ಆಲ್ ಇಂಗ್ಲೆಂಡ್ ಬ್ಯಾಡ್ಮಿಂಟನ್, ಪಿವಿ ಸಿಂಧುಗೆ ನಿರಾಸೆ, ಭಾರತದ ಹೋರಾಟ ಅಂತ್ಯ

ಬರ್ಮಿಂಗ್‌ಹ್ಯಾಂ: ವಿಶ್ವ ಚಾಂಪಿಯನ್ ಪಿವಿ ಸಿಂಧು ಪ್ರತಿಷ್ಠಿತ ಆಲ್ ಇಂಗ್ಲೆಂಡ್ ಬ್ಯಾಡ್ಮಿಂಟನ್ ಚಾಂಪಿಯನ್‌ಷಿಪ್‌ನ ಸೆಮಿಫೈನಲ್‌ನಲ್ಲಿ ಮುಗ್ಗರಿಸಿದ್ದಾರೆ. ಶನಿವಾರ ನಡೆದ ಮಹಿಳೆಯರ ಸಿಂಗಲ್ಸ್ ವಿಭಾಗದ ಕದನದಲ್ಲಿ ಪಿವಿ ಸಿಂಧು 17-21, 9-21 ನೇರ ಗೇಮ್‌ಗಳಿಂದ ಥಾಯ್ಲೆಂಡ್‌ನ ಪೊರ್ನ್‌ಪಾವೀ ಚೊಚುವಾಂಗ್ ಎದುರು ಕೇವಲ 43 ನಿಮಿಷಗಳಲ್ಲೇ ಶರಣಾದರು. ಇದರೊಂದಿಗೆ ಟೂರ್ನಿಯಲ್ಲಿ ಭಾರತದ ಹೋರಾಟ ಕೂಡ ಅಂತ್ಯಗೊಂಡಂತಾಗಿದೆ.

ಇದನ್ನೂ ಓದಿ: ಆರತಕ್ಷತೆ ಚಿತ್ರದಿಂದಾಗಿ ಕೆಂಗಣ್ಣಿಗೆ ಗುರಿಯಾದ ಜಸ್ ಪ್ರೀತ್ ಬುಮ್ರಾ 

ವಿಶ್ವ ನಂ.11 ಥಾಯ್ಲೆಂಡ್ ಆಟಗಾರ್ತಿ ತೋರಿದ ಚುರುಕಿನ ನಿರ್ವಹಣೆ ಎದುರು ಭಾರತದ ಆಟಗಾರ್ತಿ ಪ್ರತಿರೋಧ ತೋರಲು ವಿಫಲರಾದರು. ಪಿವಿ ಸಿಂಧು 2018ರಲ್ಲೂ ಟೂರ್ನಿಯ ಸೆಮಿಫೈನಲ್‌ನಲ್ಲಿ ಸೋಲು ಕಂಡಿದ್ದರು. ಈ ಮೂಲಕ ಪ್ರತಿಷ್ಠಿತ ಆಲ್ ಇಂಗ್ಲೆಂಡ್ ಚಾಂಪಿಯನ್‌ಷಿಪ್‌ನಲ್ಲಿ ಸಿಂಧು ಫೈನಲ್ ಪ್ರವೇಶಿಸುವ ಕನಸು ಕನಸಾಗಿಯೇ ಉಳಿಯಿತು. ಸ್ಪೇನ್ ತಾರೆ ಕ್ಯಾರೊಲಿನ್ ಮರಿನ್ ಸೇರಿದಂತೆ ಪ್ರಮುಖ ಆಟಗಾರ್ತಿಯರ ಗೈರಿನಲ್ಲಿ ಪಿವಿ ಸಿಂಧು ಈ ಬಾರಿ ಪ್ರಶಸ್ತಿಗೆ ಮುತ್ತಿಕ್ಕುವ ಉತ್ತಮ ಅವಕಾಶ ಹೊಂದಿದ್ದರು. 2001ರಲ್ಲಿ ಪುಲ್ಲೇಲಾ ಗೋಪಿಚಂದ್ ಗೆದ್ದ ಬಳಿಕ ಈ ಟೂರ್ನಿಯಲ್ಲಿ ಭಾರತೀಯರಿಗೆ ಪ್ರಶಸ್ತಿ ಮರೀಚಿಕೆಯಾಗಿಯೇಉಳಿದಿದೆ.

ಇದನ್ನೂ ಓದಿ: ವೃತ್ತಿಪರ ಬಾಕ್ಸಿಂಗ್ ನಲ್ಲಿ ವಿಜೇಂದರ್ ಸಿಂಗ್ ಗೆ ಮೊದಲ ಸೋಲು 

ವಿಶ್ವ ನಂ.7 ಪಿವಿ ಸಿಂಧು ಎದುರಾಳಿ ಆಟಗಾರ್ತಿ ಎದುರು ಪಂದ್ಯ ಆರಂಭಕ್ಕೂ ಮುನ್ನ 4-1 ರಿಂದ ಗೆಲುವಿನ ದಾಖಲೆ ಹೊಂದಿದ್ದರು. ಸುಲಭ ಗೆಲುವಿನ ನಿರೀಕ್ಷೆಯಲ್ಲಿದ್ದ ಹೈದರಾಬಾದ್ ಆಟಗಾರ್ತಿಗೆ 23 ವರ್ಷದ ಥಾಯ್ಲೆಂಡ್ ಆಟಗಾರ್ತಿ ಶಾಕ್ ನೀಡಿದರು. ಶುಕ್ರವಾರ ರಾತ್ರಿ ನಡೆದ ಎಂಟರ ಘಟ್ಟದ ಪಂದ್ಯದಲ್ಲಿ ಸಿಂಧು 16-21, 21-16, 21-19ರಿಂದ ಮೂರನೇ ಶ್ರೇಯಾಂಕಿತ ಆಟಗಾರ್ತಿ ಜಪಾನ್‌ನ ಅಕಾನೆ ಯಮಗುಚಿ ಅವರನ್ನು ಮಣಿಸಿದ್ದರು.