ಸನ್​ರೈಸರ್ಸ್​ ಆಸೆ ಜೀವಂತ; ಚೆನ್ನೈ ಸೂಪರ್​ಕಿಂಗ್ಸ್ ಪ್ಲೇಆಫ್​ ರೇಸ್​ನಿಂದ ಬಹುತೇಕ ಹೊರಕ್ಕೆ

ಚೆನ್ನೈ: ಹರ್ಷಲ್​ ಪಟೇಲ್​ (28ಕ್ಕೆ 4) ಮಾರಕ ಬೌಲಿಂಗ್​ ದಾಳಿಯ ನೆರವಿನಿಂದ ಸನ್​ರೈಸರ್ಸ್​ ಹೈದರಾಬಾದ್​ ತಂಡ ಐಪಿಎಲ್​ 18ನೇ ಆವೃತ್ತಿಯಲ್ಲಿ ಚೆನ್ನೈ ಸೂಪರ್​ಕಿಂಗ್ಸ್​ ವಿರುದ್ಧ 5 ವಿಕೆಟ್​ಗಳಿಂದ ಗೆದ್ದು ಪ್ಲೇಆಫ್​​ ಆಸೆ ಜೀವಂತ ಉಳಿಸಿಕೊಂಡಿದೆ. ಪ್ಯಾಟ್​ ಕಮ್ಮಿನ್ಸ್​ ಪಡೆಗೆ ಕಳೆದ 8 ಪಂದ್ಯಗಳಲ್ಲಿ ಇದು ಕೇವಲ 2ನೇ ಗೆಲುವಾಗಿದೆ. ಟೂರ್ನಿಯಲ್ಲಿ 7ನೇ ಸೋಲು ಅನುಭವಿಸಿದ ಎಂಎಸ್​ ಧೋನಿ ಪಡೆ ಅಂಕಪಟ್ಟಿಯಲ್ಲಿ ಕೊನೇ ಸ್ಥಾನದಲ್ಲೇ ಉಳಿದು, ಪ್ಲೇಆಫ್​​ ಆಸೆಯನ್ನು ಬಹುತೇಕ ಕೈಚೆಲ್ಲಿದೆ. ಸನ್​ರೈಸರ್ಸ್​ಗೆ ಇದು ಚೆಪಾಕ್​ನಲ್ಲಿ ಮೊಟ್ಟಮೊದಲ ಗೆಲುವಿನ ಸಂಭ್ರಮವಾಗಿದೆ.

ಎಂಎ ಚಿದಂಬರಂ ಸ್ಟೇಡಿಯಂನಲ್ಲಿ ಶುಕ್ರವಾರ ನಡೆದ ಪಂದ್ಯದಲ್ಲಿ ಟಾಸ್​ ಸೋತು ಮೊದಲು ಬ್ಯಾಟಿಂಗ್​ಗೆ ಇಳಿದ ಸಿಎಸ್​ಕೆ, ಡಿವಾಲ್ಡ್​ ಬ್ರೆವಿಸ್​ 42 ರನ್​ (25 ಎಸೆತ, 1 ಬೌಂಡರಿ, 4 ಸಿಕ್ಸರ್​) ದಿಟ್ಟ ಆಟದ ನಡುವೆ ಹರ್ಷಲ್​ ಪಟೇಲ್​ ಮತ್ತು ಇನ್ನಿಬ್ಬರುವ ವೇಗಿಗಳಾದ ಪ್ಯಾಟ್​ ಕಮ್ಮಿನ್ಸ್​ (21ಕ್ಕೆ 2) ಮತ್ತು ಜೈದೇವ್​ ಉನಾದ್ಕತ್​ (21ಕ್ಕೆ 2) ದಾಳಿಗೆ ಕುಸಿದು 19.5 ಓವರ್​ಗಳಲ್ಲಿ 154 ರನ್​ಗಳಿಗೆ ಸರ್ವಪತನ ಕಂಡಿತು. ಪ್ರತಿಯಾಗಿ ಸನ್​ರೈಸರ್ಸ್​ ಇಶಾನ್​ ಕಿಶನ್​ (44 ರನ್​, 34 ಎಸೆತ, 5 ಬೌಂಡರಿ, 1 ಸಿಕ್ಸರ್​) ಮತ್ತು ಹೋರಾಟದಿಂದ 18.4 ಓವರ್​ಗಳಲ್ಲಿ 5 ವಿಕೆಟ್​ಗೆ 155 ರನ್​ ಗಳಿಸಿ ಗೆಲುವು ಸಾಧಿಸಿತು.

ಸನ್​ರೈಸರ್ಸ್​ ಯಶಸ್ವಿ ಚೇಸಿಂಗ್​: ಅಭಿಷೇಕ್​ ಶರ್ಮ (0) ಮತ್ತು ಟ್ರಾವಿಸ್​ ಹೆಡ್​ (19) ಸನ್​ರೈಸರ್ಸ್​ಗೆ ಈ ಸಲವೂ ಉತ್ತಮ ಆರಂಭ ಒದಗಿಸಲು ವಿಲರಾದರು. ಇದರಿಂದ ಸನ್​ರೈಸರ್ಸ್​ ಪವರ್​ಪ್ಲೇನಲ್ಲಿ 2 ವಿಕೆಟ್​ಗೆ 37 ರನ್​ ಗಳಿಸಲಷ್ಟೇ ಶಕ್ತವಾಯಿತು. ನಂತರ ಹೆನ್ರಿಕ್​ ಕ್ಲಾಸೆನ್​ (7) ಕೂಡ ನಿರಾಸೆ ಮೂಡಿಸಿದರೆ, ಇಶಾನ್​ ಕಿಶನ್​ ಚೇಸಿಂಗ್​ಗೆ ಬಲ ತುಂಬಿದರು. ಕೊನೆಯಲ್ಲಿ ಕಮಿಂದು ಮೆಂಡಿಸ್​ (32*ರನ್​, 22 ಎಸೆತ, 3 ಬೌಂಡರಿ) ಮತ್ತು ನಿತೀಶ್​ ಕುಮಾರ್​ ರೆಡ್ಡಿ (19*) ಮುರಿಯದ 6ನೇ ವಿಕೆಟ್​ಗೆ 31 ಎಸೆತಗಳಲ್ಲಿ 49 ರನ್​ ಸೇರಿಸುವ ಮೂಲಕ ಇನ್ನೂ 8 ಎಸೆತ ಬಾಕಿ ಇರುವಂತೆಯೇ ಗೆಲುವಿನ ದಡ ಸೇರಿಸಿದರು. ನೂರ್​ ಅಹ್ಮದ್​ (42ಕ್ಕೆ 2) ಶ್ರಮ ವ್ಯರ್ಥಗೊಂಡಿತು.

https://www.vijayavani.net/cricketer-sharath-gets-married-to-sandalwood-actress-archana