4ನೇ ಟೆಸ್ಟ್​ನಲ್ಲಿ ಬೇಕಿದೆ ಕೇವಲ 25 ರನ್​... ಮತ್ತೊಂದು ದಾಖಲೆಯತ್ತ ಗಿಲ್​ ಚಿತ್ತ! | Shubman Gill

Shubman Gill: ಜು.23ರಿಂದ ಮ್ಯಾಂಚೆಸ್ಟರ್‌ನಲ್ಲಿ ಆರಂಭವಾಗಲಿರುವ ಇಂಗ್ಲೆಂಡ್​ ವಿರುದ್ಧದ ನಾಲ್ಕನೇ ಟೆಸ್ಟ್​ಗೆ ಟೀಮ್ ಇಂಡಿಯಾ ಸನ್ನದ್ಧಗೊಂಡಿದ್ದು, ಪಂದ್ಯ ಗೆಲ್ಲಲು ಎದುರುನೋಡುತ್ತಿದೆ. ಕ್ಯಾಪ್ಟನ್ ಶುಭಮನ್ ಗಿಲ್ ಪಡೆಗೆ ಇದು ನಿರ್ಣಾಯಕ ಪಂದ್ಯವಾಗಿದ್ದು, ಗೆಲ್ಲುವ ಅನಿರ್ವಾಯ ಎದುರಾಗಿದೆ. ಅಕಸ್ಮಾತ್​ ಸೋತರೆ, ಸರಣಿಯನ್ನು ಇಂಗ್ಲೆಂಡ್​ ಗೆದ್ದು ಬೀಗಲಿದೆ.

ಇದನ್ನೂ ಓದಿ: ‘ಕುಬೇರಾ’ ಚಿತ್ರದಂತೆಯೇ ಕೋಟಿಗಟ್ಟಲೇ ಹಣ ಲೂಟಿ! ಕಳ್ಳರ ಹೆಡೆಮುರಿ ಕಟ್ಟಲು ಖಾಕಿ ಬಲೆ | Scam

ಒಂದೆಡೆ ನಾಲ್ಕನೇ ಟೆಸ್ಟ್​ ಗೆಲ್ಲುವ ತವಕದಲ್ಲಿ ಭಾರತವಿದ್ದರೆ, ಮತ್ತೊಂದೆಡೆ ಶುಭಮನ್ ಗಿಲ್ ಐತಿಹಾಸಿಕ ದಾಖಲೆ ನಿರ್ಮಿಸುವತ್ತ ದಾಪುಗಾಲಿಟ್ಟಿದ್ದಾರೆ. ಇಂಗ್ಲೆಂಡ್ ವಿರುದ್ಧದ ದ್ವಿಪಕ್ಷೀಯ ಟೆಸ್ಟ್ ಸರಣಿಯಲ್ಲಿ ಅತಿ ಹೆಚ್ಚು ರನ್ ಗಳಿಸಿದ ಏಷ್ಯಾದ ಬ್ಯಾಟರ್​ ಎಂಬ ಹೆಗ್ಗಳಿಕೆಗೆ ಗಿಲ್ ಪಾತ್ರರಾಗಲಿದ್ದು, ಟೆಸ್ಟ್​ ಕ್ರಿಕೆಟ್​ ಇತಿಹಾಸದಲ್ಲಿ ತಮ್ಮದೇ ಹೊಸ ದಾಖಲೆ ಸೃಷ್ಟಿಸಲಿದ್ದಾರೆ.

ಈ ದಾಖಲೆಯು ಪ್ರಸ್ತುತ ಪಾಕಿಸ್ತಾನಿ ಕ್ರಿಕೆಟ್ ದಿಗ್ಗಜ ಮೊಹಮ್ಮದ್ ಯೂಸುಫ್ ಅವರ ಹೆಸರಿನಲ್ಲಿದೆ. 2006ರ ಇಂಗ್ಲೆಂಡ್ ಪ್ರವಾಸದಲ್ಲಿ ನಾಲ್ಕು ಪಂದ್ಯಗಳ ಟೆಸ್ಟ್ ಸರಣಿಯಲ್ಲಿ ಯೂಸುಫ್​, 90.14ರ ಸರಾಸರಿಯಲ್ಲಿ 631 ರನ್ ಗಳಿಸಿದ್ದಾರೆ. ಅವರ ಗರಿಷ್ಠ ವೈಯಕ್ತಿಕ ಸ್ಕೋರ್ 202. ಮ್ಯಾಂಚೆಸ್ಟರ್‌ನಲ್ಲಿ ನಡೆಯಲಿರುವ ನಾಲ್ಕನೇ ಟೆಸ್ಟ್​ನಲ್ಲಿ ಕೇವಲ 25 ರನ್ ಗಳಿಸಿದರೆ ಸಾಕು ಯೂಸುಫ್ ಅವರ ಸಾರ್ವಕಾಲಿಕ ದಾಖಲೆಯನ್ನು ಗಿಲ್​ ಮುರಿಯಲಿದ್ದಾರೆ.

ಗಿಲ್ ಪ್ರಸ್ತುತ ಸರಣಿಯಲ್ಲಿ ಮೂರು ಪಂದ್ಯಗಳನ್ನು ಆಡಿದ್ದು, 101.16ರ ಸರಾಸರಿಯಲ್ಲಿ 607 ರನ್ ಗಳಿಸಿದ್ದಾರೆ. ಮೊದಲ ಟೆಸ್ಟ್‌ನಲ್ಲಿ ಶತಕ ಗಳಿಸಿದ್ದ ಶುಭಮನ್​, ನಂತರ ಬರ್ಮಿಂಗ್‌ಹ್ಯಾಮ್ ಎರಡನೇ ಟೆಸ್ಟ್‌ನ ಮೊದಲ ಇನ್ನಿಂಗ್ಸ್‌ನಲ್ಲಿ ದ್ವಿಶತಕದೊಂದಿಗೆ ಮಿಂಚಿದರು. ಇಲ್ಲಿ ಅವರ ಅತ್ಯಧಿಕ ಸ್ಕೋರ್ 269.

ಇಂಗ್ಲೆಂಡ್‌ನ ಟೆಸ್ಟ್ ಸರಣಿಯಲ್ಲಿ ಅತಿ ಹೆಚ್ಚು ರನ್ ಗಳಿಸಿದ ಏಷ್ಯಾದ ಅಗ್ರ ಬ್ಯಾಟರ್​ಗಳಿವರು

1. ಮೊಹಮ್ಮದ್ ಯೂಸುಫ್ (ಪಾಕಿಸ್ತಾನ) - 2006, 4 ಪಂದ್ಯಗಳು 631 ರನ್‌.
2. ಶುಬ್‌ಮನ್ ಗಿಲ್ (ಭಾರತ) - 2025, 3 ಪಂದ್ಯ, 607 ರನ್‌.
3. ರಾಹುಲ್ ದ್ರಾವಿಡ್ (ಭಾರತ) - 2002, 4 ಪಂದ್ಯ, 602 ರನ್‌
4. ವಿರಾಟ್ ಕೊಹ್ಲಿ (ಭಾರತ) - 2018, 5 ಪಂದ್ಯ, 593 ರನ್‌
5. ಸುನಿಲ್ ಗವಾಸ್ಕರ್ (ಭಾರತ) - 1979, 4 ಪಂದ್ಯ, 542 ರನ್‌
6. ಸಲೀಮ್ ಮಲಿಕ್ (ಪಾಕಿಸ್ತಾನ) - 1992, 5 ಪಂದ್ಯ, 488 ರನ್‌

ಗಿಲ್‌ಗೆ ಸವಾಲಿನ ಪರಿಸ್ಥಿತಿ!

ಮ್ಯಾಂಚೆಸ್ಟರ್ ಟೆಸ್ಟ್ ರೂಪದಲ್ಲಿ ಗಿಲ್ ಕಠಿಣ ಪರೀಕ್ಷೆಯನ್ನು ಎದುರಿಸಲಿದ್ದಾರೆ. ಆ್ಯಂಡರ್ಸನ್-ತೆಂಡೂಲ್ಕರ್ ಟ್ರೋಫಿಯಲ್ಲಿ ಭಾರತ ಪ್ರಸ್ತುತ 1-2 ಅಂತರದಲ್ಲಿ ಮುಂದುವರಿದಿದೆ. ಮೊದಲ ಟೆಸ್ಟ್‌ನಲ್ಲಿ ಸೋತ ಬಳಿಕ, ಟೀಮ್ ಇಂಡಿಯಾ ಎರಡನೇ ಟೆಸ್ಟ್‌ನಲ್ಲಿ ಭರ್ಜರಿ ಗೆಲುವು ಸಾಧಿಸಿತು. ಆದರೆ, ಲಾರ್ಡ್ಸ್ ಟೆಸ್ಟ್‌ನಲ್ಲಿ ಅನಿರೀಕ್ಷಿತ ಸೋಲನ್ನು ಅನುಭವಿಸಿದ್ದು, ಈಗ ಗೆಲುವಿನ ಅನಿವಾರ್ಯತೆಗೆ ಸಿಲುಕಿದೆ. ಹೀಗಾಗಿ ಈ ಪಂದ್ಯ ಗಿಲ್​ ನಾಯಕತ್ವದಲ್ಲಿ ಭಾರತ ಗೆಲ್ಲಲೇಬೇಕಿದೆ,(ಏಜೆನ್ಸೀಸ್).

https://www.vijayavani.net/scam-in-nellore-bank-by-fake-employees