ಬೆಂಗಳೂರಿನ ಹೊಸ ರಾಷ್ಟ್ರೀಯ ಕ್ರಿಕೆಟ್​ ಅಕಾಡೆಮಿ ಉದ್ಘಾಟನೆಗೆ ಮುಹೂರ್ತ ನಿಗದಿ

ಬೆಂಗಳೂರು: ಉದ್ಯಾನನಗರಿಯ ಹೊರವಲಯದಲ್ಲಿ ಸುಮಾರು 45 ಎಕರೆ ಜಾಗದಲ್ಲಿ ಹೊಸದಾಗಿ ನಿರ್ಮಿಸಲಾಗಿರುವ ರಾಷ್ಟ್ರೀಯ ಕ್ರಿಕೆಟ್​ ಅಕಾಡೆಮಿಯ (ಎನ್​ಸಿಎ) ಉದ್ಘಾಟನಾ ಸಮಾರಂಭ ಸೆಪ್ಟೆಂಬರ್​ 28ರಂದು ನಡೆಯಲಿದೆ. ಸೆಪ್ಟೆಂಬರ್​ 29ಕ್ಕೆ ಬೆಂಗಳೂರಿನಲ್ಲಿ ಬಿಸಿಸಿಐನ ವಾರ್ಷಿಕ ಮಹಾಸಭೆ ನಿಗದಿಯಾಗಿದ್ದು, ಅದಕ್ಕೆ ಒಂದು ದಿನ ಮುನ್ನ ಎನ್​ಸಿಎ ಲೋಕಾರ್ಪಣೆಯಾಗಲಿದೆ. ಈ ಸಂಬಂಧ ಬಿಸಿಸಿಐ ಕಾರ್ಯದರ್ಶಿ ಜಯ್​ ಷಾ ಎಲ್ಲ ರಾಜ್ಯ ಕ್ರಿಕೆಟ್​ ಸಂಸ್ಥೆಗಳಿಗೆ ಇ-ಮೇಲ್​ ಮೂಲಕ ಆಹ್ವಾನ ಕಳುಹಿಸಿದ್ದಾರೆ.

ಹೊಸ ಎನ್​ಸಿಎಯಲ್ಲಿ 3 ವಿಶ್ವದರ್ಜೆಯ ಮೈದಾನ, 45 ಅಭ್ಯಾಸ ಪಿಚ್​ಗಳು, ಒಳಾಂಗಣ ಪಿಚ್​ಗಳು, ಒಲಿಂಪಿಕ್​ ಸೈಜ್​ ಈಜುಕೊಳ, ಅತ್ಯಾಧುನಿಕ ತರಬೇತಿ ಮತ್ತು ಕ್ರೀಡಾ ವಿಜ್ಞಾನ ಕೇಂದ್ರಗಳು ಇರಲಿವೆ. ಹೊಸ ಎನ್​ಸಿಎ ಕಾಂಪ್ಲೆಕ್ಸ್​ನಲ್ಲಿ 16 ಸಾವಿರ ಚದರ ಅಡಿಯ ಜಿಮ್​ ಮತ್ತು 243 ಕೊಠಡಿಗಳು ಇರಲಿವೆ.

ಕ್ರಿಕೆಟಿಗರು ಮಾತ್ರವಲ್ಲದೆ ದೇಶದ ಇತರ ಪ್ರಮುಖ ಕ್ರೀಡಾಪಟುಗಳ ಬಳಕೆಗೂ ಹೊಸ ಎನ್​ಸಿಎ ಲಭ್ಯವಿರಲಿದೆ ಎಂದು ಬಿಸಿಸಿಐ ಈಗಾಗಲೆ ತಿಳಿಸಿದೆ.

https://www.vijayavani.net/india-recorded-more-wins-than-losses-in-test-cricket-for-the-first-time-in-92-years