ಪ್ರಶಸ್ತಿ ಸುತ್ತಿಗೇರಿದ ಬಾಂಗ್ಲಾ: ಫೈನಲ್​ನಲ್ಲಿ ಭಾರತದ ಕಿರಿಯರಿಗೆ ಎದುರಾಳಿ

ಪಾಟ್​ಚೆಫ್​ಸ್ಟ್ರೋಮ್(​ದಕ್ಷಿಣಆಫ್ರಿಕಾ): ಮೊಹಮದುಲ್ ಹಸನ್ ಜಯ್ (100 ರನ್, 127 ಎಸೆತ, 13 ಬೌಂಡರಿ) ಶತಕ ಹಾಗೂ ಸಂಘಟಿತ ಬೌಲಿಂಗ್ ನೆರವಿನಿಂದ ಬಾಂಗ್ಲಾದೇಶ ತಂಡ 19 ವಯೋಮಿತಿ ಏಕದಿನ ಕ್ರಿಕೆಟ್ ವಿಶ್ವಕಪ್​ನಲ್ಲಿ ಚೊಚ್ಚಲ ಬಾರಿಗೆ ಪ್ರಶಸ್ತಿ ಸುತ್ತಿಗೇರಿತು. ಸೆನ್ವೇಸ್ ಪಾರ್ಕ್​ನಲ್ಲಿ ಗುರುವಾರ ನಡೆದ ಸೆಮಿಫೈನಲ್ ಪಂದ್ಯದಲ್ಲಿ ಬಾಂಗ್ಲಾ ತಂಡ 6 ವಿಕೆಟ್​ಗಳಿಂದ ನ್ಯೂಜಿಲೆಂಡ್ ತಂಡವನ್ನು ಮಣಿಸಿತು. ಭಾನುವಾರ ನಡೆಯಲಿರುವ ಫೈನಲ್ ಪಂದ್ಯದಲ್ಲಿ ಹಾಲಿ ಚಾಂಪಿಯನ್ ಭಾರತ ತಂಡವನ್ನು ಬಾಂಗ್ಲಾ ಎದುರಿಸಲಿದೆ.

ಮೊದಲು ಬ್ಯಾಟಿಂಗ್ ಮಾಡಿದ ನ್ಯೂಜಿಲೆಂಡ್ 8 ವಿಕೆಟ್​ಗೆ 211 ರನ್​ಗಳಿಸಿತು. ಪ್ರತಿಯಾಗಿ ಬಾಂಗ್ಲಾದೇಶ ತಂಡ 44.1 ಓವರ್​ಗಳಲ್ಲಿ 4 ವಿಕೆಟ್​ಗೆ 215 ರನ್ ಕಲೆಹಾಕಿ ಜಯದ ನಗೆ ಬೀರಿತು. ಬಾಂಗ್ಲಾದೇಶ ಕ್ವಾರ್ಟರ್​ಫೈನಲ್​ನಲ್ಲಿ ಆತಿಥೇಯ ದಕ್ಷಿಣ ಆಫ್ರಿಕಾ ತಂಡವನ್ನು ಮಣಿಸಿತ್ತು. ಬಾಂಗ್ಲಾ ತಂಡ 2016ರಲ್ಲಿ ತವರಲ್ಲಿ ನಡೆದ ವಿಶ್ವಕಪ್​ನಲ್ಲಿ ಸೆಮೀಸ್​ಗೇರಿದ್ದು ಇದುವರೆಗಿನ ಉತ್ತಮ ನಿರ್ವಹಣೆಯಾಗಿತ್ತು.

ನ್ಯೂಜಿಲೆಂಡ್: 8 ವಿಕೆಟ್​ಗೆ 211 (ವೀಲರ್ ಗ್ರೀನಾಲ್ 75*, ಲಿಡ್​ಸ್ಟೋನ್ 44, ಶೋರಿಫುಲ್ ಇಸ್ಲಾಂ 45ಕ್ಕೆ 3, ಮುರಾದ್ 34ಕ್ಕೆ 2, ಶಮಿಮ್ ಹುಸೇನ್ 31ಕ್ಕೆ 2), ಬಾಂಗ್ಲಾದೇಶ: 44.1 ಓವರ್​ಗಳಲ್ಲಿ 4 ವಿಕೆಟ್​ಗೆ 215 ( ಹಸನ್ ಜಯ್ 100, ತೌಹಿದ್ ಹ್ರಿಡೊಯ್ 40, ಶಾಹದತ್ ಹುಸೇನ್ 40*, ಆದಿತ್ಯ ಅಶೋಕ 44ಕ್ಕೆ 1).