ರಣಜಿ ಟ್ರೋಫಿ: ಸ್ಮರಣ್​ ದ್ವಿಶತಕ, ಇನಿಂಗ್ಸ್​ ಜಯದತ್ತ ಕರ್ನಾಟಕ; 2ನೇ ಸರದಿಯಲ್ಲೂ ಪಂಜಾಬ್​ ಪರದಾಟ

ವಿಜಯವಾಣಿ ಸುದ್ದಿಜಾಲ ಬೆಂಗಳೂರು

ಯುವ ಎಡಗೈ ಬ್ಯಾಟರ್​ ಆರ್​. ಸ್ಮರಣ್​ (203 ರನ್​, 277 ಎಸೆತ, 25 ಬೌಂಡರಿ, 3 ಸಿಕ್ಸರ್​) ದ್ವಿಶತಕದಾಟದಿಂದ ಕರ್ನಾಟಕ ತಂಡ ರಣಜಿ ಟ್ರೋಫಿ 2ನೇ ಚರಣದಲ್ಲಿ ಪ್ರವಾಸಿ ಪಂಜಾಬ್​ ಎದುರು ಬೃಹತ್​ ಮುನ್ನಡೆ ಸಾಧಿಸಿದ್ದು, ಇನಿಂಗ್ಸ್​ ಗೆಲುವಿನತ್ತ ಕಣ್ಣಿಟ್ಟಿದೆ. ಬೋನಸ್​ ಅಂಕ ಸಂಪಾದಿಸುವಲ್ಲಿ ಯಶಸ್ವಿಯಾದರೆ ಮಯಾಂಕ್​ ಅಗರ್ವಾಲ್​ ಪಡೆ ಸಿ ಗುಂಪಿನಿಂದ ನಾಕೌಟ್​ ಹಂತಕ್ಕೇರುವ ಅವಕಾಶ ವೃದ್ಧಿಸಿಕೊಳ್ಳಲಿದೆ.

ಎಂ. ಚಿನ್ನಸ್ವಾಮಿ ಸ್ಟೇಡಿಯಂನಲ್ಲಿ ನಡೆಯುತ್ತಿರುವ ತನ್ನ 6ನೇ ಲೀಗ್​ ಪಂದ್ಯದಲ್ಲಿ ಶುಕ್ರವಾರ 4 ವಿಕೆಟ್​ಗೆ 199 ರನ್​ಗಳಿಂದ ಆಟ ಮುಂದುವರಿಸಿದ ಕರ್ನಾಟಕ 122.1 ಓವರ್​ಗಳಲ್ಲಿ 475 ರನ್​ಗಳಿಗೆ ಆಲೌಟ್​ ಆಯಿತು. 420 ರನ್​ ಹಿನ್ನಡೆಯೊಂದಿಗೆ 2ನೇ ಇನಿಂಗ್ಸ್​ ಆರಂಭಿಸಿದ ಪಂಜಾಬ್​ ದಿನದಂತ್ಯಕ್ಕೆ 13 ಓವರ್​ಗಳಲ್ಲಿ 2 ವಿಕೆಟ್​ಗೆ 24 ರನ್​ ಗಳಿಸಿ ಸಂಕಷ್ಟದಲ್ಲಿದೆ. ನಾಯಕ ಶುಭಮಾನ್​ ಗಿಲ್​ (7*) ಜತೆಗೆ ಖಾತೆ ತೆರೆಯದ ನೈಟ್​ ವಾಚ್​ಮನ್​ ಜಸ್ಸಿಂದರ್​ ಸಿಂಗ್​ ಕ್ರೀಸ್​ನಲ್ಲಿದ್ದಾರೆ. ಪಂಜಾಬ್​ ಇನಿಂಗ್ಸ್​ ಸೋಲು ತಪ್ಪಿಸಿಕೊಳ್ಳಲು ಇನ್ನೂ 396 ರನ್​ ಗಳಿಸಬೇಕಾಗಿದೆ. ಕರ್ನಾಟಕ 3ನೇ ದಿನ ಬೇಗನೆ 8 ವಿಕೆಟ್​ ಕಬಳಿಸುವಲ್ಲಿ ಯಶಸ್ವಿಯಾದರೆ, ಬೋನಸ್​ ಸಹಿತ 7 ಅಂಕಗಳನ್ನು ಸಂಪಾದಿಸಿ ಅಂಕಪಟ್ಟಿಯಲ್ಲಿ ಮೇಲಕ್ಕೇರುವ ಅವಕಾಶ ಹೊಂದಿದೆ.

*3: ಆರ್​. ಸ್ಮರಣ್​ (21 ವರ್ಷ 263 ದಿನ) ಕರ್ನಾಟಕದ 3ನೇ ಅತಿಕಿರಿಯ ದ್ವಿಶತಕ ವೀರ ಎನಿಸಿದರು. ಜಿಆರ್​ ವಿಶ್ವನಾಥ್​ (18 ವರ್ಷ, 272 ದಿನ, 1967) ಮತ್ತು ರಾಹುಲ್​ ದ್ರಾವಿಡ್​ (19 ವರ್ಷ, 321 ದಿನ, 1992) ಮೊದಲಿಬ್ಬರು ಸಾಧಕರು.

ಸ್ಮರಣೀಯ ದ್ವಿಶತಕ

ಬೆಳಗ್ಗೆ 83 ರನ್​ಗಳಿಂದ ಬ್ಯಾಟಿಂಗ್​ ಮುಂದುವರಿಸಿದ 21 ವರ್ಷದ ರವಿಚಂದ್ರನ್​ ಸ್ಮರಣ್​ 119 ಎಸೆತಗಳಲ್ಲೇ ಶತಕ ಪೂರೈಸಿದರು. ನಂತರ ತನ್ನ ಚೊಚ್ಚಲ ಪ್ರಥಮ ದರ್ಜೆ ಶತಕವನ್ನು ದ್ವಿಶತಕವಾಗಿ ಪರಿವರ್ತಿಸುವಲ್ಲೂ ಯಶಸ್ವಿಯಾದರು. 205 ಎಸೆತಗಳಲ್ಲಿ 150 ರನ್​ ಗಳಿಸಿದ ಸ್ಮರಣ್​, 270 ಎಸೆತಗಳಲ್ಲಿ ದ್ವಿಶತಕ ಪೂರೈಸಿದರು. ಕಳೆದ ಶನಿವಾರವಷ್ಟೇ ಅವರು ವಿಜಯ್​ ಹಜಾರೆ ಟ್ರೋಫಿ ಫೈನಲ್​ನಲ್ಲೂ ಶತಕ ಸಿಡಿಸಿದ್ದರು. 5ನೇ ವಿಕೆಟ್​ಗೆ ಅಭಿನವ್​ ಮನೋಹರ್​ (34) ಜತೆಗೆ 86 ರನ್​, 6ನೇ ವಿಕೆಟ್​ಗೆ ಶ್ರೇಯಸ್​ ಗೋಪಾಲ್​ (31) ಜತೆಗೆ 75 ರನ್​, 7ನೇ ವಿಕೆಟ್​ಗೆ ಯಶೋವರ್ಧನ್​ ಪರಂತಾಪ್​ (26) ಜತೆಗೆ 67 ರನ್​ ಸ್ಮರಣ್​ ರಾಜ್ಯಕ್ಕೆ ಭಾರಿ ಮುನ್ನಡೆ ತಂದುಕೊಟ್ಟರು. ಅಂತಿಮವಾಗಿ ಆ್​ಸ್ಪಿನ್ನರ್​ ಜಸ್ಸಿಂದರ್​ ಸಿಂಗ್​ ಎಸೆತದಲ್ಲಿ ಸ್ಮರಣ್​ ಬೌಲ್ಡ್​ ಆದರು. ಕೊನೆಯಲ್ಲಿ ಪ್ರಸಿದ್ಧ ಕೃಷ್ಣ (30) ಬಿರುಸಿನ ಆಟವಾಡಿ ಮುನ್ನಡೆಯನ್ನು 400ರ ಗಡಿ ದಾಟಿಸಿದರು.

ಪಂಜಾಬ್​ 2ನೇ ಸರದಿಗೂ ಶಾಕ್​

ಭಾರಿ ಹಿನ್ನಡೆಯೊಂದಿಗೆ ದಿನದಂತ್ಯದಲ್ಲಿ 2ನೇ ಇನಿಂಗ್ಸ್​ ಆರಂಭಿಸಿದ ಪಂಜಾಬ್​ಗೆ ಆರಂಭಿಕ ಆಘಾತ ನೀಡುವಲ್ಲಿ ಕರ್ನಾಟಕ ಯಶಸ್ವಿಯಾಯಿತು. ಎಡಗೈ ವೇಗಿ ಅಭಿಲಾಷ್​ ಶೆಟ್ಟಿ, ಆರಂಭಿಕ ಪ್ರಭ್​ಸಿಮ್ರನ್​ ಸಿಂಗ್​ರನ್ನು (1) ಇನಿಂಗ್ಸ್​ನ 2ನೇ ಓವರ್​ನಲ್ಲೇ ಔಟ್​ ಮಾಡಿದರು. ನಂತರ ದಿನದ ಕೊನೇ ಓವರ್​ಗೆ ಮುನ್ನ ವನ್​ಡೌನ್​ ಬ್ಯಾಟರ್​ ಅನ್ಮೋಲ್​ಪ್ರೀತ್​ ಸಿಂಗ್​ (14) ಪ್ರಸಿದ್ಧ ಕೃಷ್ಣಗೆ ವಿಕೆಟ್​ ಒಪ್ಪಿಸಿದರು.

ಪಂಜಾಬ್​: 55 ಮತ್ತು13 ಓವರ್​ಗಳಲ್ಲಿ 2 ವಿಕೆಟ್​ಗೆ 24 (ಪ್ರಭ್​ಸಿಮ್ರನ್​ 1, ಗಿಲ್​ 7*, ಅನ್ಮೋಲ್​ಪ್ರೀತ್​ 14, ಅಭಿಲಾಷ್​ 11ಕ್ಕೆ 1, ಪ್ರಸಿದ್ಧ ಕೃಷ್ಣ 4ಕ್ಕೆ 1). ಕರ್ನಾಟಕ: 122.1 ಓವರ್​ಗಳಲ್ಲಿ 475 (ಸ್ಮರಣ್​ 203, ಮನೋಹರ್​ 34, ಶ್ರೇಯಸ್​ 31, ಪರಂತಾಪ್​ 26, ಪ್ರಸಿದ್ಧ 30, ಕೌಶಿಕ್​ 10*, ಅಭಿಲಾಷ್​ 12, ಗುರ್​ನೂರ್​ 125ಕ್ಕೆ 2, ಜಸ್ಸಿಂದರ್​ 66ಕ್ಕೆ 3, ಮಾರ್ಕಂಡೆ 53ಕ್ಕೆ 3).

https://www.vijayavani.net/former-sri-lankan-cricketer-tillakaratne-dilshans-daughter-shining-in-the-junior-world-cup