ರಾಹುಲ್​ ದ್ರಾವಿಡ್​ಗೆ ಟಿ20 ವಿಶ್ವಕಪ್​ ಕೊನೇ ಸವಾಲು! ಗೆಲುವಿನ ವಿದಾಯ ನೀಡುವುದೇ ಟೀಮ್​ ಇಂಡಿಯಾ?

ನವದೆಹಲಿ: ಭಾರತ ತಂಡದ ಮುಖ್ಯ ಕೋಚ್​ ಹುದ್ದೆಗೆ ಬಿಸಿಸಿಐ ಈಗಾಗಲೆ ಅರ್ಜಿ ಆಹ್ವಾನಿಸಿದ್ದು, ಮೇ 27ರ ಗಡುವು ನಿಗದಿಪಡಿಸಿದೆ. ಆದರೆ ಹಾಲಿ ಮುಖ್ಯ ಕೋಚ್​ ರಾಹುಲ್​ ದ್ರಾವಿಡ್​ ಮರು ಅರ್ಜಿ ಸಲ್ಲಿಸದೆ, ವೈಯಕ್ತಿಕ ಜೀವನದತ್ತ ಹೆಚ್ಚಿನ ಗಮನಹರಿಸಲು ಬಯಸಿದ್ದಾರೆ ಎನ್ನಲಾಗಿದೆ. ಇದರಿಂದಾಗಿ ಜೂನ್​ನಲ್ಲಿ ಅಮೆರಿಕ&ವೆಸ್ಟ್​ ಇಂಡೀಸ್​ ಜಂಟಿ ಆತಿಥ್ಯದಲ್ಲಿ ನಡೆಯಲಿರುವ ಟಿ20 ವಿಶ್ವಕಪ್​ ಟೂರ್ನಿಯೇ ಕನ್ನಡಿಗ ದ್ರಾವಿಡ್​ಗೆ ಕೊನೇ ಸವಾಲು ಆಗಿರಲಿದೆ. ಕಳೆದ ವರ್ಷ ಏಕದಿನ ವಿಶ್ವಕಪ್ ಫೈನಲ್​ನಲ್ಲಿ ನಿರಾಸೆ ಅನುಭವಿಸಿದ ಬಳಿಕ, ಟಿ20 ವಿಶ್ವಕಪ್​ನಲ್ಲಾದರೂ ಅವರು ಸೀನಿಯರ್​ ತಂಡದ ಕೋಚ್​ ಆಗಿ ಐಸಿಸಿ ಟ್ರೋಫಿ ಗೆಲ್ಲದ ಕೊರತೆ ನೀಗಿಸಿಕೊಳ್ಳುವರೇ ಎಂಬ ಕುತೂಹಲ ಹರಡಿದೆ.

ಟಿ20 ವಿಶ್ವಕಪ್​ ನಂತರ ಕುಟುಂಬದ ಜತೆಗೆ ಹೆಚ್ಚಿನ ಸಮಯ ಕಳೆಯಲು 51 ವರ್ಷದ ದ್ರಾವಿಡ್​ ಬಯಸಿದ್ದಾರೆ. ಬಿಸಿಸಿಐ ಅಧಿಕಾರಿಗಳಿಗೂ ಅವರು ಈ ಬಗ್ಗೆ ಮಾಹಿತಿ ನೀಡಿದ್ದಾರೆ.

2021ರ ನವೆಂಬರ್​ನಲ್ಲಿ ಕೋಚ್​ ಆಗಿ ನೇಮಕಗೊಂಡಿದ್ದ ದ್ರಾವಿಡ್​, 2023ರ ಏಕದಿನ ವಿಶ್ವಕಪ್​ವರೆಗೆ ಅವಧಿ ಹೊಂದಿದ್ದರು. ನಂತರ ಟಿ20 ವಿಶ್ವಕಪ್​ವರೆಗೆ ಅವರ ಅವಧಿ ವಿಸ್ತರಿಸಲ್ಪಟ್ಟಿತ್ತು. ಇದೀಗ ಹುದ್ದೆಯಲ್ಲಿ ಇನ್ನಷ್ಟು ಸಮಯ ಮುಂದುವರಿಯದಿರಲು ಅವರು ಬಯಸಿದ್ದಾರೆ.

ಭಾರತ ತಂಡದ ಕೆಲ ಹಿರಿಯ ಆಟಗಾರರು ಟೆಸ್ಟ್​ ತಂಡದ ಜತೆಗಾದರೂ ಕನಿಷ್ಠ ಒಂದು ವರ್ಷ ಅಂದರೆ, 2025ರ ಐಸಿಸಿ ವಿಶ್ವ ಟೆಸ್ಟ್​ ಚಾಂಪಿಯನ್​ಷಿಪ್​ ಫೈನಲ್​ವರೆಗಾದರೂ (ಭಾರತ ಅರ್ಹತೆ ಪಡೆದರೆ) ದ್ರಾವಿಡ್​ ಮುಂದುವರಿಯಬೇಕೆಂದು ಬಯಸಿದ್ದರು. ಆದರೆ ದ್ರಾವಿಡ್​ ಇದಕ್ಕೂ ಸಮ್ಮತಿಸಲಿಲ್ಲ. ಒಂದು ವೇಳೆ ದ್ರಾವಿಡ್​ ಒಪ್ಪಿಕೊಂಡಿದ್ದರೆ ಬಿಸಿಸಿಐ, ಟೆಸ್ಟ್​ ಮತ್ತು ಸೀಮಿತ ಓವರ್​ ತಂಡಕ್ಕೆ ಪ್ರತ್ಯೇಕ ಕೋಚ್​ ನೇಮಿಸುವ ಬಗ್ಗೆ ಪರಿಗಣಿಸುತ್ತಿತ್ತು ಎನ್ನಲಾಗಿದೆ.

ದ್ರಾವಿಡ್​ ಉತ್ತರಾಧಿಕಾರಿಯಾಗಿ ಸದ್ಯ ಮತ್ತೋರ್ವ ಮಾಜಿ ಕ್ರಿಕೆಟಿಗ ವಿವಿಎಸ್​ ಲಕ್ಷ್ಮಣ್​ ಹೆಸರು ಮುಂಚೂಣಿಯಲ್ಲಿದೆ. ಈ ಹಿಂದೆ ದ್ರಾವಿಡ್​ ಬಿಡುವು ಪಡೆದುಕೊಂಡಾಗ ಲಕ್ಷ್ಮಣ್​​ ಹಂಗಾಮಿ ಕೋಚ್​ ಆಗಿಯೂ ಕಾರ್ಯನಿರ್ವಹಿಸಿದ್ದರು. ಆದರೆ ಸದ್ಯ ಬೆಂಗಳೂರಿನ ರಾಷ್ಟ್ರೀಯ ಕ್ರಿಕೆಟ್​ ಅಕಾಡೆಮಿಯ ಮುಖ್ಯಸ್ಥರಾಗಿರುವ ಲಕ್ಷ್ಮಣ್​, ಪೂರ್ಣಪ್ರಮಾಣದ ಕೋಚ್​ ಹುದ್ದೆಗೆ ಅರ್ಜಿ ಸಲ್ಲಿಸುವ ಸಾಧ್ಯತೆ ಇಲ್ಲ ಎನ್ನಲಾಗಿದೆ.

ಭಾರತ ತಂಡದ ಕೆಲ ಹಿರಿಯ ಆಟಗಾರರು ವಿದೇಶಿ ಕೋಚ್​ ತರುವಂತೆ ಬಿಸಿಸಿಐಯನ್ನು ಕೇಳಿಕೊಂಡಿದ್ದಾರೆ. ಇದರಿಂದಾಗಿ ಬಿಸಿಸಿಐ, ಐಪಿಎಲ್​ನಲ್ಲಿ ಕೆಲ ತಂಡಗಳ ಮುಖ್ಯ ಕೋಚ್​ ಆಗಿ ಹೆಚ್ಚಿನ ಅನುಭವ ಪಡೆದುಕೊಂಡಿರುವ ಕೆಲ ವಿದೇಶಿಯರನ್ನು ಸಂಪರ್ಕಿಸಿದ್ದರೂ, ಅವರು ಹೆಚ್ಚಿನ ಆಸಕ್ತಿ ತೋರಿಲ್ಲ ಎನ್ನಲಾಗಿದೆ.

https://www.vijayavani.net/karnatakas-budding-athlete-unni-ayyappa-gets-gold-medal