ಬೆಂಗಳೂರು: ಟೀಮ್ ಇಂಡಿಯಾ ಪರ 2006ರಲ್ಲೇ ಪದಾರ್ಪಣೆ ಮಾಡಿದ್ದ ಕನ್ನಡಿಗ ರಾಬಿನ್ ಉತ್ತಪ್ಪ, ಭಾರಿ ಭರವಸೆ ಮೂಡಿಸಿದ್ದರು. 20ನೇ ವಯಸ್ಸಿನಲ್ಲೇ ಭಾರತ ಪರ ಮೊದಲ ಪಂದ್ಯವಾಡಿದ್ದ ಕೊಡಗಿನ ಕುವರ ಮೊದಲ ಏಕದಿನ ಪಂದ್ಯದಲ್ಲೇ 96 ಎಸೆತಗಳಲ್ಲಿ 86 ರನ್ ಸಿಡಿಸಿ ಗಮನ ಸೆಳೆದಿದ್ದರು. ಆಗ ಇದು ಪದಾರ್ಪಣೆಯ ಪಂದ್ಯದಲ್ಲಿ ಭಾರತದ ಬ್ಯಾಟ್ಸ್ಮನ್ನ ಗರಿಷ್ಠ ಗಳಿಕೆಯಾಗಿತ್ತು. ಬಳಿಕ 2007ರಲ್ಲಿ ಟಿ20 ವಿಶ್ವಕಪ್ ಜಯಿಸಿದ ಭಾರತ ತಂಡದ ಭಾಗವೂ ಆಗಿದ್ದರು. ಆದರೆ, ಅವರು ಇದುವರೆಗೆ ಆಡಿರುವುದು 46 ಏಕದಿನ ಮತ್ತು 13 ಟಿ20 ಪಂದ್ಯಗಳನ್ನು ಮಾತ್ರ. ಸುದೀರ್ಘ ಕಾಲ ಭಾರತ ತಂಡದ ಪರ ಆಡದೆ ಇರುವುದಕ್ಕೆ ಭಾರಿ ವಿಷಾದವನ್ನು ಹೊಂದಿರುವ ಅವರು, ತಮಗೆ ಯಾಕೆ ಹೆಚ್ಚಿನ ಪಂದ್ಯಗಳನ್ನು ಆಡಲು ಸಾಧ್ಯವಾಗಲಿಲ್ಲ ಎಂಬುದಕ್ಕೆ ಕಾರಣಗಳನ್ನೂ ವಿವರಿಸಿದ್ದಾರೆ.
