ಕೊಲಂಬೊ: ಏಷ್ಯಾಕಪ್ನ ಸೂಪರ್-4 ಹಾಗೂ ಫೈನಲ್ ಪಂದ್ಯಗಳನ್ನು ವೇಳಾಪಟ್ಟಿಯಲ್ಲಿರುವಂತೆ ಕೊಲಂಬೊದ ಆರ್. ಪ್ರೇಮದಾಸ ಕ್ರೀಡಾಂಗಣದಲ್ಲೇ ನಡೆಸಲಾಗುವುದು ಎಂದು ಏಷ್ಯನ್ ಕ್ರಿಕೆಟ್ ಕೌನ್ಸಿಲ್ (ಎಸಿಸಿ) ಖಚಿತ ಪಡಿಸಿದೆ. ಕೊಲಂಬೊದಲ್ಲಿ ಇತ್ತೀಚೆಗೆ ಸುರಿದ ಭಾರಿ ಮಳೆಯಿಂದಾಗಿ ಪ್ರವಾಹ ಪರಿಸ್ಥಿತಿ ಉಂಟಾದ ಹಿನ್ನೆಲೆಯಲ್ಲಿ ಅಲ್ಲಿ ನಿಗದಿಯಾಗಿದ್ದ ಎಲ್ಲ 6 ಪಂದ್ಯಗಳನ್ನು ಹಂಬಂತೋಟಾಗೆ ಸ್ಥಳಾಂತರಿಸುವ ಸಾಧ್ಯತೆಗಳಿವೆ ಎಂದು ವರದಿಯಾಗಿತ್ತು. ಆದರೆ ಇದೀಗ ಕೊಲಂಬೊದಲ್ಲಿ ವಾತಾವರಣ ಸುಧಾರಿಸಿದ್ದು, ಪಂದ್ಯ ಆಯೋಜಿಸಲು ಸೂಕ್ತ ಪರಿಸ್ಥಿತಿ ನಿರ್ಮಾಣವಾದ ಕಾರಣ ಎಸಿಸಿ ಗೊಂದಲಗಳಿಗೆ ತೆರೆ ಎಳೆದಿದೆ. ಇದಲ್ಲದೆ, ಪಂದ್ಯಗಳನ್ನು ದಿಢೀರ್ ಸ್ಥಳಾಂತರ ಮಾಡುವುದರಿಂದ ಟೂರ್ನಿಯ ನೇರಪ್ರಸಾರಕ್ಕೆ ಬೇಕಾಗುವ ಸಾಮಾಗ್ರಿ ಹಾಗೂ ಸಿಬ್ಬಂದಿಯನ್ನು ಕಳುಹಿಸುವುದು ಕಷ್ಟ ಸಾಧ್ಯ ಎಂದು ಪ್ರಸಾರಕರು ತಿಳಿಸಿದ್ದರು ಎನ್ನಲಾಗಿದೆ.
