ವೃದ್ಧಿಮಾನ್​ ಸಹಾಗೆ ಬೆದರಿಕೆ ಹಾಕಿದ ಪತ್ರಕರ್ತನಿಗೆ ಬಿಸಿಸಿಐಯಿಂದ ಬಿಗ್​ ಶಾಕ್​!

ನವದೆಹಲಿ: ಸಂದರ್ಶನ ಕೊಡಲು ನಿರಾಕರಿಸಿದ್ದಕ್ಕೆ ಕ್ರಿಕೆಟಿಗ ವೃದ್ಧಿಮಾನ್​ ಸಹಾ ಅವರಿಗೆ ಬೆದರಿಕೆ ಹಾಕಿದ್ದ ಪತ್ರಕರ್ತ ಬೊರಿಯಾ ಮಜುಮ್ದಾರ್​ಗೆ ಭಾರತೀಯ ಕ್ರಿಕೆಟ್​ ನಿಯಂತ್ರಣ ಮಂಡಳಿ (ಬಿಸಿಸಿಐ) ಎರಡು ವರ್ಷಗಳ ನಿಷೇಧವನ್ನು ಹೇರಿದೆ. ಈ ಪ್ರಕರಣವನ್ನು ಪರಿಶೀಲಿಸಲು ಬಿಸಿಸಿಐ ತ್ರಿಸದಸ್ಯ ಸಮಿತಿಯನ್ನು ನೇಮಿಸಿತ್ತು.

ಕಳೆದ ಫೆಬ್ರವರಿಯಲ್ಲಿ ಸಹಾ ಅವರು ಪತ್ರಕರ್ತ ಮಜುಮ್ದಾರ್​ ಜತೆ ಆನ್​ಲೈನ್​ನಲ್ಲಿ ಚಾಟ್​ ಮಾಡಿದ್ದರು. ಇದಕ್ಕೆ ಸಂಬಂಧಿಸಿದ ಸ್ಕ್ರೀನ್​ಶಾಟ್​ ಅನ್ನು ಸಹಾ ಶೇರ್​ ಮಾಡಿಕೊಂಡಿದ್ದರು. ಅದರಲ್ಲಿ ನಾನು ಅವಮಾನಗಳನ್ನು ದಯೆಯಿಂದ ತೆಗೆದುಕೊಳ್ಳುವುದಿಲ್ಲ ಮತ್ತು ನಾನದನ್ನು ನೆನಪಿಸಿಕೊಳ್ಳುತ್ತೇನೆ ಎನ್ನುವ ಮೂಲಕ ಸಹಾ ಅವರಿಗೆ ಪತ್ರಕರ್ತ ಬೆದರಿಕೆ ಹಾಕಿದ್ದ. ಆ ಸಮಯದಲ್ಲಿ ಪತ್ರಕರ್ತನ ಹೆಸರನ್ನು ಸಾಹ ಅವರು ಬಹಿರಂಗಪಡಿಸಿರಲಿಲ್ಲ.

ಯಾವಾಗ ಈ ಪ್ರಕರಣವನ್ನು ಬಿಸಿಸಿಐ ಗಂಭೀರವಾಗಿ ಪರಿಗಣಿಸಿತೋ ಆವಾಗ ಸಹಾ ಪತ್ರಕರ್ತನ ಹೆಸರನ್ನು ಬಹಿರಂಗಪಡಿಸಿದರು. ಈ ಪ್ರಕರಣದ ತನಿಖೆ ನಡೆಸಲು ಬಿಸಿಸಿಐ ಉಪಾಧ್ಯಕ್ಷ ರಾಜೀವ್ ಶುಕ್ಲಾ ನೇತೃತ್ವದ ಬಿಸಿಸಿಐ ಸಮಿತಿಯು ರಚನೆಯಾಯಿತು. ಬಳಿಕ ಸಮಿತಿ ಸಾಹ ಅವರನ್ನು ಸಾಕ್ಷಿ ಕೇಳಿದಾಗ ಪತ್ರಕರ್ತನ ಹೆಸರನ್ನು ಗುರುತನ್ನು ದೃಢಪಡಿಸಿದರು.

ಈ ಘಟನೆಯ ಬಳಿಕ ಸಹಾ ಅವರಿಗೆ ಕ್ರಿಕೆಟ್ ಸಮುದಾಯದಿಂದ ಭಾರೀ ಬೆಂಬಲ ವ್ಯಕ್ತವಾಯಿತು ಮತ್ತು ಪತ್ರಕರ್ತನಿಗೆ ಸೂಕ್ತ ಕ್ರಮಕ್ಕೆ ಆಗ್ರಹಿಸಿದರು. ಅಂತಿಮವಾಗಿ ಬಿಸಿಸಿಐ ಸಮಿತಿ ಪತ್ರಕರ್ತ ಬೊರಿಯಾ ಮಜುಮ್ದಾರ್​ಗೆ ಎರಡು ವರ್ಷಗಳ ನಿಷೇಧವನ್ನು ಹೇರಿದೆ. (ಏಜೆನ್ಸೀಸ್​)

https://www.vijayavani.net/r-mumbai-container-truck-gets-stuck-below-kings-circle-bridge/

https://www.vijayavani.net/s-sumnima-udas-whose-wedding-rahul-gandhi-is-attending/

https://www.vijayavani.net/a-psi-exam-scam-hdk-kamal-pant-bjp/