ತವರಿನಲ್ಲೂ ಗೆಲ್ಲುವ ಹಂಬಲದಲ್ಲಿ ಆರ್​ಸಿಬಿ; ಇಂದು ಪಂಜಾಬ್​ ಕಿಂಗ್ಸ್​ ಸವಾಲು

ವಿಜಯವಾಣಿ ಸುದ್ದಿಜಾಲ ಬೆಂಗಳೂರು

ತವರಿನಾಚೆ ಆಡಿದ 4 ಪಂದ್ಯಗಳಲ್ಲೂ ಗೆದ್ದಿದ್ದರೂ, ಚಿನ್ನಸ್ವಾಮಿ ಸ್ಟೇಡಿಯಂನಲ್ಲಿ ಆಡಿದ ಮೊದಲ ಎರಡೂ ಪಂದ್ಯಗಳಲ್ಲಿ ಸೋತಿರುವ ರಾಯಲ್​ ಚಾಲೆಂಜರ್ಸ್​ ಬೆಂಗಳೂರು ತಂಡ ಇದೀಗ ತನ್ನ ಮನೆಯಂಗಳದಲ್ಲೂ ಗೆಲುವು ಸಾಧಿಸುವ ಹಂಬಲದಲ್ಲಿದೆ. ಐಪಿಎಲ್​ 18ನೇ ಆವೃತ್ತಿಯಲ್ಲಿ ಶುಕ್ರವಾರ ನಡೆಯಲಿರುವ ಪಂದ್ಯದಲ್ಲಿ ಆರ್​ಸಿಬಿಗೆ ಪಂಜಾಬ್​ ಕಿಂಗ್ಸ್​ ತಂಡದ ಸವಾಲು ಎದುರಾಗಲಿದೆ. ರಜತ್​ ಪಾಟೀದಾರ್​ ಪಡೆ ಟೂರ್ನಿಯ 5ನೇ ಜಯದೊಂದಿಗೆ ಪ್ಲೇಆಫ್​​ ಅವಕಾಶ ವೃದ್ಧಿಸಿಕೊಳ್ಳುವ ತವಕದಲ್ಲಿದೆ.

ಆರ್​ಸಿಬಿ ತಂಡ ತವರಿನಲ್ಲಿ ಆಡಿದ ಮೊದಲೆರಡೂ ಪಂದ್ಯಗಳಲ್ಲಿ ಟಾಸ್​ ಸೋತು ಮೊದಲು ಬ್ಯಾಟಿಂಗ್​ಗೆ ಇಳಿದಿತ್ತು ಮತ್ತು ಬ್ಯಾಟಿಂಗ್​ ವಿಭಾಗದ ಕುಸಿತದಿಂದಾಗಿ ಸ್ಪರ್ಧಾತ್ಮಕ ಮೊತ್ತಕ್ಕೆ ತೃಪ್ತಿಪಟ್ಟಿತ್ತು. ಈ ಬಾರಿ ಆರ್​ಸಿಬಿ ತವರಿನಲ್ಲೂ ತನ್ನ ಬ್ಯಾಟಿಂಗ್​ ನಿರ್ವಹಣೆ ಸುಧಾರಿಸಿಕೊಳ್ಳಬೇಕಾದ ಅಗತ್ಯವಿದೆ. ಟಾಸ್​ ಗೆದ್ದ ತಂಡಕ್ಕೆ ಅನುಕೂಲ ಮಾಡಿಕೊಡುವ ಚಿನ್ನಸ್ವಾಮಿ ಪಿಚ್​ನಲ್ಲಿ ಆರ್​ಸಿಬಿ ಸರ್ವಾಂಗೀಣ ನಿರ್ವಹಣೆ ತೋರುವುದು ಅಗತ್ಯವೆನಿಸಿದೆ.

ಸನ್​ರೈಸರ್ಸ್​ ಎದುರು 245 ರನ್​ ರಕ್ಷಿಸಿಕೊಳ್ಳಲಾಗದೆ ಸೋತಿದ್ದ ಪಂಜಾಬ್​ ಕಳೆದ ಪಂದ್ಯದಲ್ಲಿ 111 ರನ್​ ರಕ್ಷಿಸಿಕೊಂಡು ಗೆದ್ದಿತ್ತು. ಹೀಗಾಗಿ ಈಡನ್​, ಚೆಪಾಕ್​, ವಾಂಖೆಡೆ, ಜೈಪುರದಲ್ಲಿ ತೋರಿದ ಬಲಿಷ್ಠ ನಿರ್ವಹಣೆಯನ್ನೇ ಆರ್​ಸಿಬಿ ತವರಿನಲ್ಲೂ ಪುನರಾವರ್ತಿಸಿದರೆ, ತವರಿನಲ್ಲೂ ಗೆಲುವಿನ ಖಾತೆ ತೆರೆಯಬಹುದಾಗಿದೆ.

ಆರ್​ಸಿಬಿ, ಪಂಜಾಬ್​ ತಂಡಗಳು ಇದುವರೆಗೆ ಆಡಿದ 6 ಪಂದ್ಯಗಳಲ್ಲಿ ತಲಾ 4 ಜಯ, 2 ಸೋಲಿನೊಂದಿಗೆ 8 ಅಂಕ ಕಲೆಹಾಕಿವೆ. ರನ್​ರೇಟ್​ ಲೆಕ್ಕಾಚಾರದಲ್ಲಿ ಆರ್​ಸಿಬಿ ತುಸು ಮೇಲಿದೆ. ಈ ಪಂದ್ಯದಲ್ಲಿ ಗೆದ್ದ ತಂಡಕ್ಕೆ ಅಂಕಪಟ್ಟಿಯಲ್ಲಿ ಅಗ್ರಸ್ಥಾನಕ್ಕೇರುವ ಅವಕಾಶವೂ ಒಲಿಯಬಹುದು. ಐಪಿಎಲ್​ ಪ್ರಶಸ್ತಿ ವಿಜೇತ ನಾಯಕ ಶ್ರೇಯಸ್​ ಅಯ್ಯರ್​ ಎದುರು ರಜತ್​ ಪಾಟೀದಾರ್​ ಅನನುಭವಿ ನಾಯಕತ್ವಕ್ಕು ಸತ್ವ ಪರೀಕ್ಷೆ ಎದುರಾಗಲಿದೆ.

ರನ್​ಮಳೆ ನಿರೀಕ್ಷೆ

ವಿರಾಟ್​ ಕೊಹ್ಲಿ, ಫಿಲ್​ ಸಾಲ್ಟ್​, ರಜತ್​ ಪಾಟೀದಾರ್​, ಜಿತೇಶ್​ ಶರ್ಮ, ಟಿಮ್​ ಡೇವಿಡ್​ರಂಥ ಬ್ಯಾಟರ್​ಗಳಿಂದ ಕೂಡಿರುವ ಆರ್​ಸಿಬಿ ತಂಡಕ್ಕೆ ಎದುರಾಳಿ ತಂಡದ ಬ್ಯಾಟರ್​ಗಳಿಂದಲೂ ನಿಕಟ ಪ್ರತಿಸ್ಪರ್ಧೆ ಎದುರಾಗುವ ನಿರೀೆ ಇದೆ. ಪ್ರಿಯಾಂಶ್​ ಆರ್ಯ, ಪ್ರಭ್​ಸಿಮ್ರನ್​, ಶ್ರೇಯಸ್​ ಅಯ್ಯರ್​, ನೇಹಲ್​ ವಧೇರ, ಶಶಾಂಕ್​ ಸಿಂಗ್​, ಮ್ಯಾಕ್ಸ್​ವೆಲ್​, ಸ್ಟೋಯಿನಿಸ್​ರಂಥ ಬ್ಯಾಟರ್​ಗಳು ಪಂಜಾಬ್​ ತಂಡದಲ್ಲಿದ್ದಾರೆ. ವೇಗದ ಬೌಲಿಂಗ್​ ವಿಭಾಗದಲ್ಲೂ ಉಭಯ ತಂಡಗಳು ಸಮಬಲ ಹೊಂದಿದ್ದು, ಆರ್​ಸಿಬಿಗೆ ಭುವನೇಶ್ವರ್​, ಹ್ಯಾಸಲ್​ವುಡ್​, ಯಶ್​ ದಯಾಳ್​ ಬಲ ತುಂಬಿದ್ದರೆ, ಪಂಜಾಬ್​ಗೆ ಅರ್ಷದೀಪ್​, ಮಾಕೋ ಜಾನ್ಸೆನ್​ ಪ್ರಮುಖ ಅಸ್ತ್ರವೆನಿಸಿದ್ದಾರೆ. ಕರ್ನಾಟಕದ ವೇಗಿ ವೈಶಾಕ್​ ವಿಜಯ್​ಕುಮಾರ್​ ಕೂಡ ಪಂಜಾಬ್​ ತಂಡದಲ್ಲಿದ್ದು, ತವರಿನ ಅಂಗಣದಲ್ಲಿ ಅವಕಾಶದ ನಿರೀಕ್ಷೆಯಲ್ಲಿದ್ದಾರೆ.

ಚಾಹಲ್​ ಸ್ಪಿನ್​ ಸವಾಲು

ಕಳೆದ ಮೆಗಾ ಹರಾಜಿನಲ್ಲಿ 18 ಕೋಟಿ ರೂ.ಗೆ ಪಂಜಾಬ್​ ಕಿಂಗ್ಸ್​ ತಂಡ ಸೇರಿದ್ದ ಸ್ಪಿನ್ನರ್​ ಯಜುವೇಂದ್ರ ಚಾಹಲ್​, ಆಡಿದ ಮೊದಲ 5 ಪಂದ್ಯಗಳಲ್ಲಿ ಎರಡೇ ವಿಕೆಟ್​ ಕಬಳಿಸಿದ್ದರು. ಆದರೆ ಕಳೆದ ಪಂದ್ಯದಲ್ಲಿ ಕೆಕೆಆರ್​ ಎದುರು 4 ವಿಕೆಟ್​ ಕಬಳಿಸುವ ಮೂಲಕ ಪಂಜಾಬ್​ ತಂಡದ ಅಚ್ಚರಿಯ ಗೆಲುವಿನ ರೂವಾರಿ ಎನಿಸಿದ್ದರು. ಚಾಹಲ್​ ಲಯಕ್ಕೆ ಮರಳಿರುವುದು ಈಗ ಆರ್​ಸಿಬಿ ಬ್ಯಾಟರ್​ಗಳಿಗೆ ಹೆಚ್ಚಿನ ಸವಾಲು ಒಡ್ಡಲಿದೆ. ಆರ್​ಸಿಬಿ ತಂಡದ ಬ್ಯಾಟರ್​ಗಳು ತವರಿನ ಕಳೆದೆರಡು ಪಂದ್ಯಗಳಲ್ಲಿ ಸಾಯಿ ಕಿಶೋರ್​ (22ಕ್ಕೆ 2), ಕುಲದೀಪ್​ (17ಕ್ಕೆ 2) ಮತ್ತು ವಿಪ್ರಜ್​ ನಿಗಮ್​ (18ಕ್ಕೆ 2) ಎದುರು ಪರದಾಡಿದ್ದರು. ಹೀಗಾಗಿ, ಈ ಹಿಂದೆ ಆರ್​ಸಿಬಿ ತಂಡದ ಪರವೇ ಆಡಿ, ಅದರ ಪರ ಸರ್ವಾಧಿಕ 139 ವಿಕೆಟ್​ ಕಬಳಿಸಿದ ದಾಖಲೆಯನ್ನೂ ಹೊಂದಿರುವ ಚಾಹಲ್​, ಚಿನ್ನಸ್ವಾಮಿ ಸ್ಟೇಡಿಯಂ ಪಿಚ್​ನಲ್ಲಿ ಹೆಚ್ಚಿನ ಪಂದ್ಯ ಆಡಿದ ಅನುಭವವನ್ನೂ ಹೊಂದಿದ್ದಾರೆ. ಇದರಿಂದ ಆರ್​ಸಿಬಿ ಬ್ಯಾಟರ್​ಗಳು ಚಾಹಲ್​ ದಾಳಿಯನ್ನು ಎಚ್ಚರಿಕೆಯಿಂದ ಎದುರಿಸಬೇಕಾಗುತ್ತದೆ.

3 ದಿನಗಳ ಅಂತರದಲ್ಲಿ 2 ಬಾರಿ ಮುಖಾಮುಖಿ!

ಆರ್​ಸಿಬಿ&ಪಂಜಾಬ್​ ಕಿಂಗ್ಸ್​ ತಂಡಗಳು ಈ ಬಾರಿ ಕೇವಲ 3 ದಿನಗಳ ಅಂತರದಲ್ಲಿ 2 ಬಾರಿ ಎದುರಾಗಲಿವೆ. ಶುಕ್ರವಾರ ಬೆಂಗಳೂರಿನಲ್ಲಿ ಆಡಿದ ಬೆನ್ನಲ್ಲೇ ಉಭಯ ತಂಡಗಳು ಸುಮಾರು 2 ಸಾವಿರ ಕಿಲೋಮೀಟರ್​ ದೂರದ ಚಂಡೀಗಢಕ್ಕೆ 3 ಗಂಟೆಗೂ ಅಧಿಕ ಸಮಯದ ವಿಮಾನ ಪ್ರಯಾಣ ಮಾಡಿ ತೆರಳಲಿದ್ದು, ಭಾನುವಾರ ಮಧ್ಯಾಹ್ನ 3.30ರಿಂದ ಮುಲ್ಲನ್​ಪುರದಲ್ಲಿ ಮತ್ತೆ ಪಂದ್ಯ ಆಡಲಿವೆ. ಅಂದರೆ 32 ಗಂಟೆಗಳ ಅಂತರದಲ್ಲೇ ಉಭಯ ತಂಡಗಳು 2 ಬಾರಿ ಕಾದಾಡಲಿವೆ. ಈ ಸಂದಿಗ್ಧ ವೇಳಾಪಟ್ಟಿಗೆ ಕ್ರಿಕೆಟ್​ ಪ್ರೇಮಿಗಳು, "ಐಪಿಎಲ್​ ನಡುವೆ ಬಿಸಿಸಿಐ, ಆರ್​ಸಿಬಿ-ಪಂಜಾಬ್​ ನಡುವೆ 2 ಪಂದ್ಯಗಳ ಸರಣಿ ಆಯೋಜಿಸಿದೆ' ಎಂದು ಕಾಲೆಳೆದಿದ್ದಾರೆ.

ಮಳೆ ಭೀತಿ

ಉದ್ಯಾನನಗರಿಯಲ್ಲಿ ಮಂಗಳವಾರ-ಬುಧವಾರ ಸಂಜೆ ಮಳೆಯಾಗಿದ್ದು, ಇನ್ನೂ ಕೆಲ ದಿನ ಮೋಡಕವಿದ ವಾತಾವರಣ ಮುಂದುವರಿಯಲಿದೆ. ಶುಕ್ರವಾರವೂ ಸಣ್ಣ ಮಳೆ ಸುರಿಯುವ ಭೀತಿ ಇದೆ. ಹೀಗಾಗಿ ಪಂದ್ಯಕ್ಕೆ ಮಳೆ ಅಡಚಣೆ ಎದುರಾದರೆ ಅಚ್ಚರಿ ಇಲ್ಲ. ಆದರೆ ಸಬ್​ಏರ್​ ಸಿಸ್ಟಮ್​ನಂಥ ಮಳೆ ನೀರು ಇಂಗಿಸುವ ವ್ಯವಸ್ಥೆ ಹೊಂದಿರುವ ಚಿನ್ನಸ್ವಾಮಿ ಸ್ಟೇಡಿಯಂನಲ್ಲಿ ಮಳೆಯಿಂದಾಗಿ ಪಂದ್ಯ ಸಂಪೂರ್ಣ ರದ್ದಾಗುವ ಸಾಧ್ಯತೆ ಇಲ್ಲ.

*ಮುಖಾಮುಖಿ: 33

ಆರ್​ಸಿಬಿ: 16

ಪಂಜಾಬ್​: 17

ಆರಂಭ: ರಾತ್ರಿ 7.30

ನೇರಪ್ರಸಾರ: ಸ್ಟಾರ್​ ಸ್ಪೋರ್ಟ್ಸ್​, ಜಿಯೋ ಹಾಟ್​ಸ್ಟಾರ್​.

*15: ರಜತ್​ ಪಾಟೀದಾರ್​ ಇನ್ನು 15 ರನ್​ ಗಳಿಸಿದರೆ ಆರ್​ಸಿಬಿ ಪರ ಸಾವಿರ ರನ್​ ಗಳಿಸಿದ 3ನೇ ಭಾರತೀಯರೆನಿಸಲಿದ್ದಾರೆ. ಕೊಹ್ಲಿ, ಪಡಿಕ್ಕಲ್​ ಮೊದಲಿಬ್ಬರು.

*1: ಅರ್ಷದೀಪ್​ ಸಿಂಗ್​ ಇನ್ನು 1 ವಿಕೆಟ್​ ಕಬಳಿಸಿದರೆ ಪಂಜಾಬ್​ ಕಿಂಗ್ಸ್​ ಪರ ಸರ್ವಾಧಿಕ ವಿಕೆಟ್​ ಪಡೆದ ಬೌಲರ್​ ಎನಿಸಲಿದ್ದಾರೆ. ಸದ್ಯ ಪೀಯುಷ್​ ಚಾವ್ಲಾ (84) ಜತೆ ಸಮಬಲದಲ್ಲಿದ್ದಾರೆ..

https://www.vijayavani.net/tri-series-bilateral-series-between-ipl-bcci-pulls-up-cricket-fans