ಡೇವಿಸ್​ ಕಪ್​ಗೆ ಭಾರತ ತಂಡ ಪ್ರಕಟ; ಮಾನಸ್​ ಧಾಮ್ನೆ ಹೊಸಮುಖ

ನವದೆಹಲಿ: ಪ್ರತಿಷ್ಠಿತ ಡೇವಿಸ್​ ಕಪ್ (

Davis Cup

)​ ಪುರುಷರ ಟೆನಿಸ್​ ಟೂರ್ನಿಯಲ್ಲಿ ಆಡಲಿರುವ ಭಾರತ ತಂಡದಲ್ಲಿ ಮಾನಸ್​ ಧಾಮ್ನೆ ಇದೇ ಮೊದಲ ಬಾರಿಗೆ ಸ್ಥಾನ ಸಂಪಾದಿಸಿದ್ದಾರೆ. ಸೆಪ್ಟೆಂಬರ್​ 18-19ರಂದು ಸಿಯೋಲ್​ನಲ್ಲಿ ಆತಿಥೇಯ ದಕ್ಷಿಣ ಕೊರಿಯಾ ವಿರುದ್ಧ ನಡೆಯಲಿರುವ ಕ್ವಾಲಿಫೈಯರ್ಸ್​ 2ನೇ ಸುತ್ತಿನ ಕಾದಾಟಕ್ಕೆ ಭಾರತ ತಂಡವನ್ನು ಪ್ರಕಟಿಸಲಾಗಿದ್ದು, ನೆದರ್ಲ್ಯಾಂಡ್ಸ್​ ವಿರುದ್ಧದ ಕಳೆದ ಪಂದ್ಯದಲ್ಲಿ ಗೆಲುವು ಸಾಧಿಸಿದ ತಂಡದಲ್ಲಿದ್ದ ಎಲ್ಲ ಪ್ರಮುಖ ಆಟಗಾರರನ್ನು ಉಳಿಸಿಕೊಳ್ಳಲಾಗಿದೆ.

ವಿಶ್ವ ನಂ. 362 ಮತ್ತು ದೇಶದ ನಂ. 2 ಸಿಂಗಲ್ಸ್​ ಆಟಗಾರ ಮಾನಸ್​ ಧಾಮ್ನೆ, ಸುಮಿತ್​ ನಗಾಲ್​ (ವಿಶ್ವ ನಂ. 235) ಮತ್ತು ದಕ್ಷಿಣೇಶ್ವರ್​ ಸುರೇಶ್​ (ವಿಶ್ವ ನಂ. 393) ಜತೆಗೆ ಸಿಂಗಲ್ಸ್​ ವಿಭಾಗದ ಆಟಗಾರರ ಬಳಗದಲ್ಲಿ ಸ್ಥಾನ ಪಡೆದಿದ್ದಾರೆ. ಯೂಕಿ ಭಾಂಬ್ರಿ (ವಿಶ್ವ ನಂ. 28) ಮತ್ತು ಎನ್​. ಶ್ರೀರಾಮ್​ ಬಾಲಾಜಿ (ವಿಶ್ವ ನಂ. 57) ತಂಡದಲ್ಲಿರುವ ಡಬಲ್ಸ್​ ಆಟಗಾರರಾಗಿದ್ದಾರೆ. ಜೂನಿಯರ್​ ಗ್ರಾಂಡ್​ ಸ್ಲಾಂಗಳಲ್ಲಿ ಆಡಿರುವ ಉದಯೋನ್ಮುಖ ಆಟಗಾರ ಅರ್ನವ್​ ಪಪರ್ಕರ್​ ಜತೆಗೆ ಸಿದ್ಧಾರ್ಥ್​ ರಾವತ್​ (ವಿಶ್ವ ನಂ. 536) ಮೀಸಲು ಆಟಗಾರರಾಗಿ ಸ್ಥಾನ ಪಡೆದಿದ್ದಾರೆ.

"ಹೆಚ್ಚಿನ ಆಟಗಾರರ ಆಯ್ಕೆಗೆ ಅವರ ನಿರ್ವಹಣೆಯೇ ಸ್ವಯಂ ಕಾರಣವಾಗಿದೆ. ಕಳೆದ ಬಾರಿಯ ಪಂದ್ಯಕ್ಕೆ ಮಾನಸ್​ ಧಾಮ್ನೆ ಲಭ್ಯರಿರಲಿಲ್ಲ. ಅವರನ್ನು ಸಿಂಗಲ್ಸ್​ ವಿಭಾಗದಲ್ಲಿ ಆಡಿಸುವ ಬಗ್ಗೆ, ಪರಿಸ್ಥಿತಿಯನ್ನು ಅವಲೋಕಿಸಿ ತಂಡದ ನಾಯಕ ನಿರ್ಧರಿಸಲಿದ್ದಾರೆ' ಎಂದು ಆಯ್ಕೆ ಸಮಿತಿಯ ಸದಸ್ಯರೊಬ್ಬರು ತಿಳಿಸಿದ್ದಾರೆ.

ಭಾರತ ಕಳೆದ ಫೆಬ್ರವರಿಯಲ್ಲಿ ಬೆಂಗಳೂರಿನಲ್ಲಿ ಆಡಿದ ಕ್ವಾಲಿಫೈಯರ್​ ಮೊದಲ ಸುತ್ತಿನ ಪಂದ್ಯದಲ್ಲಿ ನೆದರ್ಲ್ಯಾಂಡ್ಸ್​ ವಿರುದ್ಧ ಐತಿಹಾಸಿಕ ಗೆಲುವು ಸಾಧಿಸಿತ್ತು. ಈ ಮೂಲಕ ಭಾರತ 2019ರಲ್ಲಿ ಹೊಸ ಸ್ವರೂಪ ಪಡೆದುಕೊಂಡಿರುವ ಡೇವಿಸ್​ ಕಪ್​ನಲ್ಲಿ ಮೊದಲ ಬಾರಿ 2ನೇ ಸುತ್ತಿಗೇರಿದ ಸಾಧನೆ ಮಾಡಿತ್ತು.

ದ. ಕೊರಿಯಾ ತಂಡ ಮೊದಲ ಸುತ್ತಿನಲ್ಲಿ ಅರ್ಜೆಂಟೀನಾ ಎದುರು 1-2 ಹಿನ್ನಡೆಯ ಬಳಿಕ 3-2ರಿಂದ ಗೆದ್ದು ಬೀಗಿತ್ತು. ಸಿಯೋಲ್​ನಲ್ಲಿ ಗೆದ್ದ ತಂಡ ನವೆಂಬರ್​ನಲ್ಲಿ ನಡೆಯಲಿರುವ ಡೇವಿಸ್​ ಕಪ್​ ಫೈನಲ್​-8 ಹಂತಕ್ಕೆ ಅರ್ಹತೆ ಗಳಿಸಲಿದೆ.