ಐಸಿಸಿ ರ್‍ಯಾಂಕಿಂಗ್​ನಲ್ಲಿ ಕುಸಿದ ರೋಹಿತ್​, ಕೊಹ್ಲಿ; ಯಶಸ್ವಿ ಜೈಸ್ವಾಲ್​ ಈಗ ಭಾರತದ ನಂ. 1 ಟೆಸ್ಟ್​ ಬ್ಯಾಟ್ಸ್​ಮನ್​!

ನವದೆಹಲಿ: ಎಡಗೈ ಆರಂಭಿಕ ಯಶಸ್ವಿ ಜೈಸ್ವಾಲ್​ ಐಸಿಸಿ ಟೆಸ್ಟ್​ ಬ್ಯಾಟಿಂಗ್​ ರ್‍ಯಾಂಕಿಂಗ್​ನಲ್ಲಿ 5ನೇ ಸ್ಥಾನಕ್ಕೇರಿದ್ದು, ಟೆಸ್ಟ್​ ಕ್ರಿಕೆಟ್​ನಲ್ಲಿ ಈಗ ಭಾರತದ ಅಗ್ರ ಶ್ರೇಯಾಂಕಿತ ಬ್ಯಾಟರ್​ ಎನಿಸಿದ್ದಾರೆ. ಇದುವರೆಗೆ ರೋಹಿತ್​ ಶರ್ಮ ಈ ಶ್ರೇಯ ಹೊಂದಿದ್ದರು. ಚೆನ್ನೈ ಟೆಸ್ಟ್​ನಲ್ಲಿ ಯಶಸ್ವಿ ಜೈಸ್ವಾಲ್​ ಮೊದಲ ಇನಿಂಗ್ಸ್​ನಲ್ಲಿ ಅರ್ಧಶತಕ ಬಾರಿಸಿ ಮಿಂಚಿದ್ದರು.

ಬಾಂಗ್ಲಾ ವಿರುದ್ಧದ ಮೊದಲ ಟೆಸ್ಟ್​ನಲ್ಲಿ ಎರಡೂ ಇನಿಂಗ್ಸ್​ಗಳಲ್ಲಿ ವೈಫಲ್ಯ ಕಂಡ ನಾಯಕ ರೋಹಿತ್​ ಶರ್ಮ ಮತ್ತು ಸ್ಟಾರ್​ ಬ್ಯಾಟರ್​ ವಿರಾಟ್​ ಕೊಹ್ಲಿ ಬ್ಯಾಟಿಂಗ್ ರ್‍ಯಾಂಕಿಂಗ್​ನಲ್ಲಿ ತಲಾ 5 ಸ್ಥಾನ ಕುಸಿತ ಕಂಡಿದ್ದಾರೆ. ರೋಹಿತ್​ ಶರ್ಮ 5ರಿಂದ 10ನೇ ಸ್ಥಾನಕ್ಕೆ ಕುಸಿದಿದ್ದರೆ, ಕೊಹ್ಲಿ 7ರಿಂದ 12ನೇ ಸ್ಥಾನಕ್ಕಿಳಿದಿದ್ದಾರೆ.

ಶುಭಮಾನ್​ ಗಿಲ್​ 5 ಸ್ಥಾನ ಬಡ್ತಿಯೊಂದಿಗೆ 14ನೇ ಸ್ಥಾನಕ್ಕೇರಿದ್ದಾರೆ. ಇದರಿಂದ ಅಗ್ರ 20ರೊಳಗೆ ಭಾರತದ ಐವರು ಬ್ಯಾಟರ್​ಗಳು ಸ್ಥಾನ ಪಡೆದಂತಾಗಿದೆ. ಇಂಗ್ಲೆಂಡ್​ನ ಜೋ ರೂಟ್​ ನಂ. 1 ಸ್ಥಾನದಲ್ಲಿದ್ದಾರೆ.

https://www.vijayavani.net/the-heat-of-protest-of-hindu-organizations-for-the-bengal-cricket-team-in-kanpur