ವಿರಾಟ್ ಬಗ್ಗೆ ನನಗೂ ಬೇಸರವಿದೆ ಆದ್ರೆ… 'ರನ್​ ಮಷಿನ್'​ ಬ್ಯಾಟಿಂಗ್ ಬಗ್ಗೆ ವಿಕ್ರಮ್ ರಾಥೋರ್ ಪ್ರತಿಕ್ರಿಯೆ

ನ್ಯೂಯಾರ್ಕ್​: ಪ್ರಸಕ್ತ ವೆಸ್ಟ್ ಇಂಡೀಸ್ ಮತ್ತು ಅಮೆರಿಕಾ ಅತಿಥ್ಯ ವಹಿಸಿಕೊಂಡಿರುವ ಐಸಿಸಿ ಟಿ20 ವಿಶ್ವಕಪ್ 2024ರ ಟೂರ್ನಿಯಲ್ಲಿ ಟೀಂ ಇಂಡಿಯಾ ಸತತವಾಗಿ ಅತ್ಯುತ್ತಮ ಪ್ರದರ್ಶನ ನೀಡುತ್ತ ಬಂದಿದ್ದು, ಇದೀಗ ಸೂಪರ್ 8 ಕ್ಲ್ಯಾಶ್​ನಲ್ಲಿಯೂ ಯಶಸ್ವಿಯಾಗಿ ಮುನ್ನುಗ್ಗುತ್ತಿದೆ. ಒಂದೆಡೆ ಭಾರತ ತಂಡ ನೀಡುತ್ತಿರುವ ಯಶಸ್ವಿ ಪ್ರದರ್ಶನಕ್ಕೆ ಮೆಚ್ಚುಗೆಗಳ ಮಹಾಪೂರವೇ ಹರಿದುಬರುತ್ತಿದ್ದರೆ, ಮತ್ತೊಂದೆಡೆ ದಾಖಲೆಗಳ ಸರದಾರ, ವಿರಾಟ್ ಕೊಹ್ಲಿ ಅವರ ಪ್ರದರ್ಶನ ಕುರಿತು ವ್ಯಾಪಕ ಬೇಸರ ವ್ಯಕ್ತವಾಗಿದೆ.

ಇದನ್ನೂ ಓದಿ: ಎಂಎಲ್​ಸಿ ಸೂರಜ್ ರೇವಣ್ಣ ವಿರುದ್ಧ ಲೈಂಗಿಕ ದೌರ್ಜನ್ಯ ಆರೋಪ: ಹೀಗಿದೆ ದೂರಿನ ಸಾರಾಂಶ

ಟೀಂ ಇಂಡಿಯಾದ ಸ್ಟಾರ್ ಹಾಗೂ ಸ್ಪೋಟಕ ಬ್ಯಾಟ್ಸ್​ಮನ್​ ವಿರಾಟ್ ಕೊಹ್ಲಿ, ಈ ಬಾರಿಯ ಐಪಿಎಲ್ ಆವೃತ್ತಿಯಲ್ಲಿ ರಾಯಲ್ ಚಾಲೆಂಜರ್ಸ್​ ಬೆಂಗಳೂರು ತಂಡದ ಪರ ಆಕರ್ಷಕ ಬ್ಯಾಟಿಂಗ್ ಮಾಡುವ ಮೂಲಕ ಅತ್ಯಧಿಕ ರನ್​ಗಳನ್ನು ಕಲೆಹಾಕುವುದರ ಜತೆಗೆ ಆರೆಂಜ್ ಕ್ಯಾಪ್​ ಸ್ವೀಕರಿಸಿದರು. 17ನೇ ಸೀಸನ್​ ಪೂರ ಆರ್​ಸಿಬಿ ಪರ ಓಪನಿಂಗ್ ಆಡಿದ ವಿರಾಟ್​, ತಂಡಕ್ಕೆ ಹೆಚ್ಚುವರಿ ರನ್​ಗಳ ಕೊಡುಗೆ ನೀಡುವಲ್ಲಿ ಯಶಸ್ವಿಯಾಗಿದ್ದರು. ಅದೇ ಫಾರ್ಮೆಟ್​ನಲ್ಲಿ ಐಸಿಸಿ ವಿಶ್ವಕಪ್ ಟೂರ್ನಿಯಲ್ಲಿಯೂ ರೋಹಿತ್ ಶರ್ಮಾ ಜತೆ ಆರಂಭಿಕ ಬ್ಯಾಟ್ಸ್​ಮನ್​ ಆಗಿ ಕಣಕ್ಕಿಳಿದ ಕೊಹ್ಲಿ, ತಂಡಕ್ಕೆ ಉತ್ತಮ ಸ್ಟಾರ್ಟ್​ ಕೊಡುವಲ್ಲಿ ಸತತವಾಗಿ ವಿಫಲರಾಗಿದ್ದಾರೆ.

ಐಪಿಎಲ್​ನಲ್ಲಿ ಕಂಡ ಉತ್ತಮ ಫಾರ್ಮ್ ಅನ್ನು ಟಿ20 ವಿಶ್ವಕಪ್ ಪಂದ್ಯಾವಳಿಗಳಲ್ಲಿ ಮುಂದುವರೆಸಿಕೊಂಡು ಹೋಗದ ವಿರಾಟ್​, ಆಡಿದ ನಾಲ್ಕು ಪಂದ್ಯಗಳಲ್ಲಿ ಕೇವಲ 29 ರನ್​ಗಳಿಸಿದ್ದಾರೆ. ಇದು ಅವರ ಪ್ರದರ್ಶನದ ಬಗ್ಗೆ ಅಭಿಮಾನಿಗಳಲ್ಲಿ ಮತ್ತು ಮಾಜಿ ಕ್ರಿಕೆಟಿಗರಲ್ಲಿ ಭಾರೀ ಬೇಸರ ಮೂಡುವಂತೆ ಮಾಡಿದೆ. ಇನ್ನು ಈ ಕುರಿತು ಟೀಂ ಇಂಡಿಯಾದ ಬ್ಯಾಟಿಂಗ್ ಕೋಚ್ ಆದ ವಿಕ್ರಮ್​ ರಾಥೋರ್ ಮಾತನಾಡಿದ್ದು​, ನನಗೂ ಈ ವಿಷಯ ಅತೀವ ಬೇಸರ ತಂದೊಡ್ಡಿದೆ ಎಂದು ಹೇಳಿದ್ದಾರೆ.

ಇದನ್ನೂ ಓದಿ: ಯೋಗದಿಂದ ದೇಹ ಮನಸ್ಸುಗಳ ಅನುಸಂಧಾನ, ಕೃಷ್ಣಾ ಸಂಪಗಾಂವಕರ ಮಹಾರಾಜರ ಅಭಿಪ್ರಾಯ

"ಬೇಸರ ಇರುವುದು ನಿಜವೇ. ಆದ್ರೆ, ಮುಂದಿನ ಪಂದ್ಯಗಳಲ್ಲಿ ವಿರಾಟ್​ ಹೆಚ್ಚು ರನ್ ಗಳಿಸಿದರೆ ಬಹಳ ಖುಷಿ ಪಡುತ್ತೇನೆ. ಕೆಲವೊಮ್ಮೆ ಸವಾಲು ಹಾಕಿದಾಗ ಅದು ಒಳ್ಳೆಯದೆ. ಭಾರತದಲ್ಲಿ ಹೆಚ್ಚು ಬ್ಯಾಟಿಂಗ್ ಮಾಡದ ಬಾಯ್ಸ್​, ಇಂದು ಇಲ್ಲಿ ಉತ್ತಮ ಸ್ಕೋರ್‌ಗಳನ್ನು ಕಲೆ ಹಾಕುತ್ತಿದ್ದಾರೆ. ನಮ್ಮ ತಂಡದ ಮಧ್ಯಮ ಕ್ರಮಾಂಕವು ಅತ್ಯುತ್ತಮವಾಗಿ ಪ್ರದರ್ಶನ ನೀಡುತ್ತಿದೆ. ಇದೆಲ್ಲವನ್ನು ನೋಡಲು ನಿಜಕ್ಕೂ ಖುಷಿಯಾಗುತ್ತಿದೆ" ಎಂದರು.

"ನಮ್ಮ ತಂಡವು ಬಲಿಷ್ಠವಾಗಿದೆ. ಪಿಚ್​ ಕಂಡಿಷನ್​ ನೋಡಿಕೊಂಡು ಎರಡು ಅಥವಾ ಮೂರು ಸ್ಪಿನ್ನರ್‌ಗಳನ್ನು ಆಡಿಸುತ್ತೇವೆ. ಹಾಗಾಗಿ ಇದು ನಮ್ಮ ಅತ್ಯುತ್ತಮ ಟೀಮ್ ಎಂಬುದರಲ್ಲಿ ಅನುಮಾನವೇ ಬೇಡ. ಅದರಲ್ಲೂ ಅಕ್ಷರ್​ ಪಟೇಲ್​ನಂತಹ ಆಲ್​ರೌಂಡರ್​ಗಳು ಎಂಟನೇ ಕ್ರಮಾಂಕದಲ್ಲಿ ಬಂದು ಆಡುವುದು ನಿಜಕ್ಕೂ ನಮಗೆ ಹೆಚ್ಚಿನ ಆತ್ಮವಿಶ್ವಾಸವನ್ನು ನೀಡುತ್ತದೆ" ಎಂದು ಹೇಳಿದರು,(ಏಜೆನ್ಸೀಸ್).

https://www.vijayavani.net/pavithra-gowda-sent-to-parappana-agrahara-jail/