ಐಪಿಎಲ್​ ನಡುವೆ ತ್ರಿಕೋನ, ದ್ವಿಪಕ್ಷೀಯ ಸರಣಿ! ಬಿಸಿಸಿಐ ಕಾಲೆಳೆದ ಕ್ರಿಕೆಟ್​ ಫ್ಯಾನ್ಸ್​!

ಬೆಂಗಳೂರು: ಈ ಸಲದ ಐಪಿಎಲ್​ ಟೂರ್ನಿಯ ವೇಳಾಪಟ್ಟಿಯಲ್ಲಿ ಕೆಲ ಎಡವಟ್ಟಾಗಿರುವುದು ಸ್ಪಷ್ಟವಾಗಿದೆ. ಇದರಿಂದಾಗಿ ಬಿಸಿಸಿಐ, ಐಪಿಎಲ್​ ಟೂರ್ನಿಯ ನಡುವೆ ಮುಂಬೈ, ಸನ್​ರೈಸರ್ಸ್​, ಸಿಎಸ್​ಕೆ ನಡುವೆ "ತ್ರಿಕೋನ ಸರಣಿ' ಮತ್ತು ಆರ್​ಸಿಬಿ-ಪಂಜಾಬ್​ ನಡುವೆ "ದ್ವಿಪಕ್ಷೀಯ ಸರಣಿ'ಯೊಂದನ್ನು ಆಯೋಜಿಸಿದಂತೆ ಕಾಣಿಸುತ್ತಿದೆ ಎಂದು ಕ್ರಿಕೆಟ್ ಫ್ಯಾನ್ಸ್​ ಕಾಲೆಳೆದಿದ್ದಾರೆ.

ಆರ್​ಸಿಬಿ ತಂಡ ಇನ್ನು ಪಂಜಾಬ್​ ಎದುರು 3 ದಿನಗಳ ಅಂತರದಲ್ಲಿ 2 ಪಂದ್ಯಗಳನ್ನು ಆಡಲಿದೆ. ಏ.18ಕ್ಕೆ ತವರಿನಲ್ಲಿ ಪಂಜಾಬ್​ ವಿರುದ್ಧ ಆಡಲಿರುವ ಆರ್​ಸಿಬಿ 2 ದಿನಗಳ ಬಳಿಕ ಅಂದರೆ ಏ.20ರಂದು ಮುಲ್ಲನ್​ಪುರದಲ್ಲಿ ಮತ್ತೆ ಪಂಜಾಬ್​ ತಂಡವನ್ನೇ ಎದುರಿಸಲಿದೆ.

ಮತ್ತೊಂದೆಡೆ ಮುಂಬೈ ತನ್ನ ಮುಂದಿನ 3 ಪಂದ್ಯಗಳನ್ನು ಸನ್​ರೈಸರ್ಸ್​ (ಏ.17), ಸಿಎಸ್​ಕೆ (ಏ.20), ಸನ್​ರೈಸರ್ಸ್​ (ಏ.23) ವಿರುದ್ಧ ಆಡಲಿದ್ದರೆ, ಸನ್​ರೈಸರ್ಸ್​ ಮುಂದಿನ ಸತತ 2 ಪಂದ್ಯಗಳನ್ನು ಮುಂಬೈ ವಿರುದ್ಧವೇ ಏ.17 ಮತ್ತು 23ರಂದು ಆಡಲಿದೆ. ಸಿಎಸ್​ಕೆ ತಂಡ ತನ್ನ ಮುಂದಿನ 2 ಪಂದ್ಯಗಳನ್ನು ಮುಂಬೈ (ಏ.20), ಸನ್​ರೈಸರ್ಸ್​ (ಏ.25) ವಿರುದ್ಧ ಆಡಲಿದೆ. ಇದರಿಂದ ಮುಂದಿನ 9 ದಿನಗಳ ಅಂತರದಲ್ಲಿ ಈ 3 ತಂಡಗಳೇ ಪರಸ್ಪರ ಎದುರಾಗಲಿವೆ.

https://www.vijayavani.net/what-rishabh-pant-said-about-the-defeat-against-csk