ಅವರಿಬ್ಬರು ರನ್ ಗಳಿಸುತ್ತಾರೋ ಇಲ್ಲವೋ..ಮುಂಬರುವ ವಿಶ್ವಕಪ್​ಗೆ ಆಯ್ಕೆ ಮಾಡಿ ಎಂದ Sunil Gavaskar

Sunil Gavaskar: ಶನಿವಾರ (ಅ 25) ಸಿಡ್ನಿಯಲ್ಲಿ ನಡೆದ ಆಸ್ಟ್ರೇಲಿಯಾ ವಿರುದ್ಧದ ಮೂರನೇ ಏಕದಿನ ಪಂದ್ಯದಲ್ಲಿ ಅದ್ಭುತ ಪ್ರದರ್ಶನ ನೀಡುವ ಮೂಲಕ ಲಯಕ್ಕೆ ಮರಳಿರುವ ದಿಗ್ಗಜ ಕ್ರಿಕೆಟಿಗರಾದ ರೋಹಿತ್ ಶರ್ಮಾ ಮತ್ತು ವಿರಾಟ್ ಕೊಹ್ಲಿ ಬಗ್ಗೆ ಮಾತನಾಡಿರುವ ಮಾಜಿ ಕ್ರಿಕೆಟಿಗ ಸುನೀಲ್ ಗವಾಸ್ಕರ್​ ಮುಂಬರುವ ಏಕದಿನ ವಿಶ್ವಕಪ್‌ಗೆ ಅವರನ್ನು ಆಯ್ಕೆ ಮಾಡುವುದು ತುಂಬಾ ಅಗತ್ಯವಾಗಿದೆ ಎಂದಿದ್ದಾರೆ.

ಇಂಡಿಯಾ ಟುಡೇ ಜೊತೆ ಮಾತನಾಡಿದ ಗವಾಸ್ಕರ್​, ಮೂರು ಪಂದ್ಯಗಳ ಸರಣಿಗೆ ಇಬ್ಬರು ತಮ್ಮನ್ನು ತಾವು ಲಭ್ಯವಾಗುವಂತೆ ಮಾಡಿಕೊಂಡಿರುವುದು ಏಕದಿನ ಸ್ವರೂಪದಲ್ಲಿ ಮುಂದುವರೆಯುವ ಮೂಲಕ, ಮುಂದಿನ ವಿಶ್ವಕಪ್​ನಲ್ಲಿ ಭಾರತ ತಂಡವನ್ನು ಚಾಂಪಿಯನ್​​ ಪಟ್ಟದತ್ತ ಕೊಂಡೊಯ್ಯುವ ಸ್ಪಷ್ಟ ಸಂದೇಶವನ್ನು ನೀಡಿದ್ದಾರೆ ಎಂದರು.

ಇದ್ನನೂ ಓದಿ:ಮಹಿಳೆಯರ ಏಕದಿನ ವಿಶ್ವಕಪ್: ಅಲನಾ ಕಿಂಗ್ ದಾಳಿಗೆ ಕಂಗೆಟ್ಟ ದಕ್ಷಿಣ ಆಫ್ರಿಕಾ; ಆಸೀಸ್​ಗೆ ಅಗ್ರಸ್ಥಾನ ಭದ್ರ

ಅವರಿಬ್ಬರು ರನ್ ಗಳಿಸುತ್ತಾರೋ ಇಲ್ಲವೋ.. ಆದರೆ ತಮ್ಮ ಸಾಮರ್ಥ್ಯ ಮತ್ತು ಅನುಭವದೊಂದಿಗೆ ತಂಡಕ್ಕೆ ನೆರವಾಗಲಿದ್ದಾರೆ, ಅವರ ಪ್ರಸ್ತುತ ಫಾರ್ಮ್, ವಿಶ್ವಕಪ್​ ಅಭಿಯಾನಕ್ಕೆ ಆಯ್ಕೆಯಾಗುವ ಹಕ್ಕನ್ನು ಬಲಪಡಿಸುತ್ತದೆ ಎಂದು ಅಭಿಪ್ರಾಯಪಟ್ಟ ಗವಾಸ್ಕರ್, ಈ ರೀತಿಯ ಅದ್ಭುತ ಪ್ರದರ್ಶನದಿಂದ ನೀವು ಅವರ ಹೆಸರುಗಳನ್ನು ನೇರವಾಗಿ ದಕ್ಷಿಣ ಆಫ್ರಿಕಾದಲ್ಲಿ ನಡೆಯಲಿರುವ 2027 ರ ವಿಶ್ವಕಪ್ ತಂಡಕ್ಕೆ ಆಯ್ಕೆ ಮಾಡಬಹುದು ಎಂದು ಹೇಳಿದರು.

ಆಸ್ಟ್ರೇಲಿಯಾ ವಿರುದ್ಧದ ಸರಣಿಯ ಮೊದಲ ಪಂದ್ಯದಲ್ಲಿ ಬೇಗನೆ ವಿಕೆಟ್​ ಒಪ್ಪಿಸಿದ್ದ ಹಿಟ್​ ಮ್ಯಾನ್​​ ರೋಹಿತ್​, ಎರಡನೇ ಏಕದಿನ ಪಂದ್ಯದಲ್ಲಿ ಅರ್ಧಶತಕ ಬಾರಿಸುವ ಮೂಲಕ ಟೀಕೆ ಮಾಡುವವರಿಗೆ ಬ್ಯಾಟ್​ ಮೂಲಕವೇ ತಿರುಗೇಟು ನೀಡಿದ್ದರು. ಮತ್ತೊಂದೆಡೆ, ವಿರಾಟ್ ಕೊಹ್ಲಿ ಆರಂಭಿಕ ಎರಡು ಪಂದ್ಯಗಳಲ್ಲಿ ಸತತ ಶೂನ್ಯ ಸಾಧನೆ ಮಾಡಿದ್ದರು, ಅಂತಿಮ ಪಂದ್ಯದಲ್ಲಿ ತಮ್ಮ ಖ್ಯಾತಿಗೆ ತಕ್ಕಂತೆ ಆಟವಾಡಿದ ಕಿಂಗ್​ ಕೊಹ್ಲಿ, ಅರ್ಧಶತಕ ಗಳಿಸುವ ಮೂಲಕ ತಮ್ಮಲ್ಲಿ ಇನ್ನೂ ರನ್​ ಹಸಿವಿದೆ ಎನ್ನುವುದನ್ನು ಸಾರಿ ಸಾರಿ ಹೇಳಿದರು.

ಇದನ್ನೂ ಓದಿ:3ನೇ ಏಕದಿನ, 33ನೇ ಶತಕ: ಐತಿಹಾಸಿಕ ದಾಖಲೆ ಬರೆದ ರೋಹಿತ್ ಶರ್ಮ, ಸೆಂಚುರಿ ಸ್ಟಾರ್​ಗೆ ಫ್ಯಾನ್ಸ್ ಸಲಾಂ | Rohit Sharma

ಭಾರತ ತಂಡ 2-1 ಅಂತರದಲ್ಲಿ ಸರಣಿ ಸೋತರೂ, ಹಿರಿಯ ಆಟಗಾರರ ಪ್ರದರ್ಶನ ಅಭಿಮಾನಿಗಳ ಮುಖದಲ್ಲಿ ನಗು ತಂದಿದೆ.(ಏಜೆನ್ಸೀಸ್​)

https://www.vijayavani.net/bihar-election-a-cricket-stadium-in-mahua-and-india-pak-faceoff-tej-pratap-yadavs-poll-pitch