ಅಹಮದಾಬಾದ್: ಸತತ 4 ಜಯ ದಾಖಲಿಸಿದ ಬಳಿಕ ಕಡೇ ಮೂರು ಹಣಾಹಣಿಯಲ್ಲಿ 2ರಲ್ಲಿ ಸೋತಿರುವ ಆರ್ಸಿಬಿ ತಂಡ ಪ್ರಸಕ್ತ ಲೀಗ್ನ ಎರಡನೇ ಸುತ್ತಿನ ಹೋರಾಟಕ್ಕೆ ಸಜ್ಜಾಗಿದೆ. ನರೇಂದ್ರ ಮೋದಿ ಸ್ಟೇಡಿಯಂನಲ್ಲಿ ಸೋಮವಾರ ನಡೆಯಲಿರುವ ಐಪಿಎಲ್-14ರ ತನ್ನ 8ನೇ ಪಂದ್ಯದಲ್ಲಿ ವಿರಾಟ್ ಕೊಹ್ಲಿ ಬಳಗ ಗೆಲುವಿಗಾಗಿ ಪರಿತಪಿಸುತ್ತಿರುವ ಕೆಕೆಆರ್ ತಂಡವನ್ನು ಎದುರಿಸಲಿದೆ. ಬ್ಯಾಟಿಂಗ್ ವಿಭಾಗ ಬಲಿಷ್ಠವಾಗಿದ್ದರೂ ಕಡೇ ಮೂರು ಪಂದ್ಯಗಳಲ್ಲಿ ಹಳಿತಪ್ಪಿರುವ ಆರ್ಸಿಬಿ ತಂಡ ಗೆಲುವಿನ ಲಯಕ್ಕೆ ಮರಳುವ ವಿಶ್ವಾಸದಲ್ಲಿದೆ. ವಿರಾಟ್ ಕೊಹ್ಲಿ, ಎಬಿ ಡಿವಿಲಿಯರ್ಸ್, ಗ್ಲೆನ್ ಮ್ಯಾಕ್ಸ್ವೆಲ್ ಒಳಗೊಂಡ ಬ್ಯಾಟಿಂಗ್ ಪಡೆ ಹೊಂದಿರುವ ಆರ್ಸಿಬಿ ಕೆಕೆಆರ್ ಎದುರು ಮತ್ತೊಂದು ಗೆಲುವಿನ ವಿಶ್ವಾಸದಲ್ಲಿದೆ. ಮತ್ತೊಂದೆಡೆ, ಮೊದಲ ಹಣಾಹಣಿಯಲ್ಲಿ ಆರ್ಸಿಬಿ ಎದುರು ಸೋಲನುಭವಿಸಿರುವ ಕೆಕೆಆರ್ ಸೇಡು ತೀರಿಸಿಕೊಳ್ಳುವ ತವಕದಲ್ಲಿದೆ.
* ಆರ್ಸಿಬಿಗೆ ಕಾಡುತ್ತಿರುವ ಅಸ್ಥಿರ ನಿರ್ವಹಣೆ
ಸತತ ಗೆಲುವಿನ ನಾಗಾಲೋಟದ ಬಳಿಕ ಕಳೆದ ಮೂರು ಪಂದ್ಯಗಳಲ್ಲೂ ಆರ್ಸಿಬಿ ಏರಿಳಿತ ಕಂಡಿದೆ. ಅದರಲ್ಲೂ ಡೆಲ್ಲಿ ಕ್ಯಾಪಿಟಲ್ಸ್ ಎದುರು ಕೇವಲ 1 ರನ್ನಿಂದ ಜಯ ದಾಖಲಿಸಿದ್ದ ಆರ್ಸಿಬಿ, ಉಳಿದ ಎರಡು ಪಂದ್ಯಗಳಲ್ಲಿ ಎದುರಾಳಿ ತಂಡಕ್ಕೆ ಸುಲಭವಾಗಿ ಶರಣಾಗಿತ್ತು. ಆರಂಭಿಕ ಬ್ಯಾಟ್ಸ್ಮನ್ ದೇವದತ್ ಪಡಿಕಲ್ ರಾಜಸ್ಥಾನ ರಾಯಲ್ಸ್ ಎದುರು ಅಜೇಯ ಶತಕ ಸಿಡಿಸಿದ ಬಳಿಕ ಸತತ ಮೂರು ಪಂದ್ಯಗಳಲ್ಲೂ ವಿಫಲರಾಗಿದ್ದಾರೆ. ಹಿಂದಿನ ಪಂದ್ಯದಲ್ಲಿ ಪಂಜಾಬ್ ಎದುರು ಪ್ರಮುಖ ಬ್ಯಾಟ್ಸ್ಮನ್ಗಳ ವೈಫಲ್ಯದಿಂದಾಗಿ ಆರ್ಸಿಬಿ ಹೀನಾಯವಾಗಿ ಶರಣಾಗಿತ್ತು. ಪಡಿಕಲ್, ವಿರಾಟ್ ಕೊಹ್ಲಿ, ಎಬಿ ಡಿವಿಲಿಯರ್ಸ್ ಹಾಗೂ ಗ್ಲೆನ್ ಮ್ಯಾಕ್ಸ್ವೆಲ್ ಒಳಗೊಂಡ ಬ್ಯಾಟಿಂಗ್ ಸ್ಫೋಟಿಸಬೇಕಿದೆ. ಆದರೆ, ಬೌಲರ್ಗಳು ದುಬಾರಿಯಾಗುತ್ತಿರುವುದು ತಂಡದ ಪಾಲಿಗೆ ನುಂಗಲಾರದ ತುತ್ತಾಗಿದೆ. ಆರ್ಸಿಬಿ ಲೀಗ್ನಲ್ಲಿ ಇದುವರೆಗೂ ಆಡಿರುವ 7 ಪಂದ್ಯಗಳಲ್ಲಿ 5 ಗೆಲುವು, 2ರಲ್ಲಿ ಸೋಲನುಭವಿಸಿದೆ.
