊರ ಹಾಕಿದ್ದಾರೆ.

ಗಮನಾರ್ಹ ಸಂಗತಿ ಏನೆಂದರೆ ಹೈದರಾಬಾದ್​ನ ಉಪ್ಪಾಳದಲ್ಲಿರುವ ರಾಜೀವ್​ ಗಾಂಧಿ ಸ್ಟೇಡಿಯಂನಲ್ಲಿ ವಿಶ್ವಕಪ್​ ಟೂರ್ನಿಯ ಮೂರು ಪಂದ್ಯಗಳು ನಡೆಯಲಿವೆ.

ಕ್ರಿಕೆಟ್​ ಬರಹಗಾರ, ವಿಮರ್ಶಕ ಮತ್ತು ವೀಕ್ಷಕ ವಿವರಣೆಗಾರ ಸಿ.ವೆಂಕಟೇಶ್ ಅವರು ಸ್ಟೇಡಿಯಂನ ಸೀಟುಗಳ ಸ್ಥಿತಿಯನ್ನು ಪ್ರದರ್ಶಿಸುವ ಅನೇಕ ಫೋಟೋ ಮತ್ತು ವಿಡಿಯೋಗಳನ್ನು ಶೇರ್​ ಮಾಡಿದ್ದಾರೆ. ಅದರಲ್ಲಿ ಕ್ರೀಡಾಭಿಮಾನಿಗಳು ಕುಳಿತುಕೊಳ್ಳುವ ಸೀಟುಗಳು ಪಕ್ಷಿಗಳ ಹಿಕ್ಕೆಗಳಿಂದ​ಲೇ ತುಂಬಿ ಹೋಗಿವೆ. ನಿನ್ನೆ (ಅ.04) ಆಸ್ಟ್ರೇಲಿಯಾ ಮತ್ತು ಪಾಕಿಸ್ತಾನದ ನಡುವೆ ಇದೇ ಸ್ಟೇಡಿಯಂನಲ್ಲಿ ಅಭ್ಯಾಸ ಪಂದ್ಯ ನಡೆಯಿತು. ಈ ವೇಳೆ ಕೊಳಕು ಸೀಟುಗಳ ದರ್ಶನವಾಗಿದೆ.

ಉಪ್ಪಾಳ್​ ಸ್ಟೇಡಿಯಂನಲ್ಲಿ ಯಾವುದು ಬದಲಾವಣೆಯಾಗಿಲ್ಲ. ಕೆಲವು ವಿಂಡೋ ಡ್ರೆಸ್ಸಿಂಗ್ ಮತ್ತು ಪ್ರೇಕ್ಷಕರ ಮೂಲಸೌಕರ್ಯವನ್ನು ಮಾತ್ರ ಪೂರ್ಣವಾಗಿ ಕಾಳಜಿ ವಹಿಸಲಾಗಿಲ್ಲ ಎಂದು ವೆಂಕಟೇಶ್​ ಅವರು ಸ್ಟೇಡಿಯಂ ಮತ್ತು ಕೊಳಕು ಸೀಟುಗಳು ಫೋಟೋವನ್ನು ಶೇರ್​ ಮಾಡಿಕೊಂಡು ಅಸಮಾಧಾನ ಹೊರಹಾಕಿದ್ದಾರೆ.

ಇದನ್ನೂ ಓದಿ: ಇಂದಿನಿಂದ ಏಕದಿನ ವಿಶ್ವಕಪ್​; ಹೇಗಿದೆ ಎಲ್ಲ 10 ತಂಡಗಳ ಬಲಾಬಲ? ಯಾರು ಫೇವರಿಟ್​?

ಅನೇಕರು ಫೋಟೋದ ಅಧಿಕೃತತೆಯ ಬಗ್ಗೆ ವೆಂಕಟೇಶ್​ ಅವರನ್ನು ಪ್ರಶ್ನೆ ಮಾಡಿದ್ದು, ಮತ್ತೊಂದು ಫೋಟೋ ಶೇರ್​ ಮಾಡುವ ಮೂಲಕ ತಮ್ಮ ನಿಲುವನ್ನು ಸಮರ್ಥಿಸಿಕೊಂಡಿದ್ದಾರೆ. ಅಲ್ಲದೆ, ಪಂದ್ಯದ ನಡುವೆ ಕೊಳಕು ಸೀಟುಗಳ ದೃಶ್ಯಗಳುಳ್ಳ ವಿಡಿಯೋವನ್ನು ಸಹ ಶೇರ್​ ಮಾಡುವ ಮೂಲಕ ಪ್ರಶ್ನಿಸಿದವರಿಗೆ ಸಾಕ್ಷಿ ಸಮೇತ ಉತ್ತರ ನೀಡಿದ್ದಾರೆ.

ನಾನು ಶೇರ್​ ಮಾಡಿದ ಫೋಟೋಗಳು ಹಳೆಯದು ಎಂದವರಿಗೆ ಈ ಫೋಟೋಗಳು. ನಾನು ಮೈದಾನದಲ್ಲಿ ತುಂಬಾ ಪ್ರಸ್ತುತನಾಗಿದ್ದೆ ಎಂದು ವೆಂಕಟೇಶ್​ ಬರೆದುಕೊಂಡಿದ್ದಾರೆ. ಆದರೆ, ದೇಶದ ಹೊರಗಿರುವ ಕೆಲವರು ಇದನ್ನೇ ಬಂಡವಾಳ ಮಾಡಿಕೊಂಡು ಭಾರತವನ್ನು ದೂಷಿಸುತ್ತಿದ್ದಾರೆ. ಅವರಿಗೆ ಹೇಳಬಯಸುವುದೇನೆಂದರೆ, ಇಡೀ ಸ್ಟೇಡಿಯಂ ಈ ರೀತಿ ಇಲ್ಲ. ಕೊಳಕು ಆಸನಗಳು ಪಶ್ಚಿಮ ಟೆರೇಸ್‌ನಲ್ಲಿ ಮಾತ್ರ ಕಂಡುಬಂದವು. ಆದರೆ, ಉಳಿದ ಕ್ರೀಡಾಂಗಣವನ್ನು ಹೊಚ್ಚ ಹೊಸ ಸೀಟುಗಳೊಂದಿಗೆ ನವೀಕರಿಸಲಾಗಿದೆ ಎಂದು ಸ್ಪಷ್ಟಪಡಿಸಿದರು.

ವಿಶ್ವಕಪ್​ಗು ಮೊದಲು ಎಲ್ಲ ಕುರ್ಚಿಗಳನ್ನು ಬದಲಾಯಿಸಲು ಹೈದರಾಬಾದ್​ ಕ್ರಿಕೆಟ್​ ಅಸೊಸಿಯೇಸನ್​ಗೆ ಸಾಕಷ್ಟು ಸಮಯ ಇಲ್ಲದಿರುವಂತೆ ಕಾಣುತ್ತದೆ. ಆದರೆ, ಪಂದ್ಯಕ್ಕೂ ಮುನ್ನ ಹಳೆಯ ಕುರ್ಚಿಗಳನ್ನು ಸ್ವಚ್ಛಗೊಳಿಸಲಾಗಿದೆ. ಸ್ಟೇಡಿಯಂನಲ್ಲಿನ ಉಳಿದ ಸೌಲಭ್ಯಗಳು ಅತ್ಯುತ್ತಮವಾಗಿದ್ದು, ಭಾರತದ ಆತಿಥ್ಯ ಸಾಮರ್ಥ್ಯದ ಬಗ್ಗೆ ಯಾರಿಗೂ ಯಾವುದೇ ಅನುಮಾನ ಬೇಡ ಎಂದು ವೆಂಕಟೇಶ್​ ಹೇಳಿದ್ದಾರೆ.

ಅಂದಹಾಗೆ 2023ರ ಐಸಿಸಿ ವಿಶ್ವಕಪ್‌ಗೂ ಮುಂಚಿತವಾಗಿ ಹತ್ತು ಅಭ್ಯಾಸ ಪಂದ್ಯಗಳಲ್ಲಿ ಎರಡು ಪಂದ್ಯಗಳನ್ನು ಹೈದರಾಬಾದ್​ ಆಯೋಜಿಸಿತ್ತು. 15 ಎಕರೆಗಳಷ್ಟು ವಿಸ್ತಾರವಾದ ರಾಜೀವ್​ ಗಾಂಧಿ ಕ್ರೀಡಾಂಗಣವು 39,200 ಆಸನ ಸಾಮರ್ಥ್ಯವನ್ನು ಹೊಂದಿದೆ. (ಏಜೆನ್ಸೀಸ್​)

https://www.vijayavani.net/central-teams-drought-study-from-today

https://www.vijayavani.net/peaceful-life-is-beautiful