51 ಎಸೆತಗಳಲ್ಲಿ 151 ರನ್​: ಟಿ20ಯಲ್ಲಿ ಗರಿಷ್ಠ ಸಿಕ್ಸರ್​ ವಿಶ್ವದಾಖಲೆ ಬರೆದ ಆರ್​ಸಿಬಿ ಮಾಜಿ ಆಟಗಾರ

ಓಕ್​ಲ್ಯಾಂಡ್​: ನ್ಯೂಜಿಲೆಂಡ್​ನ ಫಿನ್​ ಅಲೆನ್​ ಅಮೆರಿಕದ ಮೇಜರ್​ ಲೀಗ್​ ಕ್ರಿಕೆಟ್​ (ಎಂಎಲ್​ಸಿ) ಟಿ20 ಲೀಗ್​ನಲ್ಲಿ ಸ್ಯಾನ್​ ಸ್ಯಾನ್ ಫ್ರಾನ್ಸಿಸ್ಕೋ ಯೂನಿಕಾರ್ನ್ಸ್​ ತಂಡದ ಪರ ಒಂದೇ ಇನಿಂಗ್ಸ್​ನಲ್ಲಿ 19 ಸಿಕ್ಸರ್​ ಸಿಡಿಸುವ ಮೂಲಕ ನೂತನ ವಿಶ್ವದಾಖಲೆ ಬರೆದಿದ್ದಾರೆ. ಎಂಎಲ್​ಸಿ 3ನೇ ಆವೃತ್ತಿಯ ಉದ್ಘಾಟನಾ ಪಂದ್ಯದಲ್ಲಿ ಫಿನ್​ ಅಲೆನ್​ 51 ಎಸೆತಗಳಲ್ಲಿ 5 ಬೌಂಡರಿ, 19 ಸಿಕ್ಸರ್​ ಸಹಿತ 151 ರನ್​ ಸಿಡಿಸಿದರು. ಈ ಮೂಲಕ 5 ವಿಕೆಟ್​ಗೆ 269 ರನ್​ ಕಲೆಹಾಕಿದ ಸ್ಯಾನ್​ ಫ್ರಾನ್ಸಿಸ್ಕೋ ತಂಡ ವಾಷಿಂಗ್ಟನ್​ ಫ್ರೀಡಂ ವಿರುದ್ಧ 123 ರನ್​ಗಳಿಂದ ಗೆದ್ದು ಶುಭಾರಂಭ ಕಂಡಿತು.

2017ರಲ್ಲಿ ಕ್ರಿಸ್​ ಗೇಲ್​ ಬಾಂಗ್ಲಾ ಪ್ರೀಮಿಯರ್​ ಲೀಗ್​ನಲ್ಲಿ ಮತ್ತು ಈಸ್ಟೋನಿಯಾದ ಸಾಹಿಲ್​ ಚೌಹಾಣ್​ ಅಂತಾರಾಷ್ಟ್ರೀಯ ಪಂದ್ಯದಲ್ಲಿ ತಲಾ 18 ಸಿಕ್ಸರ್​ ಸಿಡಿಸಿದ್ದು, ಟಿ20ಯಲ್ಲಿ ಇದುವರೆಗಿನ ವಿಶ್ವದಾಖಲೆಯಾಗಿತ್ತು. ಅಲೆನ್​ 34 ಎಸೆತಗಳಲ್ಲೇ ಶತಕ ಸಿಡಿಸಿದರು. ಇದು ಟಿ20 ಫ್ರಾಂಚೈಸಿ ಲೀಗ್​ನಲ್ಲಿ 2ನೇ ಅತಿವೇಗದ ಶತಕವೆನಿಸಿದೆ. 2013ರಲ್ಲಿ ಕ್ರಿಸ್​ ಗೇಲ್​ ಆರ್​ಸಿಬಿ ಪರ 30 ಎಸೆತಗಳಲ್ಲೇ ಶತಕ ಸಿಡಿಸಿರುವುದು ದಾಖಲೆ.

ಅಲೆನ್​ 49 ಎಸೆತಗಳಲ್ಲೇ 150 ರನ್​ ಪೂರೈಸಿದರು. ಇದು ಟಿ20ಯಲ್ಲಿ ಅತಿವೇಗದ 150 ರನ್​ ಸಾಧನೆಯಾಗಿದೆ. 2022ರಲ್ಲಿ ಡಿವಾಲ್ಡ್​ ಬ್ರೆವಿಸ್​ 52 ಎಸೆತಗಳಲ್ಲಿ ಈ ಸಾಧನೆ ಮಾಡಿದ್ದು ಹಿಂದಿನ ದಾಖಲೆ.

ನ್ಯೂಜಿಲೆಂಡ್​ನ ಫಿನ್​ ಅಲೆನ್​ ಅವರನ್ನು 2022ರ ಐಪಿಎಲ್ ಮಿನಿ ಹರಾಜಿನಲ್ಲಿ 80 ಲಕ್ಷ ರೂಪಾಯಿ ನೀಡಿ ಆರ್​ಸಿಬಿ ತಂಡ ಖರೀದಿಸಿತ್ತು. ಆದರೆ ಐಪಿಎಲ್ 2 ಆವೃತ್ತಿಗಳಲ್ಲಿ ಪದಾರ್ಪಣೆಯ ಅವಕಾಶವೇ ದೊರೆಯಲಿಲ್ಲ.