ಭಾರತಕ್ಕೆ ಇಂದು ಕೆನಡಾ ಸವಾಲು; ಮಳೆ ಕಾಮೋರ್ಡದ ನಡುವೆ ಸತತ 4ನೇ ಜಯದ ನಿರೀಕ್ಷೆ

ಲೌಡೆರ್​ಹಿಲ್​ (ಫ್ಲಾರಿಡಾ): ಸತತ 3 ಗೆಲುವಿನೊಂದಿಗೆ ಸೂಪರ್​-8 ಪ್ರವೇಶವನ್ನು ಈಗಾಗಲೆ ಖಾತ್ರಿಪಡಿಸಿಕೊಂಡಿರುವ ಟೀಮ್​ ಇಂಡಿಯಾ ಐಸಿಸಿ ಟಿ20 ವಿಶ್ವಕಪ್​ ಟೂರ್ನಿಯ ತನ್ನ 4ನೇ ಹಾಗೂ ಅಂತಿಮ ಲೀಗ್​ ಪಂದ್ಯದಲ್ಲಿ ಶನಿವಾರ ಕೆನಡಾ ತಂಡವನ್ನು ಎದುರಿಸಲಿದೆ. ಮೊದಲ 3 ಪಂದ್ಯಗಳನ್ನು ನ್ಯೂಯಾರ್ಕ್​ನಲ್ಲಿ ಆಡಿದ್ದ ಭಾರತ ಈಗ ಅಮೆರಿಕದ ಮತ್ತೊಂದು ಕ್ರಿಕೆಟ್​ ತಾಣವಾದ ಲೌಡೆರ್​ಹಿಲ್​ನಲ್ಲೂ ಗೆಲುವಿನ ಓಟ ಮುಂದುವರಿಸುವ ಹಂಬಲದಲ್ಲಿದೆ. ಆದರೆ ಪಂದ್ಯಕ್ಕೆ ಮಳೆ ಭೀತಿ ಕಾಡುತ್ತಿದ್ದು, ಒಂದೂ ಎಸೆತ ಕಾಣದೆ ರದ್ದಾಗುವ ಸಾಧ್ಯತೆ ಹೆಚ್ಚಿದೆ.

ಭಾರತಕ್ಕೆ ಅಮೆರಿಕದಲ್ಲಿ ಇದು ಕೊನೇ ಪಂದ್ಯವಾಗಿದ್ದು, ಸೂಪರ್​-8ನಿಂದ ಎಲ್ಲ ಪಂದ್ಯಗಳನ್ನು ವೆಸ್ಟ್​ ಇಂಡೀಸ್​ ನೆಲದಲ್ಲೇ ಆಡಲಿದೆ. ಭಾರತಕ್ಕೆ ಹೊಸ ಆರಂಭಿಕ ಜೋಡಿ ಕೈಕೊಡುತ್ತಿದ್ದರೂ, ಮಧ್ಯಮ ಕ್ರಮಾಂಕದಲ್ಲಿ ರಿಷಭ್​ ಪಂತ್​ ಮತ್ತು ಸೂರ್ಯಕುಮಾರ್​ ಯಾದವ್​ ಉಪಯುಕ್ತ ಕೊಡುಗೆಗಳನ್ನು ನೀಡಿದ್ದಾರೆ. ಬೌಲರ್​ಗಳು ಅದರಲ್ಲೂ ಪ್ರಮುಖವಾಗಿ ವೇಗದ ಬೌಲರ್​ಗಳು ನ್ಯೂಯಾರ್ಕ್​ನ ಬೌಲಿಂಗ್​ ಸ್ವರ್ಗದಲ್ಲಿ ಪ್ರಾಬಲ್ಯವನ್ನೇ ಮೆರೆದಿದ್ದರು. ಜಸ್​ಪ್ರೀತ್​ ಬುಮ್ರಾ (5 ವಿಕೆಟ್​), ಹಾರ್ದಿಕ್​ ಪಾಂಡ್ಯ (7) ಮತ್ತು ಅರ್ಷದೀಪ್​ ಸಿಂಗ್​ (7) ನ್ಯೂಯಾರ್ಕ್​ನಲ್ಲಿ ಹೆಚ್ಚಿನ ಯಶ ಕಂಡಿದ್ದರು.

ಟೀಮ್​ ನ್ಯೂಸ್​:

ಭಾರತ: ಔಪಚಾರಿಕ ಪಂದ್ಯದಲ್ಲಿ ಭಾರತ ಸಂಜು ಸ್ಯಾಮ್ಸನ್​ ಮತ್ತು ಯಶಸ್ವಿ ಜೈಸ್ವಾಲ್​ಗೆ ಅವಕಾಶ ಕಲ್ಪಿಸಬಹುದೇ ಎಂಬುದು ಸ್ಪಷ್ಟವಾಗಿಲ್ಲ. ಜೈಸ್ವಾಲ್​ ತಂಡದೊಳಗೆ ಬಂದರೆ ಕೊಹ್ಲಿ 3ನೇ ಕ್ರಮಾಂಕದಲ್ಲಿ ಆಡಬೇಕಾಗುತ್ತದೆ. ಭಾರತ ಟೂರ್ನಿಯಲ್ಲಿ ಮೊದಲ ಬಾರಿಗೆ ತಜ್ಞ ಸ್ಪಿನ್​ ಬೌಲರ್​ ಅನ್ನು ಕಣಕ್ಕಿಳಿಸುವುದೇ ಎಂಬ ಕುತೂಹಲವೂ ಇದೆ. ರವೀಂದ್ರ ಜಡೇಜಾ ಬೌಲಿಂಗ್​ನಲ್ಲಿ ಹೆಚ್ಚು ಪರಿಣಾಮಕಾರಿ ಎನಿಸಿಲ್ಲ. ಹೀಗಾಗಿ ಕುಲದೀಪ್​ ಯಾದವ್​ ಅಥವಾ ಯಜುವೇಂದ್ರ ಚಾಹಲ್​ ಅವರಲ್ಲಿ ಒಬ್ಬರು ಆಡಬಹುದು.

ಕೆನಡಾ: ಹಿಂದಿನ 3 ಪಂದ್ಯಗಳಲ್ಲಿ 1ರಲ್ಲಿ ಗೆದ್ದಿರುವ ಕೆನಡಾ, ಭಾರತಕ್ಕೆ ನಿಟಕ ಪೈಪೋಟಿ ನೀಡುವ ತವಕದಲ್ಲಿದೆ. ಆರಂಭಿಕ ಆರನ್​ ಜಾನ್ಸನ್​ ಭರ್ಜರಿ ಫಾರ್ಮ್​ ತಂಡಕ್ಕೆ ಬಲ ತುಂಬಿದೆ. ಭಾರತದ ಬಲಿಷ್ಠ ಬೌಲಿಂಗ್​ ವಿಭಾಗಕ್ಕೆ ಕೆನಡಾ ಯಾವ ರೀತಿ ಪ್ರತಿರೋಧ ತೋರುವುದು ಎಂಬ ಕೌತುಕವಿದೆ. ದಾವಣಗೆರೆಯ ಶ್ರೇಯಸ್​ ಮೋವಾ ತಂಡದ ವಿಕೆಟ್​ ಕೀಪರ್​ ಆಗಿದ್ದಾರೆ.

ಆರಂಭ: ರಾತ್ರಿ 8.00

ನೇರಪ್ರಸಾರ: ಸ್ಟಾರ್​ ಸ್ಪೋಟ್ಸ್​, ಹಾಟ್​ ಸ್ಟಾರ್​.

ಕೊಹ್ಲಿ ಫಾರ್ಮ್​ ಕಳವಳ

ಐಪಿಎಲ್​ನಲ್ಲಿ ಸರ್ವಾಧಿಕ ರನ್​ಸ್ಕೋರರ್​ ಎನಿಸಿ ಆರೆಂಜ್​ ಕ್ಯಾಪ್​ ಗೆದ್ದುಕೊಂಡಿದ್ದ ವಿರಾಟ್​ ಕೊಹ್ಲಿ, ಟಿ20 ವಿಶ್ವಕಪ್​ನಲ್ಲಿ ರನ್​ ಗಳಿಸುವುದನ್ನೇ ಮರೆತಿದ್ದಾರೆ. ಮೊದಲ 3 ಪಂದ್ಯಗಳಲ್ಲಿ ಎರಡಂಕಿ (1, 4, 0) ತಲುಪಲು ವಿಲರಾಗಿರುವ ಕೊಹ್ಲಿ, ಟೀಮ್​ ಇಂಡಿಯಾ ಪರ ಆರಂಭಿಕ ಪಾತ್ರದಲ್ಲೂ ವೈಲ್ಯ ಕಂಡಿದ್ದಾರೆ. ಇದರಿಂದ ಅವರು ಮತ್ತೆ 3ನೇ ಕ್ರಮಾಂಕದಲ್ಲೇ ಆಡಬೇಕೆಂಬ ಒತ್ತಾಯಗಳೂ ಶುರುವಾಗಿವೆ. ಆದರೆ ಕೊಹ್ಲಿ ಈ ಬಾರಿ ಆರಂಭಿಕನಾಗಿ ಇನ್ನೊಂದು ಅವಕಾಶ ಲಭಿಸುವ ಸಾಧ್ಯತೆ ಹೆಚ್ಚಿದೆ. ಸೂಪರ್​-8 ಹಂತಕ್ಕೆ ಮುನ್ನ ಕೆನಡಾ ಎದುರು ವಿರಾಟ್​ ಕೊಹ್ಲಿ ಲಯ ಕಂಡುಕೊಳ್ಳುವ ನಿರೀೆಯೂ ಹರಡಿದೆ.

ಪಿಚ್​ ರಿಪೋರ್ಟ್​

ನ್ಯೂಯಾರ್ಕ್​ನಿಂದ 1,850 ಕಿಮೀ ದೂರದಲ್ಲಿರುವ ಫ್ಲಾರಿಡಾದ ಬ್ರೋವರ್ಡ್​ ಕೌಂಟಿ ಸ್ಟೇಡಿಯಂನ ಪಿಚ್​, ನಾಸೌ ಸ್ಟೇಡಿಯಂನಂತೆ ಬ್ಯಾಟಿಂಗ್​ಗೆ ಕಠಿಣವಲ್ಲ. ಹೀಗಾಗಿ ಭಾರತೀಯ ಬ್ಯಾಟರ್​ಗಳು ಇಲ್ಲಿ ನಿರಾಳವಾಗಿ ಬ್ಯಾಟಿಂಗ್​ ನಡೆಸುವ ನಿರೀೆ ಇದೆ. ಸೂಪರ್-8ಕ್ಕೆ ಮುನ್ನ ಬ್ಯಾಟರ್​ಗಳಿಗೆ ಲಯ ಕಂಡುಕೊಳ್ಳಲು ಪಿಚ್​ ನೆರವಾದರೆ ಅಚ್ಚರಿ ಇಲ್ಲ.

ಮಳೆ ಅಡಚಣೆ ಸಾಧ್ಯತೆ

ಫ್ಲಾರಿಡಾದಲ್ಲಿ ಕಳೆದ ಕೆಲ ದಿನಗಳಿಂದ ಭಾರಿ ಮಳೆ ಸುರಿಯುತ್ತಿದ್ದು, ರಸ್ತೆಯಲ್ಲೆಲ್ಲಾ ನೀರು ತುಂಬಿ ಪ್ರವಾಹ ಪರಿಸ್ಥಿತಿ ನಿರ್ಮಾಣವಾಗಿದೆ. ಇದರ ನಡುವೆ ಕ್ರಿಕೆಟ್​ ಪಂದ್ಯ ಆಡುವುದು ಬಹುತೇಕ ಕನಸಿನ ಮಾತು ಎನ್ನಲಾಗುತ್ತಿದೆ. ಶುಕ್ರವಾರ ನಿಗದಿಯಾಗಿದ್ದ ಭಾರತ ತಂಡದ ಅಭ್ಯಾಸ ಅವಧಿಯೂ ಮಳೆಯಿಂದಾಗಿ ರದ್ದುಗೊಂಡಿದೆ.

ವಿಂಡೀಸ್​ನಲ್ಲಿ ಆಡದಿರುವ ಹಿನ್ನಡೆ

ಭಾರತ ತಂಡ ಲೀಗ್​ ಹಂತದ ಎಲ್ಲ 4 ಪಂದ್ಯಗಳನ್ನು ಅಮೆರಿಕದಲ್ಲೇ ಆಡಿದ್ದರೆ, ಸೂಪರ್​&8 ಹಂತದಲ್ಲಿ ಭಾರತಕ್ಕೆ ಎದುರಾಳಿಯಾಗಲಿರುವ ಅಫ್ಘಾನಿಸ್ತಾನ, ಬಾಂಗ್ಲಾದೇಶ ಮತ್ತು ಆಸ್ಟ್ರೆಲಿಯಾ ತಂಡಗಳು ವಿಂಡೀಸ್​ನಲ್ಲೇ ಹೆಚ್ಚಿನ ಪಂದ್ಯಗಳನ್ನು ಆಡಿವೆ. ಇದು ಸೂಪರ್​-8 ಹಂತದಲ್ಲಿ ಭಾರತಕ್ಕೆ ಹಿನ್ನಡೆಯಾಗುವ ಭೀತಿ ಇದೆ. ಅಲ್ಲದೆ ಭಾರತ ತಂಡ ಸೂಪರ್​-8 ಹಂತದಲ್ಲಿ 3 ಪಂದ್ಯಗಳನ್ನು 5 ದಿನಗಳ ಅಂತರದಲ್ಲಿ ಆಡಲಿದೆ. ಭಾರತ&ಆಸೀಸ್​ ನಡುವಿನ ಪಂದ್ಯ ಸೇಂಟ್​ ಲೂಸಿಯಾದಲ್ಲಿ ನಡೆಯಲಿದ್ದು, ಆಸೀಸ್​ ಇಲ್ಲಿ ಈಗಾಗಲೆ ಆಡಿರುವುದು ಅದಕ್ಕೆ ಅನುಕೂಲಕರ ಎನಿಸಿದೆ.

*8: ಭಾರತ ತಂಡ ಫ್ಲಾರಿಡಾದಲ್ಲಿ ಈ ಹಿಂದೆ 8 ಟಿ20 ಪಂದ್ಯಗಳನ್ನು ಆಡಿದೆ. ವಿಂಡೀಸ್​ ವಿರುದ್ಧದ ಈ ಕಾದಾಟಗಳಲ್ಲಿ 5ರಲ್ಲಿ ಗೆದ್ದಿದ್ದು, 2ರಲ್ಲಿ ಸೋತಿದೆ. 1 ಪಂದ್ಯ ರದ್ದುಗೊಂಡಿದೆ.

https://www.vijayavani.net/debutants-usa-script-history-enter-super-8-of-t20-wc-at-pakistans-expense