110 ಮೀಟರ್​ ಸಿಕ್ಸರ್​! ಸಂಜು ಹೊಡೆತಕ್ಕೆ ರಾಕೆಟ್​ನಂತೆ ಹಾರಿ ಹೋದ ಚೆಂಡು, ಇಲ್ಲಿದೆ ರೋಚಕ ವಿಡಿಯೋ

ನವದೆಹಲಿ: ಟೀಮ್​ ಇಂಡಿಯಾದ ಯುವ ಬ್ಯಾಟ್ಸ್​ಮನ್ ಸಂಜು ಸ್ಯಾಮ್ಸನ್ ಜಿಂಬಾಬ್ವೆ ಬೌಲರ್​ಗಳನ್ನು ಬಗ್ಗು ಬಡಿದರು. ಭಾರೀ ಹೊಡೆತಗಳಿಂದ ಹರಾರೆ ಕ್ರೀಡಾಂಗಣದಲ್ಲಿ ಇಂದು ರನ್​ ಮಳೆಯನ್ನೇ ಹರಿಸಿದರು. ಜಿಂಬಾಬ್ವೆ ವಿರುದ್ಧ ನಡೆದ ಐದನೇ ಟಿ20 ಪಂದ್ಯದಲ್ಲಿ ಕೇವಲ 45 ಎಸೆತಗಳನ್ನು ಎದುರಿಸಿದ ಸಂಜು, 58 ರನ್ ಗಳಿಸಿದರು. ಕೇವಲ 1 ಬೌಂಡರಿ ಬಾರಿಸಿದರೆ, ಬರೋಬ್ಬರಿ 4 ಸಿಕ್ಸರ್ ಸಿಡಿಸಿದರು. ಅದರಲ್ಲಿ ಒಂದು ಚೆಂಡು 110 ಮೀಟರ್ ದೂರದಲ್ಲಿ ಹೋಗಿ ಲ್ಯಾಂಡ್​ ಆಯಿತು.

ಅಕ್ಷರಶಃ, ಸಂಜು ಸ್ಯಾಮ್ಸನ್​ ಹೊಡೆತಕ್ಕೆ ಚೆಂಡು ಕ್ರೀಡಾಂಗಣದಿಂದ ಮಾಯವಾಯಿತು. ಆರಂಭದಲ್ಲಿ ವಿಕೆಟ್ ಪತನವಾಗುತ್ತಿದ್ದಂತೆ ನಿಧಾನವಾಗಿ ಆಡಿದ ಸಂಜು ನಂತರ ವೇಗವಾಗಿ ರನ್ ಗಳಿಸಲು ಯತ್ನಿಸಿದರು. ಆರಂಭದಲ್ಲಿ ಯಾವುದೇ ಹೊಡೆತಕ್ಕೆ ಕೈಹಾಕಲಿಲ್ಲ. ಆರಂಭಿಕರಾಗಿ ಕಣಕ್ಕಿಳಿದ ನಾಯಕ ಶುಭಮನ್​ ಗಿಲ್​ (13) ಮತ್ತು ಯಶಸ್ವಿ ಜೈಸ್ವಾಲ್​ (12) ಕಡಿಮೆ ರನ್​ಗೆ ಔಟಾಗುವ ಮೂಲಕ ಆರಂಭಿಕ ಆಘಾತ ನೀಡಿದರು.

ಒನ್​ ಡೌನ್​ನಲ್ಲಿ ಬಂದ ಅಭಿಷೇಕ್​ ಶರ್ಮ (14) ಹೆಚ್ಚು ಹೊತ್ತು ಕ್ರೀಸ್​ನಲ್ಲಿ ನಿಲ್ಲಲಿಲ್ಲ. ಇದಾದ ಬಳಿಕ ಸಂಜು ಜತೆ ರಿಯಾನ್ ಪರಾಗ್ (22) ಮತ್ತು ಶಿವಂ ದುಬೆ (26) ಕೆಲವೊತ್ತು ಸಾಥ್​ ನೀಡಿದರು. ಕ್ರೀಸ್​ನಲ್ಲಿ ನೆಲೆಯೂರುತ್ತಿದ್ದಂತೆ ಸಂಜು ಸ್ಯಾಮ್ಸನ್​ ಅಬ್ಬರಿಸಿದರು. ಅಂತಿಮವಾಗಿ ಟೀಮ್​ ಇಂಡಿಯಾ 20 ಓವರ್‌ಗಳ ಅಂತ್ಯಕ್ಕೆ 167 ರನ್ ಗಳಿಸಿತು.

ಬಳಿಕ ಟೀಮ್​ ಇಂಡಿಯಾ ನೀಡಿದ 168 ರನ್​ಗಳ ಗುರಿಯನ್ನು ಬೆನ್ನತ್ತಿದ ಜಿಂಬ್ವಾಬೆ 18.3 ಓವರ್​ಗಳಲ್ಲಿ ತನ್ನೆಲ್ಲ ವಿಕೆಟ್​ ಕಳೆದುಕೊಂಡು 125 ರನ್​ ಗಳಿಸುವ ಮೂಲಕ ಸೋಲಿಗೆ ಶರಣಾಯಿತು. ಐದು ಪಂದ್ಯಗಳ ಟಿ20 ಸರಣಿಯಲ್ಲಿ ಟೀಮ್​ ಇಂಡಿಯಾ 4-1ರಿಂದ ಸರಣಿಯನ್ನು ವಶಕ್ಕೆ ಪಡೆದುಕೊಂಡಿತು. (ಏಜೆನ್ಸೀಸ್​)

https://www.vijayavani.net/brian-lara-he-will-rule-the-cricket-like-kohli-that-indian-batsman-is-the-best-lara

https://www.vijayavani.net/doy-you-know-the-salary-of-team-india-players-in-1983