ಬೆಂಗಳೂರಿನಲ್ಲಿ ರಿಲಯನ್ಸ್ ಫೌಂಡೇಶನ್ ಯೂತ್ ಸ್ಪೋರ್ಟ್ಸ್ ಯಶಸ್ವಿ ಆಯೋಜನೆ

ಬೆಂಗಳೂರು: ರಿಲಯನ್ಸ್ ಫೌಂಡೇಶನ್ ಯೂತ್ ಸ್ಪೋರ್ಟ್ಸ್  (ಆರ್​ಎಫ್​ವೈಎಸ್​)ವತಿಯಿಂದ ಬೆಂಗಳೂರಿನ ಗ್ರೀನ್​ವುಡ್​ ಹೈನಲ್ಲಿ ಆಯೋಜಿಸಲಾಗಿದ್ದ 2023-24ರ ಸಾಲಿನ ಫುಟ್​ಬಾಲ್​ ಟೂರ್ನಿಯ 21 ವಯೋಮಿತಿಯ ಬಾಲಕರ ವಿಭಾಗದಲ್ಲಿ ಸೇಂಟ್ ಜೋಸೆಫ್ ಕಾಲೇಜು (ಆಟೋನೋಮಸ್​) ತಂಡ ಪ್ರಶಸ್ತಿ ಗೆದ್ದುಕೊಂಡಿದೆ. ಸೇಂಟ್​ ಜೋಸೆಫ್​ ಕಾಲೇಜು ತಂಡ ಫೈನಲ್​ನಲ್ಲಿ ಸೇಂಟ್ ಜೋಸೆಫ್ ಕಾಲೇಜ್ ಆಫ್ ಕಾಮರ್ಸ್ ತಂಡವನ್ನು 1-0 ಅಂತರದಿಂದ ಸೋಲಿಸಿತು.

ವಿಜಯದ ನಂತರ ಮಾತನಾಡಿದ ಸೇಂಟ್ ಜೋಸೆಫ್ ಕಾಲೇಜಿನ(ಆಟೋನೋಮಸ್​) ಕೋಚ್ ಲಾರೆನ್ಸ್ ರೋಡ್ರಿಗಸ್, 'ರಿಲಯನ್ಸ್ ಫೌಂಡೇಶನ್ ಯೂತ್ ಸ್ಪೋರ್ಟ್ಸ್ (ಆರ್​ಎಫ್​ವೈಎಸ್​)  ಟೂರ್ನಿಯಲ್ಲಿ ಅದ್ಭುತ ಅನುಭವ ದೊರೆಯಿತು. ನಮ್ಮ ತಂಡಕ್ಕೂ ಇದೊಂದು ಉತ್ತಮ ಅನುಭವ. ನಾವು ಸುಮಾರು 9-10 ಪಂದ್ಯಗಳನ್ನು ಆಡಿದೆವು ಮತ್ತು ನಾವು ಈಗ ಚಾಂಪಿಯನ್ ಆಗಿದ್ದೇವೆ. ಆರ್​ಎಫ್​ವೈಎಸ್​ ನಮಗೆ ಉತ್ತಮ ಅವಕಾಶವನ್ನು ನೀಡಿತು. ಅದರ ಸಿಬ್ಬಂದಿಯೂ ತುಂಬಾ ಸಹಕಾರ ನೀಡಿದರು. ಅವರು ನಮ್ಮ ತಂಡಕ್ಕೆ ಮಾತ್ರವಲ್ಲ, ಎಲ್ಲಾ ತಂಡಗಳಿಗೆ ಉತ್ತಮ ಸಹಕಾರ ನೀಡಿದರು. ಎರಡನೇ ಬಾರಿಗೆ ಈ ಟ್ರೋಫಿ ಗೆದ್ದಿರುವುದಕ್ಕೆ ನನಗೆ ತುಂಬಾ ಸಂತೋಷವಾಗಿದೆ' ಎಂದು ಹೇಳಿದರು.

17 ವಯೋಮಿತಿಯ ಬಾಲಕರ ವಿಭಾಗದಲ್ಲಿ ಸ್ಪೋರ್ಟ್ಸ್​​ ಸ್ಕೂಲ್​ ತಂಡ ಪ್ರಶಸ್ತಿ ಸುತ್ತಿನ ಹೋರಾಟದಲ್ಲಿ ವಿದ್ಯಾನಗರದ ಸರ್ಕಾರಿ ಸ್ಪೋರ್ಟ್ಸ್​​ ಹೈಸ್ಕೂಲ್​ತಂಡವನ್ನು 4-1ರಿಂದ ಸೋಲಿಸಿ ಪ್ರಶಸ್ತಿ ಗೆದ್ದುಕೊಂಡಿತು. ಆದರೆ, 15 ವಯೋಮಿತಿಯ ಬಾಲಕರ ವಿಭಾಗದಲ್ಲಿ ಸರ್ಕಾರಿ ಸ್ಪೋರ್ಟ್ಸ್​​​ ಹೈಸ್ಕೂಲ್​ ತಂಡ ಪ್ರಶಸ್ತಿ ಗೆದ್ದುಕೊಳ್ಳುವಲ್ಲಿ ಯಶಸ್ವಿಯಾಯಿತು. ಫೈನಲ್​ ಪಂದ್ಯ ನಿಗದಿತ ಸಮಯದಲ್ಲಿ ಗೋಲುರಹಿತ ಡ್ರಾಗೊಂಡ ಬಳಿಕ ನಡೆದ ಪೆನಾಲ್ಟಿ ಶೂಟೌಟ್​ನಲ್ಲಿ ಸರ್ಕಾರಿ ಕ್ರೀಡಾ ಹೈಸ್ಕೂಲ್​ ತಂಡ ಗ್ರೀನ್‌ವುಡ್ ಹೈ ಇಂಟರ್‌ನ್ಯಾಶನಲ್ ಸ್ಕೂಲ್ ತಂಡವನ್ನು ಸೋಲಿಸಿತು.

19 ವಯೋಮಿತಿಯ ಬಾಲಕರ ವಿಭಾಗದಲ್ಲಿ ಸೇಂಟ್ ಕ್ಲಾರೆಟ್ ಪಿಯು ಕಾಲೇಜು ತಂಡ ಲೀಗ್​ ಹಂತದ ಪಂದ್ಯದಲ್ಲಿ ಸೇಂಟ್ ಅಲೋಶಿಯಸ್ ಪ್ರಿ ಯೂನಿವರ್ಸಿಟಿ ಕಾಲೇಜಿನ ವಿರುದ್ಧ ಜಯಗಳಿಸುವ ಮೂಲಕ ಅಗ್ರಸ್ಥಾನ ಅಲಂಕರಿಸಿತು. ಇದೇ ರೀತಿ, ಬೆಂಗಳೂರಿನ ಡೆಲ್ಲಿ ಪಬ್ಲಿಕ್ ಸ್ಕೂಲ್ (ಡಿಪಿಎಸ್)ತಂಡ ಸೇಂಟ್ ಕ್ಲಾರೆಟ್ ಪಿಯು ಕಾಲೇಜು ವಿರುದ್ಧ 2-0 ಗೋಲುಗಳ ಅಂತರದಿಂದ ಜಯಗಳಿಸಿ ಇದೇ ವಯೋಮಿತಿ ವಿಭಾಗದಲ್ಲಿ ತನ್ನ ಗುಂಪಿನಲ್ಲಿ ಅಗ್ರಸ್ಥಾನಕ್ಕೇರಿತು.

15 ವಯೋಮಿತಿ ಬಾಲಕಿಯರ ವಿಭಾಗದಲ್ಲಿ ಲೇಕ್ ಮಾಂಟ್‌ಫೋರ್ಟ್ ತಂಡವೂ 2023-24ರ ಆರ್​ಎಫ್​ವೈಎಸ್​ ಚಾಂಪಿಯನ್​ಷಿಪ್​ನ ಬೆಂಗಳೂರು ಚರಣದಲ್ಲಿ ಪ್ರಶಸ್ತಿ ತನ್ನದಾಗಿಸಿಕೊಂಡಿತು. ಲೇಕ್​ ಮಾಂಟ್​ಫೋರ್ಟ್​ ತಂಡ ಫೈನಲ್​ನಲ್ಲಿ ಕುಂದಹಳ್ಳಿಯ ರಿಯಾನ್ ಇಂಟರ್‌ನ್ಯಾಶನಲ್ ಸ್ಕೂಲ್ ವಿರುದ್ಧ 3-0 ಅಂತರದಿಂದ ಗೆಲುವು ಸಾಧಿಸಿತು.

https://www.vijayavani.net/karnataka-mens-squad-for-indusind-bank-nagesh-trophy-mens-national-t20-cricket