ಸಿಡ್ನಿ ಟೆಸ್ಟ್​ಗೆ ಮುನ್ನ ನಿವೃತ್ತಿಯ ಬಗ್ಗೆ ರೋಹಿತ್​ ಶರ್ಮ ನೀಡಿದ ಸ್ಪಷ್ಟನೆ ಹೀಗಿದೆ...

ಮೆಲ್ಬೋರ್ನ್​: ನಾಯಕ ರೋಹಿತ್​ ಶರ್ಮ ಬಾಕ್ಸಿಂಗ್​ ಡೇ ಟೆಸ್ಟ್​ 2ನೇ ಇನಿಂಗ್ಸ್​ನಲ್ಲೂ ವಿಲರಾದ ಬಳಿಕ ಅವರ ನಿವೃತ್ತಿಯ ಬಗ್ಗೆ ಮತ್ತೆ ಬಿಸಿಬಿಸಿ ಚರ್ಚೆಗಳು ನಡೆದವು. ಆದರೆ ಪಂದ್ಯದ ನಂತರ ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದ 37 ವರ್ಷದ ರೋಹಿತ್​, ನಿವೃತ್ತಿಯ ಬಗ್ಗೆ ಯೋಚನೆಯನ್ನು ತಳ್ಳಿಹಾಕಿದರು. ನಿವೃತ್ತಿಯ ಪ್ರಶ್ನೆಗೆ ಅವರು ನೇರವಾಗಿ ಉತ್ತರಿಸದಿದ್ದರೂ, ಮೆಲ್ಬೋರ್ನ್​ ಪಂದ್ಯ ತನ್ನ ಕೊನೇ ಟೆಸ್ಟ್​ ಅಲ್ಲವೆಂಬುದನ್ನು ಸ್ಪಷ್ಟಪಡಿಸಿದರು.

ಸರಣಿಯ 6 ಇನಿಂಗ್ಸ್​ಗಳಲ್ಲಿ ಕೇವಲ 31 ರನ್​ ಗಳಿಸಿರುವ ರೋಹಿತ್​, ತನ್ನ ಬ್ಯಾಟಿಂಗ್ ಫಾರ್ಮ್​ನತ್ತ ಹೆಚ್ಚಿನ ಗಮನಹರಿಸಬೇಕಾದ ಅಗತ್ಯವಿದೆ ಎಂಬುದನ್ನು ಒಪ್ಪಿಕೊಂಡರು. ನನಗ ಸಾಧಿಸಬೇಕೆನಿಸಿದ್ದನ್ನು ಸಾಧಿಸಲು ಸಾಧ್ಯವಾಗದ ಬಗ್ಗೆ ಬೇಸರವಿದೆ ಎಂದ ರೋಹಿತ್​, ಸಿಡ್ನಿ ಟೆಸ್ಟ್​ನಲ್ಲಿ ಪುಟಿದೇಳುವ ವಿಶ್ವಾಸವನ್ನೂ ವ್ಯಕ್ತಪಡಿಸಿದರು.

ಸಿಡ್ನಿ ಟೆಸ್ಟ್​ನಲ್ಲಿ ಕೊನೇ ಆಟ?

ರೋಹಿತ್​ ಶರ್ಮ ನಿವೃತ್ತಿ ನಿರಾಕರಿಸಿದರೂ ಮುಂಬರುವ ಸಿಡ್ನಿಯ ಪಂದ್ಯ ಅವರ ಪಾಲಿಗೆ ಕೊನೇ ಟೆಸ್ಟ್​ ಆಗುವ ಸಾಧ್ಯತೆ ಹೆಚ್ಚಿದೆ. ಭಾರತ ತಂಡ ಐಸಿಸಿ ವಿಶ್ವ ಟೆಸ್ಟ್​ ಚಾಂಪಿಯನ್​ಷಿಪ್ ಫೈನಲ್​ಗೆ ಅರ್ಹತೆ ಗಳಿಸದಿದ್ದರೆ ಈ ಸಾಧ್ಯತೆ ಇನ್ನಷ್ಟು ಹೆಚ್ಚಾಗಲಿದೆ. ಯಾಕೆಂದರೆ ಭಾರತ ತಂಡ ಈ ಸರಣಿಯ ನಂತರ ಮುಂದಿನ ಸರಣಿ ಆಡಲಿರುವುದು ಮುಂದಿನ ವರ್ಷ ಜೂನ್​ 20ರಿಂದ. 5 ಪಂದ್ಯಗಳ ಈ ಸರಣಿ ಮುಂದಿನ 2025-27ರ ಸಾಲಿನ ಐಸಿಸಿ ವಿಶ್ವ ಟೆಸ್ಟ್​ ಚಾಂಪಿಯನ್​ಷಿಪ್​ನ ಮೊದಲ ಸವಾಲು ಆಗಿರಲಿದೆ. ಹೀಗಾಗಿ ಭಾರತ ಭವಿಷ್ಯದ ದೃಷ್ಟಿಯಿಂದ ಮುಂದಿನ ಡಬ್ಲ್ಯುಟಿಸಿ ಆವೃತ್ತಿಯಲ್ಲಿ ಹೊಸ-ಯುವ ಆಟಗಾರರಿಗೆ ಅವಕಾಶ ಕಲ್ಪಿಸಲು ಮುಂದಾಗಬಹುದು. ಆದರೆ ಭಾರತ ಡಬ್ಲ್ಯುಟಿಸಿ ಫೈನಲ್​ಗೆ ಅರ್ಹತೆ ಪಡೆದರೆ ರೋಹಿತ್​ಗೆ ಅದರಲ್ಲಿ ಆಡುವ ಅವಕಾಶ ಲಭಿಸಬಹುದು ಎನ್ನಲಾಗಿದೆ. ಒಟ್ಟಾರೆ ಸಿಡ್ನಿ ಟೆಸ್ಟ್​ ಪಂದ್ಯದ ಬಳಿಕ ಆಯ್ಕೆ ಸಮಿತಿ ಅಧ್ಯಕ್ಷ ಅಜಿತ್​ ಅಗರ್ಕರ್​ ಮತ್ತು ಕೋಚ್​ ಗೌತಮ್​ ಗಂಭೀರ್​, ರೋಹಿತ್​ಗೆ ಭವಿಷ್ಯದ ಬಗ್ಗೆ ನಿರ್ಧಾರ ತೆಗೆದುಕೊಳ್ಳಲು ಸೂಚಿಸುವ ನಿರೀಕ್ಷೆ ಇದೆ. ಆದರೆ ಏಕದಿನ ಕ್ರಿಕೆಟ್​ನಲ್ಲಿ ರೋಹಿತ್​ 2025ರ ಚಾಂಪಿಯನ್ಸ್​ ಟ್ರೋಫಿ ಬಳಿಕವೂ ಮುಂದುವರಿಯುವ ನಿರೀಕ್ಷೆ ಇದೆ.

*ವಿರಾಟ್​ ಕೊಹ್ಲಿ ಇನ್ನೂ 3-4 ವರ್ಷಗಳ ಕಾಲ ಕ್ರಿಕೆಟ್​ ಆಡಬಹುದು. ಆದರೆ ರೋಹಿತ್​ ಶರ್ಮ ಭವಿಷ್ಯದ ಬಗ್ಗೆ ಸ್ಪಷ್ಟ ನಿರ್ಧಾರವನ್ನು ತೆಗೆದುಕೊಳ್ಳಬೇಕಾದ ಸಮಯ ಬಂದಿದೆ. ಹಾಲಿ ಸರಣಿಯ ನಂತರದಲ್ಲಿ ಅವರು ನಿರ್ಧಾರವನ್ನು ಸ್ಪಷ್ಟಪಡಿಸಬೇಕಾಗುತ್ತದೆ.

| ರವಿಶಾಸ್ತ್ರಿ

https://www.vijayavani.net/elite-wishes-for-badminton-star-pv-sindhus-marriage-people-from-the-film-industry-sports-field-participated-in-the-reception