ಪ್ರಶಸ್ತಿ ಸುತ್ತಿಗೇರಿದ ಬೆಂಗಳೂರು ರ‍್ಯಾಪ್ಟರ್ಸ್; ಜಯ ತಂದ ಮಿಶ್ರ ಡಬಲ್ಸ್ ಜೋಡಿ

ಹೈದರಾಬಾದ್: ನಿರ್ಣಾಯಕ ಮಿಶ್ರ ಡಬಲ್ಸ್ ವಿಭಾಗದಲ್ಲಿ ಮೇಲುಗೈ ಸಾಧಿಸಿದ ಹಾಲಿ ಚಾಂಪಿಯನ್ ಬೆಂಗಳೂರು ರ‍್ಯಾಪ್ಟರ್ಸ್ ತಂಡ ಪ್ರೀಮಿಯರ್ ಬ್ಯಾಡ್ಮಿಂಟನ್ ಲೀಗ್​ನಲ್ಲಿ ಪುಣೆ 7 ಏಸಸ್ ತಂಡವನ್ನು 43 ರಿಂದ ಮಣಿಸಿ ಸತತ 3ನೇ ಬಾರಿಗೆ ಪ್ರಶಸ್ತಿ ಸುತ್ತಿಗೇರಿತು.

ಶನಿವಾರ ನಡೆದ ಎರಡನೇ ಸೆಮಿಫೈನಲ್ ಪಂದ್ಯ ಅಂತಿಮ ಹಣಾಹಣಿವರೆಗೂ ಕುತೂಹಲ ಕಾಯ್ದುಕೊಳ್ಳಲು ಯಶಸ್ವಿಯಾಯಿತು. ಭಾನುವಾರ ನಡೆಯಲಿರುವ ಫೈನಲ್ ಪಂದ್ಯದಲ್ಲಿ ನಾರ್ಥ್ ​ಈಸ್ಟರ್ನ್ ವಾರಿಯರ್ಸ್ ತಂಡವನ್ನು ಎದುರಿಸಲಿದೆ.

ಪಂದ್ಯದ ಮೊದಲು ನಾಲ್ಕು ಹಣಾಹಣಿ ವೇಳೆಗೆ ಉಭಯ ತಂಡಗಳು 3-3 ರಿಂದ ಸಮಬಲ ಸಾಧಿಸಿದ್ದವು. 5ನೇ ಹಾಗೂ ಅಂತಿಮ ಹಣಾಹಣಿ ಮಿಶ್ರಡಬಲ್ಸ್​ನಲ್ಲಿ ಬೆಂಗಳೂರು ತಂಡ ಜಯ ದಾಖಲಿಸಿತು. ಇದಕ್ಕೂ ಮೊದಲು ಪಂದ್ಯದ ಮೊದಲ ಹಣಾಹಣಿ ಪುರುಷರ ಡಬಲ್ಸ್ ವಿಭಾಗವನ್ನು ಟ್ರಂಪ್ ಘೋಷಣೆಯೊಂದಿಗೆ ಆಡಿದ ಪುಣೆ ತಂಡ ಸುಲಭ ಗೆಲುವು ದಾಖಲಿಸಿತು. ಇದರಿಂದ ಬೆಂಗಳೂರು ತಂಡ 0-2 ರಿಂದ ಆರಂಭಿಕ ಹಿನ್ನಡೆ ಅನುಭವಿಸಿತು.

ಪುರುಷರ ಸಿಂಗಲ್ಸ್​ನ ಮೊದಲ ಹಣಾಹಣಿಯಲ್ಲಿ ಬೆಂಗಳೂರು ತಂಡದ ಬ್ರಿಸ್ ಲೆವೆರ್​ಡೆಜ್ 15-14, 9-15, 15-6 ರಿಂದ ಬೆಂಗಳೂರು ಮೂಲದ ಆಟಗಾರ ಮಿಥುನ್ ಮಂಜುನಾಥ್ ಅವರನ್ನು ಮಣಿಸಿ ಪುಣೆ ತಂಡಕ್ಕೆ ತಿರುಗೇಟು ನೀಡಿದರು. ಬಹುನಿರೀಕ್ಷಿತ ಹಣಾಹಣಿಯಲ್ಲಿ ನಾಯಕ ಸಾಯಿ ಪ್ರಣೀತ್ 11-15, 13-15 ರಿಂದ ಜಪಾನ್​ನ ಕಜುಮಸಾ ಸಕಾಯಿ ಎದುರು ನಿರಾಸೆ ಅನುಭವಿಸಿದರು.

ಪ್ರಣೀತ್ ಸೋಲಿನಿಂದ 1-3 ರಿಂದ ಬೆಂಗಳೂರು ಹಿನ್ನಡೆ ಕಂಡಿತು. ಮಹಿಳೆಯರ ಸಿಂಗಲ್ಸ್ ವಿಭಾಗದಲ್ಲಿ ಟ್ರಂಪ್ ಘೋಷಣೆಯೊಂದಿಗೆ ಆಡಿದ ಮಾಜಿ ವಿಶ್ವ ನಂ.1 ಚೀನಾ ತೈಪೆಯ ತೈ ಜು ಯಿಂಗ್ 15-12, 15-12 ನೇರ ಗೇಮ್ಳಿಂದ ರಿತುಪರ್ಣಾ ದಾಸ್​ರನ್ನು ಮಣಿಸಿ ಬೆಂಗಳೂರು ತಂಡಕ್ಕೆ ಜೀವ ತುಂಬಿದರು.