ಸಚಿನ್​ ಪುತ್ರಿ ಸಾರಾ ಮತ್ತು ಕ್ರಿಕೆಟಿಗ ಶುಭಮಾನ್​ ಗಿಲ್​ ಟ್ರೋಲ್​ ಆಗಿದ್ದು ಯಾಕೆ ಗೊತ್ತೇ?

ನವದೆಹಲಿ: ಕ್ರಿಕೆಟ್​ ದಿಗ್ಗಜ ಸಚಿನ್​ ತೆಂಡುಲ್ಕರ್​ ಪುತ್ರಿ ಸಾರಾ ತೆಂಡುಲ್ಕರ್​ ಮತ್ತು ಪಂಜಾಬ್​ನ ಯುವ ಕ್ರಿಕೆಟಿಗ ಶುಭಮಾನ್​ ಗಿಲ್​ ಇಬ್ಬರೂ ಜತೆಯಾಗಿ ಸಾಮಾಜಿಕ ಜಾಲತಾಣಗಳಲ್ಲಿ ಗುರುವಾರ ಭರ್ಜರಿ ಟ್ರೋಲ್​ಗೆ ಒಳಗಾಗಿದ್ದಾರೆ. ಅವರಿಬ್ಬರು ಪೋಸ್ಟ್​ ಮಾಡಿರುವ ಚಿತ್ರಗಳಿಗೆ ಒಂದೇ ರೀತಿಯ ಕ್ಯಾಪ್ಶನ್​ ನೀಡಿರುವುದು ಇದಕ್ಕೆ ಕಾರಣವಾಗಿದೆ. ಇದರಿಂದಾಗಿ, ಇವರಿಬ್ಬರ ನಡುವೆ ಪ್ರೀತಿ ಇದೆ ಎಂದು ಕಳೆದ ಕೆಲ ಸಮಯಗಳಿಂದ ಹರಿದಾಡುತ್ತಿರುವ ಸುದ್ದಿಗಳು ಮತ್ತೆ ಚಾಲ್ತಿಗೂ ಬಂದಿವೆ.

ಬುಧವಾರದ ಪೋಸ್ಟ್​ ಒಂದರಲ್ಲಿ 20 ವರ್ಷದ ಶುಭಮಾನ್​ ಗಿಲ್​, 'ಐ ಸ್ಪೈ' ಅಂದರೆ 'ನಾನು ಬೇಹುಗಾರಿಕೆ ಮಾಡುತ್ತೇನೆ' ಎಂದು ತಮ್ಮ ಚಿತ್ರಕ್ಕೆ ಕ್ಯಾಪ್ಶನ್​ ನೀಡಿದ್ದರು. ಮತ್ತೊಂದೆಡೆ ಸಾರಾ ತೆಂಡುಲ್ಕರ್​ ಕೂಡ ಬುಧವಾರವೇ ಪೋಸ್ಟ್​ ಮಾಡಿರುವ ಚಿತ್ರಕ್ಕೆ ನಿಖರವಾಗಿ ಇದೇ ಕ್ಯಾಪ್ಶನ್​ ನೀಡಿದ್ದಾರೆ. ಇದನ್ನು ಕಂಡ ನೆಟ್ಟಿಗರು, ನಾವು ಕೂಡ ಬೇಹುಗಾರಿಕೆ ಮಾಡುತ್ತಿದ್ದೇವೆ ಎಂದು ಅವರಿಬ್ಬರನ್ನು ಭರ್ಜರಿಯಾಗಿ ಟ್ರೋಲ್​ ಮಾಡಿದ್ದಾರೆ.

ಇದನ್ನೂ ಓದಿ: ಸುರೇಶ್​ ರೈನಾ ಭಾರತ ಪರ ಪದಾರ್ಪಣೆ ಮಾಡಿ 15 ವರ್ಷ, ಪತ್ನಿಯಿಂದ ವಿಶೇಷ ಸಂದೇಶ

ಕೋಲ್ಕತ ನೈಟ್​ರೈಡರ್ಸ್​ ಬ್ಯಾಟ್ಸ್​ಮನ್​ ಶುಭಮಾನ್​ ಗಿಲ್​ ಮತ್ತು ಸಾರಾ ತೆಂಡುಲ್ಕರ್​ ನಡುವೆ ಸಂಬಂಧ ಕಲ್ಪಿಸಿದ ಸುದ್ದಿ ಹರಿದಾಡುತ್ತಿರುವುದು ಇದೇ ಮೊದಲಲ್ಲ. ಅವರಿಬ್ಬರು ಪರಸ್ಪರ ಡೇಟಿಂಗ್​ ಮಾಡುತ್ತಿದ್ದಾರೆ ಎಂಬ ಸುದ್ದಿ ಹಲವಾರು ಸಮಯದಿಂದ ಸಾಮಾಜಿಕ ಜಾಲತಾಣಗಳಲ್ಲಿ ಹರಿದಾಡುತ್ತಿವೆ. ಆದರೆ ಅದಕ್ಕೆ ಪುಷ್ಠಿ ನೀಡುವ ಅಂಶಗಳಿಗೆ ಕೊರತೆ ಇತ್ತು. ಹೀಗಾಗಿ ಈ ಬಾರಿ ಅವರಿಬ್ಬರು ಒಂದೇ ರೀತಿಯ ಕ್ಯಾಪ್ಶನ್​ ನೀಡಿರುವುದು ನೆಟ್ಟಿಗರ ಅನುಮಾನವನ್ನು ಇನ್ನಷ್ಟು ಬಲಪಡಿಸಿದೆ.

ಕಳೆದ ವರ್ಷ ಭಾರತ ಪರ 2 ಏಕದಿನ ಪಂದ್ಯಗಳನ್ನಷ್ಟೇ ಆಡುವ ಅವಕಾಶ ಪಡೆದಿದ್ದ ಶುಭಮಾನ್​ ಗಿಲ್​, ಸ್ಟಾರ್​ ಬ್ಯಾಟ್ಸ್​ಮನ್​ಗಳಾದ ವಿರಾಟ್​ ಕೊಹ್ಲಿ ಮತ್ತು ರೋಹಿತ್​ ಶರ್ಮ ಅವರಷ್ಟೇ ಪ್ರತಿಭಾನ್ವಿತರು ಎಂದು ಹೇಳಲಾಗುತ್ತದೆ. 2018ರ 19 ವಯೋಮಿತಿ ವಿಶ್ವಕಪ್​ ವಿಜೇತ ತಂಡದ ಉಪನಾಯಕರಾಗಿರುವ ಶುಭಮಾನ್​ ಗಿಲ್​, 19ನೇ ವಯಸ್ಸಿನಲ್ಲಿ ಹೊಂದಿರುವ ಸಾಮರ್ಥ್ಯದ ಶೇ. 10ರಷ್ಟನ್ನೂ ನಾನು ಆ ವಯಸ್ಸಿನಲ್ಲಿ ಹೊಂದಿರಲಿಲ್ಲ ಎಂದು ವಿರಾಟ್​ ಕೊಹ್ಲಿ ಹಿಂದೊಮ್ಮೆ ಹೇಳಿಕೊಂಡಿದ್ದರು.