TENNIS: ಸ್ಪೇನ್​ ಆಟಗಾರ ಪೆಡ್ರೊ ಮಾರ್ಟಿನೆಜ್​ಗೆ ಬೆಂಗಳೂರು ಓಪನ್​ ಕಿರೀಟ

ಅಗ್ರ ಶ್ರೇಯಾಂಕಿತ ಸ್ಪೇನ್​ ಆಟಗಾಋ ಪೆಡ್ರೊ ಮಾರ್ಟಿನೆಜ್​ (Pedro Martinez) 10ನೇ ಆವೃತ್ತಿಯ ಬೆಂಗಳೂರು ಓಪನ್ (Bengaluru Open 2026)​ ಎಟಿಪಿ 125 ಚಾಲೆಂಜರ್​ ಟೂರ್ನಿಯ ಪುರುಷರ ಸಿಂಗಲ್ಸ್​ ವಿಭಾಗದಲ್ಲಿ ಪ್ರಶಸ್ತಿ ಗೆದ್ದುಕೊಂಡಿದ್ದಾರೆ. ಡಬಲ್ಸ್​ನಲ್ಲಿ ಕೊಲಂಬಿಯಾದ ನಿಕೊಲಸ್​ ಬ್ಯಾರಿಯೆಂಟೋಸ್​ ಹಾಗೂ ಅಮೆರಿಕದ ಬೆಂಜಮಿನ್​ ಕಿಟ್ಟೆ ಜೋಡಿ ಚಾಂಪಿಯನ್​ ಆಗಿ ಹೊರಹೊಮ್ಮಿದೆ. 

ಕರ್ನಾಟಕ ರಾಜ್ಯ ಲಾನ್​ ಟೆನಿಸ್​ ಸಂಸ್ಥೆಯ (ಕೆಎಸ್​ಎಲ್​ಟಿಎ) ಎಸ್​.ಎಂ.ಕೃಷ್ಣ ಟೆನಿಸ್​ ಸ್ಟೇಡಿಯಂನಲ್ಲಿ (SM Krishna Tennis Stadium) ಶನಿವಾರ ನಡೆದ ಪ್ರಶಸ್ತಿ ಕಾದಾಟದಲ್ಲಿ ಪೆಡ್ರೊ ಮಾರ್ಟಿನೆಜ್​ 7-6, 6-3 ನೇರಸೆಟ್​ಗಳಿಂದ 6ನೇ ಶ್ರೇಯಾಂಕಿತ ಕಜಾಕಿಸ್ತಾನದ ಟಿಮೊೆ ಸ್ಕಟೊವ್​ ಎದುರು ಗೆದ್ದು ಬೀಗಿದರು. 1 ಗಂಟೆ 56 ನಿಮಿಷಗಳ ಕಾದಾಟದ ಮೊದಲ ಸೆಟ್​ನಲ್ಲಿ ನಿಕಟ ಪೈಪೋಟಿ ಏರ್ಪಟ್ಟಿತು. ಟೈಬ್ರೇಕರ್​ನಲ್ಲಿ ಮೊದಲ ಸೆಟ್​ ಒಲಿಸಿಕೊಂಡ ಮಾರ್ಟಿನೆಜ್​ ಮೇಲುಗೈ ಸಾಧಿಸಿದರು.

ಡಬಲ್ಸ್​ನಲ್ಲಿ 4ನೇ ಶ್ರೇಯಾಂಕಿತ ನಿಕೊಲಸ್​ ಬ್ಯಾರಿಯೆಂಟೋಸ್​ -ಬೆಂಜಮಿನ್​ ಕಿಟ್ಟೆ 7-6, 7-5 ನೇರ ಸೆಟ್​ಗಳಿಂದ ಮೂರನೇ ಶ್ರೇಯಾಂಕಿತ ಫ್ರಾನ್ಸ್​ನ ಆರ್ಥರ್​ ರೇಮಂಡ್​-ಲೂಕಾ ಸ್ಯಾಂಚೆಜ್​ ಜೋಡಿಗೆ ಆಘಾತ ನೀಡಿ ಪ್ರಶಸ್ತಿ ಗೆದ್ದುಕೊಂಡಿತು.