ಇಂದು ಈಡನ್​ನಲ್ಲಿ ದಕ್ಷಿಣ ಆಫ್ರಿಕಾ ವಿರುದ್ಧವೂ ಅಜೇಯ ಓಟದ ತವಕ; ಸತತ 8ನೇ ಗೆಲುವಿನ ಹಂಬಲದಲ್ಲಿ ಭಾರತ

ಕೋಲ್ಕತ: ತವರಿನ ಏಕದಿನ ವಿಶ್ವಕಪ್​ನಲ್ಲಿ ಸತತ 7 ಗೆಲುವಿನೊಂದಿಗೆ ಅಜೇಯವಾಗಿ ಮುನ್ನುಗ್ಗುತ್ತಿರುವ ಭಾರತ ತಂಡ ಈಡನ್​ ಗಾರ್ಡನ್ಸ್​ನಲ್ಲಿ ಭಾನುವಾರ ನಡೆಯಲಿರುವ ತನ್ನ 8ನೇ ಲೀಗ್​ ಪಂದ್ಯದಲ್ಲಿ ದಕ್ಷಿಣ ಆಫ್ರಿಕಾ ತಂಡವನ್ನು ಎದುರಿಸಲಿದೆ. ಇದುವರೆಗೆ ಆಡಿದ 7 ಪಂದ್ಯಗಳಲ್ಲಿ 6ರಲ್ಲಿ ಗೆದ್ದು ಬಲಿಷ್ಠ ನಿರ್ವಹಣೆಯನ್ನೇ ತೋರುತ್ತಿರುವ ದಕ್ಷಿಣ ಆಫ್ರಿಕಾ ವಿರುದ್ಧದ ಈ ಕಾದಾಟ, ಟೂರ್ನಿಯಲ್ಲಿ ಭಾರತಕ್ಕೆ ಇದುವರೆಗಿನ ಸವಾಲಿನ ಪಂದ್ಯವೆನಿಸುವ ಸಾಧ್ಯತೆ ಇದೆ. ಹರಿಣಗಳ ವಿರುದ್ಧವೂ ಗೆದ್ದು ಅಜೇಯವಾಗಿಯೇ ಪ್ರಶಸ್ತಿಯತ್ತ ಧಾವಿಸುವುದು ಭಾರತದ ತವಕವಾಗಿದೆ.

ಭಾರತಕ್ಕೆ ಈ ಪಂದ್ಯ ಅಜೇಯ ಪಟ್ಟವನ್ನು ಉಳಿಸಿಕೊಳ್ಳಲು ಮತ್ತು ಅಂಕಪಟ್ಟಿಯಲ್ಲಿ ಅಗ್ರಸ್ಥಾನವನ್ನು ಕಾಯ್ದುಕೊಳ್ಳುವ ನಿಟ್ಟಿನಲ್ಲೂ ನಿರ್ಣಾಯಕವೆನಿಸಿದೆ. ಭಾರತ ಕೊನೇ ಲೀಗ್​ ಪಂದ್ಯದಲ್ಲಿ ನೆದರ್ಲೆಂಡ್​ ವಿರುದ್ಧ ಆಡಲಿದೆ. ಹೀಗಾಗಿ ಆಫ್ರಿಕಾ ವಿರುದ್ಧ ಗೆದ್ದರೆ ಭಾರತಕ್ಕೆ ನಂತರ ಸೆಮೀಸ್​ ಹಾದಿಯಲ್ಲಿ ಅಜೇಯ ಪಟ್ಟಕ್ಕೆ ಹೆಚ್ಚಿನ ಸವಾಲು ಎದುರಾಗುವ ಸಾಧ್ಯತೆಗಳಿಲ್ಲ. ಇನ್ನು ಟೆಂಬಾ ಬವುಮಾ ಪಡೆ ಸದ್ಯ ಭಾರತಕ್ಕಿಂತ ಉತ್ತಮ ರನ್​ರೇಟ್​ ಹೊಂದಿದೆ. ಹೀಗಾಗಿ ಈ ಪಂದ್ಯ ಸೋತರೆ ಭಾರತ ಅಂಕಪಟ್ಟಿಯಲ್ಲಿ ಅಗ್ರಸ್ಥಾನವನ್ನೂ ಬಿಟ್ಟುಕೊಡಬೇಕಾಗುತ್ತದೆ ಮತ್ತು ಲೀಗ್​ ಅಭಿಯಾನ ಮುಗಿಸುವ ಮುನ್ನ ಅಗ್ರಸ್ಥಾನವನ್ನು ಮರಳಿ ಪಡೆಯುವ ಖಚಿತತೆ ಇರುವುದಿಲ್ಲ.

2011ರಲ್ಲಿ ಆಫ್ರಿಕಾ ಕಾಡಿತ್ತು

ಭಾರತ ತಂಡ 2011ರಲ್ಲಿ ತವರಿನಲ್ಲೇ ಕೊನೆಯದಾಗಿ ಮತ್ತು ಒಟ್ಟಾರೆ 2ನೇ ಬಾರಿ ವಿಶ್ವಕಪ್​ ಎತ್ತಿ ಹಿಡಿದಾಗ ದಕ್ಷಿಣ ಆಫ್ರಿಕಾ ವಿರುದ್ಧ ಮಾತ್ರ ಸೋಲು ಕಂಡಿತ್ತು. ನಾಗ್ಪುರದಲ್ಲಿ ನಡೆದ ಆ ಪಂದ್ಯದಲ್ಲಿ ಸಚಿನ್​ ತೆಂಡುಲ್ಕರ್​ ಶತಕದ ಬಲದಿಂದ ಭಾರತ 296 ರನ್​ ಪೇರಿಸಿತ್ತು. ಆದರೆ ಕೊನೇ ಓವರ್​ನಲ್ಲಿ 13 ರನ್​ ಬೇಕಿದ್ದಾಗ ಆಶಿಸ್​ ನೆಹ್ರಾರ 4 ಎಸೆತಗಳಲ್ಲೇ 14 ರನ್​ ಕಸಿದು ರಾಬಿನ್​ ಪೀಟರ್​ಸನ್​ ಹರಿಣಗಳನ್ನು ಗೆಲ್ಲಿಸಿದ್ದರು. ನಂತರ 2015 ಮತ್ತು 2019ರ ವಿಶ್ವಕಪ್​ ಮುಖಾಮುಖಿಗಳಲ್ಲಿ ಭಾರತವೇ ಗೆದ್ದಿತ್ತು.

ಟೀಮ್​ ನ್ಯೂಸ್​:

ಭಾರತ: ಹಾರ್ದಿಕ್​ ಪಾಂಡ್ಯ ವಿಶ್ವಕಪ್​ನಿಂದ ಹೊರಬಿದ್ದಿರುವ ಕಾರಣ ಭಾರತ ತಂಡ ಹಾಲಿ ಕಾಂಬಿನೇಷನ್​ ಉಳಿಸಿಕೊಳ್ಳಲಿದೆ. ಹಾರ್ದಿಕ್​ ಹೊರಬಿದ್ದಾಗ ಒಳಬಂದ ಶಮಿ-ಸೂರ್ಯ ಯಶಸ್ಸು ಕಂಡಿದ್ದರೂ, ಭಾರತದ 6ನೇ ಬೌಲರ್​ ಕೊರತೆ ಮುಂದುವರಿಯಲಿದೆ. ಎದುರಾಳಿ ತಂಡ ಇದರ ಲಾಭವೆತ್ತಲು ಪ್ರಯತ್ನಿಸದಿರುವ ಮತ್ತು ಬೌಲರ್​ಗೆ ಗಾಯದ ಸಮಸ್ಯೆ ಕಾಡದಿರುವವರೆಗೆ ಇದುವೇ ಸೂಕ್ತ ತಂಡ ಸಂಯೋಜನೆ ಎನಿಸಿದೆ.

ದಕ್ಷಿಣ ಆಫ್ರಿಕಾ: ಭಾರತದಂತೆ ದಕ್ಷಿಣ ಆಫ್ರಿಕಾ ಕೂಡ ಟೂರ್ನಿಯುದ್ದಕ್ಕೂ ಆಡುವ 11ರ ಬಳಗದಲ್ಲಿ ಹೆಚ್ಚಿನ ಬದಲಾವಣೆಯನ್ನು ಮಾಡಿಲ್ಲ. ಸ್ಪಿನ್​ ಸ್ನೇಹಿ ಪಿಚ್​ಗಳಲ್ಲಿ ತಬರೇಜ್​ ಶಮ್ಸಿಯನ್ನು ಆಡಿಸಿ ಉಳಿದ ಪಂದ್ಯಗಳಲ್ಲಿ ಓರ್ವ ವೇಗಿಗೆ ವಿಶ್ರಾಂತಿ ನೀಡಿದೆ. ಈ ಬಾರಿ ಕಳೆದ ಪಂದ್ಯದ ಕಾಂಬಿನೇಷನ್​ ಉಳಿಸಿಕೊಳ್ಳುವ ನಿರೀೆ ಇದೆ.

ಇಂಡಿಯನ್​ ಬೌಲಿಂಗ್​ V/s ಆಫ್ರಿಕನ್​ ಬ್ಯಾಟಿಂಗ್​

ಭಾರತ ತಂಡ ಇದುವರೆಗೆ ಯಾವ ತಂಡಕ್ಕೂ 280ರ ಗಡಿ ದಾಟಲು ಬಿಟ್ಟಿಲ್ಲ. ಅತ್ತ ದಕ್ಷಿಣ ಆಫ್ರಿಕಾ 7ರಲ್ಲಿ 5 ಪಂದ್ಯಗಳಲ್ಲಿ 300 ಪ್ಲಸ್​, ಅದರಲ್ಲೂ 4ರಲ್ಲಿ 350 ಪ್ಲಸ್​ ಮೊತ್ತ ಪೇರಿಸಿದೆ. ಹೀಗಾಗಿ ಭಾರತದ ಬಲಿಷ್ಠ ಬೌಲಿಂಗ್​ ವಿಭಾಗ ಮತ್ತು ಹರಿಣಗಳ ಸ್ಫೋಟಕ ಬ್ಯಾಟಿಂಗ್​ ವಿಭಾಗದ ಮುಖಾಮುಖಿ ತೀವ್ರ ಕುತೂಹಲ ಕೆರಳಿಸಿದೆ. ಮೊಹಮದ್​ ಶಮಿ, ಜಸ್​ಪ್ರೀತ್​ ಬುಮ್ರಾ, ಕುಲದೀಪ್​ ಯಾದವ್​, ಮೊಹಮದ್​ ಸಿರಾಜ್​, ರವೀಂದ್ರ ಜಡೇಜಾ ಭರ್ಜರಿ ಫಾರ್ಮ್​ನಲ್ಲಿದ್ದರೆ, ಅತ್ತ ಆಫ್ರಿಕಾ ಪರ ಕ್ವಿಂಟನ್​ ಡಿಕಾಕ್​, ವಾನ್​ ಡರ್​ ಡುಸೆನ್​, ಹೆನ್ರಿಕ್​ ಕ್ಲಾಸೆನ್​, ಏಡನ್​ ಮಾರ್ಕ್ರಮ್​ ರನ್​ಮಳೆ ಹರಿಸುತ್ತಿದ್ದಾರೆ. ವಿಶ್ವಕಪ್​ನಲ್ಲಿ ಆಫ್ರಿಕಾ ಪರ ಇದುವರೆಗೆ 8 ಶತಕ ದಾಖಲಾಗಿದೆ. ಆದರೆ, ಮೊದಲು ಬ್ಯಾಟಿಂಗ್​ ಮಾಡಿದಾಗ ಆರ್ಭಟಿಸುವ ದಕ್ಷಿಣ ಆಫ್ರಿಕಾ ಬ್ಯಾಟಿಂಗ್​ ವಿಭಾಗ, ಚೇಸಿಂಗ್​ನಲ್ಲಿ ಮುಗ್ಗರಿಸುವ ಚಾಳಿ ಹೊಂದಿದೆ. ಇಬ್ಬನಿ ಸಮಸ್ಯೆಯಿಂದಾಗಿ ಈಡನ್​ನಲ್ಲಿ ಚೇಸಿಂಗ್​ ಸುಲಭವಾಗಬಹುದು. ಹೀಗಾಗಿ ಉಭಯ ತಂಡಗಳಿಗೂ ಟಾಸ್​ ಗೆದ್ದರೆ ಏನನ್ನು ಆಯ್ದುಕೊಳ್ಳುವುದು ಎಂಬ ಗೊಂದಲ ಎದುರಾಗಬಹುದು.

ಏಕದಿನ ಮುಖಾಮುಖಿ: 90

ಭಾರತ: 37, ದಣ ಆಫ್ರಿಕಾ: 50, ರದ್ದು: 3

ವಿಶ್ವಕಪ್​ ಮುಖಾಮುಖಿ: 5

ಭಾರತ: 2, ದಣ ಆಫ್ರಿಕಾ: 3

ಆರಂಭ: ಮಧ್ಯಾಹ್ನ 2.00

ನೇರಪ್ರಸಾರ: ಸ್ಟಾರ್​ ಸ್ಪೋರ್ಟ್ಸ್​

ಶಮಿ ಶೈನಿಂಗ್​

ಹಾರ್ದಿಕ್​ ಪಾಂಡ್ಯ ಗಾಯಕ್ಕೆ ಎಷ್ಟರ ಮಟ್ಟಿಗೆ ಹೊಡೆತ ನೀಡಿತೋ, ಅದಕ್ಕಿಂತ ಹೆಚ್ಚಾಗಿ ಲಾಭವನ್ನೂ ತಂದಿದೆ. ಯಾಕೆಂದರೆ ಹಾರ್ದಿಕ್​ ಗಾಯಗೊಳ್ಳದಿದ್ದರೆ, ವೇಗಿ ಮೊಹಮದ್​ ಶಮಿ ಈಗಲೂ 11ರ ಬಳಗದಿಂದ ಹೊರಗುಳಿಯಬೇಕಾಗುತ್ತಿತ್ತು. ಮೂರೇ ಪಂದ್ಯಗಳಲ್ಲಿ 14 ವಿಕೆಟ್​ ಕಬಳಿಸಿ ಮಿಂಚಿರುವ ಶಮಿಗೆ ಈಡನ್​ ಗಾರ್ಡನ್ಸ್​ ತವರು ಮೈದಾನವೂ ಆಗಿದೆ. ಉತ್ತರ ಪ್ರದೇಶ ಮೂಲದವರಾದರೂ, ಶಮಿ ದೇಶೀಯ ಕ್ರಿಕೆಟ್​ನಲ್ಲಿ ಬಂಗಾಳವನ್ನು ಪ್ರತಿನಿಧಿಸುತ್ತಾರೆ.

https://www.vijayavani.net/ipl-auction-to-be-held-in-dubai-on-december-19-player-retention-deadline-extended-to-november-26