ಲಾರ್ಡ್ಸ್​ನಲ್ಲಿ ಸಚಿನ್​ ಭಾವಚಿತ್ರ ಅನಾವರಣ: ಪಂತ್​ಗೆ ಗಾಯ, ಜುರೆಲ್​ ಕೀಪಿಂಗ್​

ಲಂಡನ್​: ದಿಗ್ಗಜ ಬ್ಯಾಟರ್​ ಸಚಿನ್​ ತೆಂಡುಲ್ಕರ್​ ಗುರುವಾರ 3ನೇ ಟೆಸ್ಟ್​ ಪಂದ್ಯ ಆರಂಭಕ್ಕೆ ಮುನ್ನ ಲಾರ್ಡ್ಸ್​ನಲ್ಲಿರುವ ಎಂಸಿಸಿ ಮ್ಯೂಸಿಯಂನಲ್ಲಿ ತನ್ನದೇ ಭಾವಚಿತ್ರವನ್ನು ಅನಾವರಣಗೊಳಿಸಿದರು. ಸುಮಾರು 18 ವರ್ಷಗಳ ಹಿಂದೆ ತೆಗೆಯಲಾಗಿರುವ ಸಚಿನ್​ ಛಾಯಾಚಿತ್ರವನ್ನು ಆಧರಿಸಿ ಕಲಾವಿದ ಸ್ಟುವರ್ಟ್​ ಪಿಯರ್​ಸನ್​ ರೈಟ್​ ಈ ಭಾವಚಿತ್ರವನ್ನು ರಚಿಸಿದ್ದಾರೆ. ಸದ್ಯ ಎಂಸಿಸಿ ಮ್ಯೂಸಿಯಂನಲ್ಲಿರುವ ಈ ಚಿತ್ರ ಮುಂಬರುವ ದಿನಗಳಲ್ಲಿ ಲಾರ್ಡ್ಸ್​ ಪೆವಿಲಿಯನ್​ಗೆ ಸ್ಥಳಾಂತರಗೊಳ್ಳಲಿದೆ.

"ಇದೊಂದು ದೊಡ್ಡ ಗೌರವ. 1983ರಲ್ಲಿ ಭಾರತ ತಂಡ ವಿಶ್ವಕಪ್​ ಗೆದ್ದಾಗ ನನಗೆ ಮೊದಲ ಬಾರಿಗೆ ಲಾರ್ಡ್ಸ್​ ಮೈದಾನದ ಪರಿಚಯವಾಗಿತ್ತು. ನಮ್ಮ ನಾಯಕ ಕಪಿಲ್​ ದೇವ್​ ಲಾರ್ಡ್ಸ್​ನಲ್ಲಿ ಟ್ರೋಫಿ ಎತ್ತುವುದನ್ನು ನೋಡಿದ್ದೆ. ಅಲ್ಲಿಂದಲೇ ನನ್ನ ಕ್ರಿಕೆಟ್​ ಪ್ರಯಾಣದ ಕಿಡಿ ಹಚ್ಚಿಕೊಂಡಿತ್ತು. ಇದೀಗ ಅಲ್ಲೇ ನನ್ನ ಭಾವಚಿತ್ರ ಅಳವಡಿಸಿರುವುದರೊಂದಿಗೆ ನನ್ನ ಕ್ರಿಕೆಟ್​ ಪ್ರಯಾಣ ಸಂಪೂರ್ಣ ವೃತ್ತವನ್ನು ಸುತ್ತಿದಂತಾಗಿದೆ. ಇದು ನಿಜಕ್ಕೂ ವಿಶೇಷವಾದುದು' ಎಂದು ಸಚಿನ್​ ಹೇಳಿದ್ದಾರೆ.

ಪಂತ್​ಗೆ ಗಾಯ, ಜುರೆಲ್​ ಕೀಪಿಂಗ್​:

ರಿಷಭ್​ ಪಂತ್​ ಲಾರ್ಡ್ಸ್​ ಟೆಸ್ಟ್​ ಪಂದ್ಯದ ಮೊದಲ ದಿನ ಭೋಜನ ವಿರಾಮದ ಬಳಿಕ ವಿಕೆಟ್​ ಕೀಪಿಂಗ್​ ವೇಳೆ ಎಡಗೈ ತೋರು ಬೆರಳಿಗೆ ಗಾಯಮಾಡಿಕೊಂಡರು. ಬುಮ್ರಾ ಎಸೆದ ಇನಿಂಗ್ಸ್​ನ 34ನೇ ಓವರ್​ನಲ್ಲಿ ಚೆಂಡು ಹಿಡಿಯುವ ವೇಳೆ ಗಾಯಗೊಂಡು, ನೋವಿನಿಂದ ಒದ್ದಾಡಿದ ಪಂತ್​ ಕೂಡಲೆ ಫಿಸಿಯೊ ನೆರವು ಪಡೆದರು. ಆ ಓವರ್​ ಮುಗಿದ ನಂತರ ಹೆಚ್ಚಿನ ಚಿಕಿತ್ಸೆಗಾಗಿ ಪಂತ್​ ಮೈದಾನ ತೊರೆದರೆ, ಮೀಸಲು ಆಟಗಾರ ಧ್ರುವ ಜುರೆಲ್​ ಕೀಪಿಂಗ್​ ನಿರ್ವಹಿಸಿದರು.