ವಿದಾಯ ಟೂರ್ನಿಗೆ ಟೆನಿಸ್​ ದಿಗ್ಗಜ ರಾಫೆಲ್​ ನಡಾಲ್​ ರೆಡಿ! ಇಂದಿನಿಂದ ಡೇವಿಸ್​ ಕಪ್​ನಲ್ಲಿ ಕೊನೇ ಆಟ...

ಮಲಗ (ಸ್ಪೇನ್​): ಕ್ಲೇಕೋರ್ಟ್​ ಕಿಂಗ್​ ಎಂದೇ ಹೆಸರಾದ ಸ್ಪೇನ್​ ದಿಗ್ಗಜ ರಾಫೆಲ್​ ನಡಾಲ್​ 20 ವರ್ಷಗಳ ವೃತ್ತಿಪರ ಟೆನಿಸ್​ ಬದುಕಿಗೆ ವಿದಾಯ ಹೇಳಲು ಸಜ್ಜಾಗಿದ್ದಾರೆ. ಮಂಗಳವಾರದಿಂದ ತವರಿನಲ್ಲೇ ನಡೆಯಲಿರುವ ಡೇವಿಸ್​ ಕಪ್​ ಫೈನಲ್ಸ್​ ಟೂರ್ನಿಯಲ್ಲಿ ಕೊನೆಯದಾಗಿ ಆಡಿ 38 ವರ್ಷದ ನಡಾಲ್​ ನಿವೃತ್ತಿ ಹೊಂದಲಿದ್ದಾರೆ. ಆದರೆ ಈ ಟೀಮ್​ ಚಾಂಪಿಯನ್​ಷಿಪ್​ನಲ್ಲಿ 22 ಗ್ರಾಂಡ್​ ಸ್ಲಾಂ ಪ್ರಶಸ್ತಿಗಳ ಒಡೆಯ ನಡಾಲ್​ ಸಿಂಗಲ್ಸ್​ ಅಥವಾ ಡಬಲ್ಸ್​ ಪಂದ್ಯದಲ್ಲಿ ಆಡುವ ಪಡೆಯುವರೇ ಎಂಬುದು ಮಾತ್ರ ಸೋಮವಾರದವರೆಗೂ ಸ್ಪಷ್ಟವಾಗಿಲ್ಲ.

ಒಳಾಂಗಣ ಹಾರ್ಡ್​ ಕೋರ್ಟ್​ನಲ್ಲಿ ನಡೆಯಲಿರುವ ಕ್ವಾರ್ಟರ್​ಫೈನಲ್​ನಲ್ಲಿ ಆತಿಥೇಯ ಸ್ಪೇನ್​ ತಂಡ ನೆದರ್ಲೆಂಡ್​ ವಿರುದ್ಧ ಆಡಲಿದೆ. ಇದರಲ್ಲಿ ಗೆದ್ದರಷ್ಟೇ ಸ್ಪೇನ್​ ತಂಡ ಶುಕ್ರವಾರದ ಸೆಮಿೈನಲ್​ಗೆ ಅರ್ಹತೆ ಪಡೆಯಲಿದೆ. ನಂತರ ಭಾನುವಾರ ಫೈನಲ್​ ನಿಗದಿಯಾಗಿದೆ. ಆದರೆ ಇನ್ನೂ ಶೇ. 100 ಫಿಟ್​ ಆಗಿರದ ನಡಾಲ್​ರನ್ನು ಸಿಂಗಲ್ಸ್​ ಅಥವಾ ಡಬಲ್ಸ್​ನಲ್ಲಿ ಆಡಿಸುವ ಬಗ್ಗೆ ಸ್ಪೇನ್​ ತಂಡದ ಆಡದ ನಾಯಕ ಡೇವಿಡ್ ಫೆರರ್​ ಗುಟ್ಟುಬಿಟ್ಟುಕೊಟ್ಟಿಲ್ಲ.

ನಡಾಲ್​ ಕೂಡ ಗೆಲ್ಲಲು ಸಾಧ್ಯವಿದೆ ಅನಿಸಿದರೆ ಮಾತ್ರ ಸಿಂಗಲ್ಸ್​ನಲ್ಲಿ ಆಡುವೆ. ನಾನು ನಿವೃತ್ತಿ ಹೊಂದಲು ಅಲ್ಲ, ತಂಡವನ್ನು ಗೆಲ್ಲಿಸಲು ಇಲ್ಲಿಗೆ ಬಂದಿದ್ದೇನೆ. ತಂಡವನ್ನು ಗೆಲ್ಲಿಸುವುದೇ ನನ್ನ ಗುರಿ ಎಂದಿದ್ದಾರೆ. ನಡಾಲ್​ ಕಳೆದ ಆಗಸ್ಟ್​ನಲ್ಲಿ ಪ್ಯಾರಿಸ್​ ಒಲಿಂಪಿಕ್ಸ್​ನಲ್ಲಿ ಕೊನೆಯದಾಗಿ ಆಡಿದ್ದರು.

ಫ್ರೆಂಚ್​ ಓಪನ್​ನಲ್ಲಿ ದಾಖಲೆಯ 14 ಬಾರಿ ಪ್ರಶಸ್ತಿ ಗೆದ್ದಿರುವ ನಡಾಲ್​, ಯುಎಸ್​ ಓಪನ್​ನಲ್ಲಿ 4, ವಿಂಬಲ್ಡನ್​ನಲ್ಲಿ 2 ಮತ್ತು ಆಸ್ಟ್ರೆಲಿಯನ್​ ಓಪನ್​ನಲ್ಲಿ 2 ಬಾರಿ ಪ್ರಶಸ್ತಿ ಜಯಿಸಿದ್ದಾರೆ. 2022ರ ಫ್ರೆಂಚ್​ ಓಪನ್​ ಅವರು ಗೆದ್ದಿರುವ ಕೊನೆಯ ಗ್ರಾಂಡ್​ ಸ್ಲಾಂ ಆಗಿದೆ. ನಂತರದಲ್ಲಿ ಗಾಯದಿಂದ ಬಳಲಿರುವ ಅವರು ಕಳೆದ 2 ವರ್ಷಗಳಲ್ಲಿ 25ಕ್ಕೂ ಕಡಿಮೆ ಪಂದ್ಯಗಳಲ್ಲಿ ಆಡಿದ್ದಾರೆ.

https://www.vijayavani.net/gill-injured-rohit-unavailable-kannadiga-stayed-in-aussie-as-a-reserve-batter